ހުކުމެއްގައި ހައިކޯޓުން ރިޔާއަތްކޮށްފައިވާ ހަދީސް ބަސްފުޅަކާ މެދު ސުވާލު އުފެދުމުން ސުޕްރީމް ކޯޓުން އެ ނިންމުން ބާތިލުކޮށްފި އެވެ.
މިއީ އަމީން ކޮންސްރަކްޝަން ޕްރައިވެޓް ލިމިޓެޑުން 2005 ވަނަ އަހަރު ވަތަނިއްޔާ (މިހާރުގެ އުރީދޫ)އިން ހަވާލުކުރި މަސައްކަތެއް ކުރުމަށްފަހު، އެއްބަސްވި ތާރީހަށް އެ މަސައްކަތުގެ އަގު ލިބިފައި ނުވާތީ ޖޫރިމަނާގެ ގޮތުގައި ތިން ލައްކަ ޑޮލަރާއި އެކު ޖުމްލަ ހަ ލައްކައާއި ގާތް ކުރާ އަދެއްގެ ޑޮލަރު ހޯދުމަށް އަމީން ކޮންސްޓްރަކްޝަންސްއިން ހުށަހެޅި މައްސަލައެކެވެ.
ސިވިލް ކޯޓުން ކަނޑައެޅީ މި މައްސަލައިގެ ދައުވާކޮށްފައިވަނީ އެ ދެބަސްވުން އުފެދުނު ތާރީހުގެ 11 އަހަރު ފަހުން ކަމަށްވާތީ އެ ފައިސާ ހޯދުމަށް އަމީން ކޮންސްޓްރަކްޝަންއިން އެއްވެސް މަސައްކަތެއް ކޮށްފައި ނުވާކަން ފާހަގަކޮށެވެ. ސިވިލް ކޯޓުގެ ނިންމުމުގައި އޮތީ، ކުންފުންޏާބެހޭ ގާނޫނަށް ބަލާއިރު ކުންފުނީގެ ލިޔުންތައް ބެލެހެއްޓުން ލާޒިމު ވަނީ ފަސް އަހަރު ދުވަހުގެ މުއްދަތަށް ކަމަށްވާއިރު 11 އަހަރު ފަހުން ދައުވާކުރުމަކީ އެ ދައުވާއަށް ފުރިހަމައަށް ޖަވާބުދާރީވުމަށްވެސް ހުރަސް އެޅޭނޭ ކަމެއް ކަމަށެވެ.
އެހެން ނަމަވެސް ސިވިލް ކޯޓުގެ މި ނިންމުން ހައިކޯޓުން ބާތިލްކޮށް، އެ ބަދަލު ނަގައިދެވޭނެ ކަމަށް ނިންމީ ރަސޫލާގެ ހަދީސަކަށް ހަވާލާ ދިނުމަށް ފަހު އެވެ.
އެ ހަދީސް ބަސްފުޅުގައި ވަނީ "އެއްވެސް މުސްލިމެއްގެ ހައްގު ދުވަސްވުމުގެ ސަބަބުން ބާތިލުވެގެން ނުދާނެ" ކަމަށެވެ.
އުރީދޫގެ ފަރާތުން މި މައްސަލަ ސުޕްރިމް ކޯޓުގައި އިސްތިއުނާފު ކުރަމުން ސުވާލު އުފެއްދީ މި ހަދީސްގެ ސައްހަކަމާމެދުގަ އެވެ. އެއީ އެ ހަދީސްއާ ގުޅިގެން ހައިކޯޓުން ހަވާލާދީފައިވާ މަސްދަރުން ގޯސްވުމުންނެވެ. އަދި ހަވާލާދީފައިވާ ފޮތުން އެ ހަދީސް ބަސްފުޅު ފެނިފައި ނުވުމުންނެވެ.
މި މައްސަލަ ސުޕްރީމް ކޯޓުން ދިރާސާ ކުރުމަށްފަހު ބުނީ ހަދީސް އިލްމުގެ އެންމެ މަޝްހޫރު ހަ ފޮތުންވެސް އެ ހަދީސް ބަސްފުޅު ހައިކޯޓުން ހަވާލާދީފައިވާ ގޮތަށް އޮއްވައި ފެނިފައި ނުވާއިރު، އިންޓަނެޓްގެ ޒަރިއްޔާއިން ލިބެން ހުރި މައުލޫމާތުންވެސް އެ ހަދީސް ބަސްފުޅު ފެނިފައި ނުވާ ކަމަށެވެ.
ސުޕްރީމް ކޯޓުގެ ހުކުމުގައިވާ ގޮތުން މި ހުސޫމަތު އުފަންވީ ފައިސާގެ މައްސަލައަކުން ކަމަށް ވުމުން ހުކުމަށް ވާސިލްވުމުގައި ކޮންޓްރެކްޓާ ބެހޭ ގާނޫނު ތަތުބީގުކުރަން ޖެހޭނެ އެވެ. އެހެން ނަމަވެސް ހައިކޯޓުން ގާނުނު މާނަކޮށްފައި ވަނީ އެކަށީގެންވާ އުސޫލުތަކެއްގެ މައްޗަށް ބިނާ ނުކޮށް، ދަށުކޯޓުގެ ނިންމުމުގެ މައުލޫއަށް ވެސް ގޮތް ކަނޑައެޅުމެއް ނެތި ކަމަށް ސުޕްރީމް ކޯޓުން ބުންޏެވެ.
ސުޕްރީމް ކޯޓުން ކަނޑައެޅީ މި މައްސަލައިގައި ދައުވާކޮށްފައިވަނީ މާ ދިގު މުއްދަތެއް ފާއިތުވެދިޔަ ފަހުން ކަމަށެވެ. އެ ކޯޓުން ވެސް ރިއާޔަތްކުރެއްވި އެއް ކަމަކީ ކުންފުންޏާބެހޭ ގާނޫނާއި، ޓެކްސްގެ އިދާރީ ގާނޫނުން ލިޔެކިޔުންތައް ބެލެހެއްޓުމަށް ލާޒިމުކޮށްފައި އޮންނަ މުއްދަތެވެ. ޓެކްސް ނެގުމާބެހޭ އިދާރީ ގާނޫނުން ވެސް ރެކޯޑު ބެލެހެއްޓުން ލާޒިމުކޮށްފައި އޮންނަނީ ހަ އަހަރު ދުވަހުގެ މުއްދަތަށެވެ.
ނަމަވެސް, މި މައްސަލާގައި ސުޕްރީމް ކޯޓުން ހައިކޯޓުގެ މުޅި ހުކުމް ބާތިލްކޮށްފައެއް ނުވެ އެވެ. ހުކުމުން ބާތިލުކޮށްފައިވަނީ ހައްގެއް އުފަންވާ ވަގުތުން ފެށިގެން ފަނަރަ އަހަރު ފާއިތުވުމާ ހަމައަށް ދައުވާކުރުމުގެ ހައްގު ދެމި އޮންނާނޭކަމަށް ހައިކޯޓުން ކަނޑައެޅި ބައެވެ. ސުޕްރީމް ކޯޓުގެ ހުކުމުގައިވާ ގޮތުން ދައުވާ ކުރުމުގެ ފުރުސަތު އޮތްކަން ނުވަތަ ނެތްކަން ކަނޑައަޅަންޖެހޭނީ މައްސަލައިގައި ކަންހިނގާފައިވާ ގޮތަށާއި، މައްސަލައިގައި ހިމެނޭ ފަރާތްތަކުން އަމަލުކޮށްފައިވާ ގޮތް ސާފުކޮށް އަދާލަތުގެ އުސޫލުތަކަށް ރިއާޔަތްކޮށްގެންނެވެ.
ފަނޑިޔާރު އައިޝާ ޝުޖޫން ރިޔާސަތުގައި އިންނަވައިގެން ނިންމެވި މި މައްސަލައަށް ފަނޑިޔާރު އަޒްމިރަލްދާ ޒާހިރާއި މަހާޒު އަލީ ޒާހިރު ތާއީދުކުރައްވާފައިވެ އެވެ.
