މާފުށި ޖަލުގައި ގައިދީންނަށް ހިންގާ ރިހެބިލިޓޭޝަން ޕްރޮގްރާމްތައް އިތުރުކޮށް ފުޅާކުރަން އާ އިމާރާތެއް އެޅުމުގެ މަސައްކަތް މޯލްޑިވްސް ކަރެކްޝަނަލް ސާވިސަސްއިން ބަޔަކާ ހަވާލުކޮށްގެން ކުރިޔަށް ގެންދަން ނިންމައިފި އެވެ.
އެ މަސައްކަތް ހަވާލުކުރަން ހުޅުވާލި ބީލަން ކާމިޔާބުކުރީ އެލަވަރު މޯލްޑިވްސް ޕވޓ. ލޓޑ އެވެ. މަސައްކަތުގެ އިއުލާނުގައި ޖުމްލަ 175 ދުވަސްތެރޭ އެ އިމާރާތުގެ މަސައްކަތް ނިންމަން ޖެހޭނެކަމަށް ބުނެ އެވެ. އެ ކުންފުންޏާ މަސައްކަތް ހަވާލުކުރީ 4.7 މިލިއަން ރުފިޔާއަށެވެ.
ކަރެކްޝަންސްއިން ބުނީ މާފުށި ޖަލުގައި އަޅާ އާ އިމާރާތަކީ މިހާރު ވެސް އެ އިދާރާއިން ގައިދީންނަށް އަމާޒުކޮށް ކުރިޔަށް ގެންދާ އެކި އެކި ޕްރޮގްރާމްތަކާއި ކޯސްތައް އިތުރުކުރުމުގެ އަމާޒުކޮށް އަޅާ އިމާރާތެއް ކަމަށެވެ.
"މާފުށީގައި އެންމެ ގިނަ އަދަދަކަށް ގައިދީން ތިބޭތީވެ ގައިދީންނަށް ހިންގާ ޕްރޮގްރާމްތައް ވެސް އެންމެ ގިނަ ވާނީ މާފުށި ޖަލުގަ. އެހެންވެ އެ ކެޕޭސިޓީ އިތުރުކުރުމަށް އަޅާ ރިހެބިލިޓޭޝަން ސެންޓަރެއް އެ އާ އިމާރާތަކީ އެއީ،" ކަރެކްޝަންސްގެ މީޑިއާ އޮފިޝަލް އާމިނަތު ޔުސްރީން އަހުމަދު ވިދާޅުވި އެވެ.
މިފަހުން ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އިމްރާން އަބްދުﷲ ވަނީ ހިންމަފުށީގައި ވެސް ރިހެބިލިޓޭޝަން ސެންޓަރެއް އެޅުމުގެ މަސައްކަތް މިހާރު ގާތްގަނޑަކަށް ނިމިފައިވާކަމަށް ވިދާޅުވެފަ އެވެ.
އެކަމާ ގުޅިގެން ޔުސްރީން ވިދާޅުވީ ހިންމަފުށީގައި ވެސް އަޅަނީ ހަމަ މާފުށީގައި މި އަޅާ އާ އިމާރެތެކޭ އެއްގޮތަށް ރިހެބިލިޓޭޝަން ކޯސްތައް ހިންގާ އިމާރާތެއްކަމަށާއި އަދި އެތަނުގެ ވެސް 80 ޕަސަންޓު މަސައްކަތް މިހާރު ނިމިފައިވާ ކަމަށެވެ.
އަދި އަލަށް ހަދާ އެ ދެ އިމާރާތުގައި ވެސް އިތުރު ކްލާސްރޫމް ހަދައި، ގައިދީންގެ ރިހެބިލިޓޭޝަން މަސައްކަތް އިތުރަށް ފުޅާ ކުރުމުގެ ވިސްނުން ކަރެކްޝަންސްއިން ގެންގުޅޭ ކަމަށް އޭނާ ވިދާޅުވި އެވެ.
"ކަރެކްޝަންސްއިން މިހާރު ހިންގާ ކޯސްތަކަށް ބަލާލާއިރު، ސިއުއިން ނުވަތަ ފެހުމުގެ ކޯސްތައް، ކޮމްޕިއުޓާ އެޕްލިކޭޝަން ކޯސް، ގާރީކަމުގެ ކޯސް، ވަޔަރިން އަދި އިލެކްޓްރިކަލް މަސައްކަތްތަކުގެ ކޯސް، އެގްރިކަލްޗާ ކޯސްތައް އަދި އޯލެވެލްއާއި އެސްއެސްސީ އިމްތިހާނުތަކަށް ތައްޔާރުކުރާ ކޯސްތައް ވެސް ހިމެނޭ،" ޔުސްރީން ފާހަގަކުރެއްވި އެވެ.
އަލަށް ހަދާ އެ ދެ އިމާރާތާއެކު މި ކޯސްތަކުގައި އިތުރު ގައިދީންނަށް ބައިވެރިވުމުގެ ފުރުސަތު ފަހިވެގެންދާނެކަމަށް ޔުސްރީން ވިދާޅުވި އެވެ.
އަދި ކަރެކްޝަންސްއިން ހިންގާ މިފަދަ ރިހެބިލިޓޭޝަން ޕްރޮގްރާމްތަކުގައި ބައިވެރިވާ ގައިދީންގެ އަދަދު މިހާރު ވެސް ރަނގަޅުއިރު، ކުރިޔަށް އޮތް ތަނުގައި މި ދެ އިމާރާތާއެކު އެ ކެޕޭސިޓީ ވަރަށް ބޮޑަށް އިތުރުވެގެން ދާނެކަމަށް އޭނާ ލަފާކުރެއްވި އެވެ.
ރާއްޖޭގައި މަސްތުވާތަކެތި ބޭނުން ކުރާ 7،496 މީހުން އުޅޭ ކަމަށް އެކުވެރި ދައުލަތްތަކުގެ ކުށްކުށާއި މަސްތުވާތަކެއްޗާ ބެހޭ އޮފީހުން 2011 ވަނަ އަހަރު ކުރިއަށްގެންދިޔަ ސާވޭއަކުން އޮތީ ހޯދާފަ އެވެ. އަދި ރާއްޖޭގެ ޖަލުތަކުގައި ހުކުމް ތަންފީޒު ކުރަމުންދާ 2500 ވަރަކަށް މީހުން އުޅޭއިރު އޭގެ ތެރެއިން 80 ޕަސެންޓު މީހުންނަކީ މަސްތުވާތަކެއްޗާ ގުޅުންހުރި ކުށްތަކުގައި ޖަލަށްލާފައި ތިބި މީހުން ކަމަށް އެ ދިރާސާތަކުން ދައްކަ އެވެ.
