ސާފްތާހިރުކަން ކުޑަވެ ކާބޯތަކެތި އުފައްދާ ދިވެހި ބްރޭންޑެއް ކަމަށްވާ "ދޮންގޮއްޔެ" ގެ އުފެއްދުންތައް ހެލްތް ޕްރޮޓެކްޝަން އެޖެންސީ (އެޗްޕީއޭ) މަނާކޮށްފި އެވެ.
އެޗްޕީއޭން މިއަދު ނެރުނު ބަޔާނެއްގައި ބުނީ އެ އޮތޯރިޓީއަށް ހުށަހެޅުނު ޝަކުވާއަކާއި ގުޅިގެން ދޮންގޮއްޔެ ބްރޭންޑްގެ ކާބޯތަކެތި އުފައްދާ ތަނުގެ އިންސްޕެކްޝަނެއް ހެދިއިރު ތަނުގެ ސާފުތާހިރުކަން ކުޑަކަން ފާހަގަ ކުރެވިފައިވާ ކަމަށެވެ.
"އެ ތަނުން އުފައްދާ ކާބޯތަކެތި ތައްޔާރު ކުރާތަން އިސްލާހުނުކޮށް އެތަނުން އުފައްދާ އަދި ބަންދުކުރާ ތަކެތި ބޭނުންކުރުމަކީ އޭގެ ސަބަބުން އާންމު ސިއްހަތަށް ނޭދެވޭ އަސަރުކުރުވާ އަދި ކާބޯތަކެތީގެ ޒަރީއާއިން ބައްޔެއް ފެތުރޭފަދަ ނުރައްކާތެރި ހާލަތެއް މެދުވެރި ވުމުގެ ފުރުސަތު އޮތްކަން،" މިނިސްޓްރީގެ ބަޔާނުގައިވެ އެވެ.
އެހެންކަމުން މިހާތަނަށް ބާޒާރުގައި ހުރި އެ ބްރޭންޑުގެ އުފެއްދުންތައް ވިއްކަން ބެހެއްޓުން މިނިސްޓްރީން ވަނީ މަނާކޮށްފަ އެވެ. އަދި މިނިސްޓްރީން ވަނީ އެ ތަކެތި ބޭނުންނުކުރުމަށް ވެސް އިލްތިމާސް ކޮށްފަ އެވެ.
ދިވެހިރާއްޖޭގައި އުފައްދާ ކާބޯތަކެތި ހުންނަންޖެހޭނީ ސަރުކާރުން ހުއްދަކޮށްފައިވާ މިންގަނޑެއްގެ ތެރޭގަ އެވެ. އަދި އެ ޕްރޮޑަކްޓެއް އުފެއްދި ތާރީހާއި މުއްދަތު ހަމަވާ ތާރީހު ވެސް ވިއްކަން ބަހައްޓާއިރު ލިޔެފައި ހުންނަންޖެހެ އެވެ.
