ކުޑަކުދިންނަށްކުރާ އަނިޔާ އާއި އަންހެނުންނަށް ކުރާ އަނިޔާގެ މައްސަލަތައް މަދެއް ނުވެ އެވެ; އެކަން މިދިޔަ އޮކްޓޯބަރު މަހުގެ ތަފާސްހިސާބުތައް ވެސް ހާމަވެ އެވެ.
ޖެންޑާ މިނިސްޓްރީން ހާމަކުރި ހިސާބުތަކުން ދައްކާ ގޮތުގައި ކުޑަކުދިންނަށް އެކި ވައްތަރުގެ ގެއްލުމާއި އަނިޔާ ކުރިކަމުގެ 95 މައްސަލަ މިދިޔަ އޮކްޓޯބަރު މަހު އެ މިނިސްޓްރީއަށް ހުށަހަޅާފައިވެ އެވެ. މީގެތެރޭގައި ހިމެނެނީ އަންހެން ކުދިންނާއި ގުޅުންހުރި 54 މައްސަލައަކާއި ފިރެހެން ކުދިންނާއި ގުޅުންހުރި 41 މައްސަލަ އެވެ.
ޖިންސީ އަނިޔާގެ އިތުރުން ޖިސްމާނީ ގޮތުންނާއި ނަފްސާނީ ގޮތުން ދެވޭ އަނިޔާގެ މައްސަލަތަކާއި ގެވެށި އަނިޔާގެ މައްސަލަތައް ވެސް ޖެންޑާ މިނިސްޓްރީން ބަލާފައިވާކަން ތަފާސްހިސާބުތަކުން ހާމަވެ އެވެ. އެގޮތުން ޖިސްމާނީ އަދި ނަފްސާނީ އަނިޔާގެ 22 މައްސަލަ އާއި ގެވެށި އަނިޔާގެ 16 މައްސަލައެއް މިނިސްޓްރީއަށް އޮކްޓޯބަރު މަހުގެ ތެރޭގައި ހުށަހަޅާފައިވެ އެވެ.
ގެވެށި އަނިޔާއާ ބެހޭ މައްސަލަތަކުގެ ތެރޭގައި ރޭޕްގެ ދެ މައްސަލައަކާއި ނަފްސާނީ އަނިޔާގެ 13 މައްސަލައަކާއި ޖިސްމާނީ އަނިޔާގެ 10 މައްސަލައެއް ޖެންޑާ މިނިސްޓްރީން ބަލާފައިވެ އެވެ. މިދިޔަ މަހުގެ ތެރޭގައި މިފަދަ މައްސަލަތަކާއި ގުޅިގެން ދައުލަތުގެ ބެލުމުގެ ދަށަށް ފަސް ކުދިން ގެންގޮސްފައިވެ އެވެ. ދައުލަތުގެ ބެލުމުގެ ދަށުގައި މިވަގުތު ތިބީ ޖުމްލަ 210 ކުދިންނެވެ. އެއީ 97 އަންހެން ކުދިންނާއި 113 ފިރެހެން ކުދިންނެވެ.
މީގެ އިތުރުން ކުޑަކުދިންނަށް ލިބެންޖެހޭ ސިއްހީ ހިދުމަތްތަކުން އެ ކުދިން މަހުރޫމުކުރުވުމާއި ބެހޭ މައްސަލައަކާއި ވެކްސިން ޖެހުމަށް އިންކާރުކުރުމާއި ބެހޭ މައްސަލައަކާއި ސްކޫލަށް ކުއްޖާ ފޮނުވަން އިންކާރު ކުރުމާ ބެހޭ ދެ މައްސަލައެއް ވެސް ޖެންޑާ މިނިސްޓްރީއަށް މިދިޔަ މަހު ހުށަހަޅާފައިވެ އެވެ.
އޮކްޓޯބަރު މަހުގެ ތެރޭގައި ޖެންޑާ މިނިސްޓްރީއަށް ޖުމްލަ 222 މައްސަލަ ހުށަހަޅާފައިވާއިރު އަނިޔާގެ މައްސަލަތައް އެއް ދުވަހުން އަނެއް ދުވަހަށް އިތުރުވަމުންދާކަން ޖެންޑާ މިނިސްޓްރީން ވެސް ފާހަގަކޮށް ވަނީ ކަންބޮޑުވެފަ އެވެ.
