ހިޔާ ފްލެޓްތައް އާންމުންނަށް ހުޅުވާލައި އެތަނުގައި މީހުންނަށް ދިރިއުޅެން ފެށި ހިސާބުން ތަފާތު އެކި ހާދިސާތައް ފެންމަތިވާން ފެށި އެވެ; އެގޮތުން އެންމެ ފުރަތަމަ ފެންމަތިވީ ހިޔާ ފްލެޓުތަކުގެ ފިނިޝިންއަށް މީހުން ގެންދާ އަގުބޮޑު މުދާތަކުން ވައްކަން ކުރުމެވެ.
ހިޔާގެ ފިނިޝިންއަށް ގެންގޮސް އެއްތަން ކޮށްފައި ހުރި އެތައް ސާމާނެއް ވަގަށް ނަގާފައި ވާއިރު، އޭގެ ތެރޭގައި ފްލެޓް ހެދުމަށް ބޭނުންވާ ސާމާނުގެ އިތުރުން ހިފާގެންގުޅޭ އެތައް ސާމާނެއް ހިމެނެ އެވެ.
ފުލުހުން އެންމެ ފަހުން އާންމު ކޮށްފައިވާ ތަފާސްހިސާބުތަކަށް ބަލާއިރު މިދިޔަ ތިން މަހު އެ ސަރަހައްދުން ރިޕޯޓު ކޮށްފައިވާ މައްސަލަތައް ވަނީ އިތުރުވެފަ އެވެ.
ހިޔާ ފްލެޓަކުން ވައްކަން ކޮށްފައިވާ ކަމަށް ބުނެފައިވާ ފޯސްޓެއް--
އުމުރުން ދުވަސްވީ މީހަކަށް އަނިޔާދީ ފޭރުން!
މިދިޔަ ހޯމަ ދުވަހު ސޯޝަލް މީޑިއާގައި ދައުރުވަމުން ދިޔައީ އުމުރުން ދުވަސްވީ މީހަކަށް ފޭސްޓޫގައި އަނިޔާދީ ފޭރުނު ވާހަކަތަކެއް އޭނާ ކިޔައިދީފައިވާ ވީޑިއޯއެކެވެ.
އޭނާ ވީޑިއޯގައި ކިޔައިދޭ ގޮތުގައި ފޭރެން އުޅުނު މީހުން އޭނާ ކޮށްޕާލައި ވޮލެޓު ހިފައިގެން ދުއްވައިގަތީ އެވެ. އަދި އެވަގުތު ވިއްސައިގެން ގޮސް އޭނާ ޖެހުނީ ގެއެއްގެ ކަނުގަ އެވެ.
އެ މީހާ ބުނީ އެކަން ފުލުހަށް އެންގި ކަމަށާއި އެމީހާ ހޯދުމުގެ މަސައްކަތް ވީވަރަކުން ކުރާނެ ކަމަށް ފުލުހުން ބުނި ކަމަށެވެ.
މަސްތުވާތެކެތީގެ ވިޔަފާރި އާއި ބޭނުންކުރާ އައްޑާއަކަށް!
އެފަހުން ހިޔާ ފެލްޓުތަކުގައި މަސްތުވާތަކެތި ބޭނުން ކުރުމަށްދާ މީހުންގެ މައްސަލަތައް ވެސް ވަނީ އިތުރުވެފަ އެވެ. އެ ސަރަހައްދުގައި އުޅޭ އާންމުންގެ ފަރާތުން މައްސަލަ ފުލުހަށް ހުށަހެޅި ނަމަވެސް އެކަށީގެންވާ ފިޔަވަޅުތަކެއް ނާޅާ ކަމުގެ ޝަކުވާ ވަނީ ބޮޑުވެފަ އެވެ.
ހިޔާ ޓަވަރުގެ ސިޑި މަތީގައި މަސްތުވާތަކެތު ބޭނުން ކުރަން ބޭނުންވާ ބައެއް ސާމާނުތައް އަތުރާފައި ހުއްޓާ / ފޮޓޯ: ހުސެން ޝަޔާހު/ އަދަދު
ހިޔާ ފްލެޓްގެ ޓަވަރުގައި މީހުން އާބާދުވާން ފެށިތާ ތިން މަސް ވެފައިވާއިރު އެ ޓަވަރުތަކުގެ އެންމެ މަތީ ފްލޯތަކުގައި މަސްތުވާން ތިބޭ ޒުވާނުން މަސްތުވުމަށް ބޭނުންކުރާ ސާމާނުތައް ސިޑިމައްޗަށް އަޅާ ތަން ވަނީ މުޑުދާރު ކޮށްފަ އެވެ.
ހިޔާ ޓަވަރުގެ ސިޑި މަތީގައި ނަޖިސް / ފޮޓޯ: ހުސެން ޝަޔާހު/ އަދަދު
އެކަމާ ގުޅިގެން ފުލުހުން ބުނީ، ހިޔާ ފްލެޓްގައި މަސްތުވާތަކެތި ބޭނުން ކުރާ ކަމުގެ ޝަކުވާ ލިބެމުންދާ ކަމަށާއި އެފަދަ މައްސަލަތައް ވެސް ހުށަހަޅާފައިވާ ކަމަށެވެ. އައި އެފަދަ ޝަކުވާއެއް ލިބިއްޖެ ނަމަ ފުލުހުން އެތަނަށް އެޓެންޑްވާ ކަމަށާއި، އެކަންކަން ބަލައި ފިޔަވަޅުތައް ދަނީ އަޅަމުން ކަމަށް ފުލުހުން ބުނެ އެވެ.
ފުލުހުންނާއި އެޗްޑީސީގެ ބަސް
ފުލުހުން ބުނީ ހުޅުމާލެ ފޭސް ޓޫގައި ދިރިއުޅެމުންދާ ރައްޔިތުންގެ ސަލާމަތާއި ރައްކާތެރިކަން މޮނިޓާކޮށް އެފަދަ ކަންކަން ހުއްޓުވުމަށް ހިޔާ ފްލެޓް ސަރަހައްދު މޮނިޓާކޮށް ބެލެހެއްޓުމުގެ މަސައްކަތް ކުރަމުންދާ ކަމަށެވެ.
"ހިޔާ ފެލްޓް ސަރަހައްދުގައި ކުށް މަދުކުރުމަށް ރައްޔިތުން ހޭލުންތެރި ކުރުމަށް މައުލޫމާތު ދިނުމުގެ މަސައްކަތް ވެސް ފުލުހުން ދަނީ ކުރަމުން،" ފުލުހުން އޮފިޝަލަކު ވިދާޅުވި އެވެ.
އެކަމާ ގުޅޭގޮތުން ހުޅުމާލެ ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުނީ ފޭސް ޓޫގެ ރައްކާތެރިކަން އިތުރު ކުރުމަށް ސީސީޓީވީ ހަރުކުރުމުގެ މަސައްކަތް ކުރަމުންދާ ކަމަށެވެ. އަދި އެ ސަރަހައްދުގައި 24 ގަޑިއިރު ފުލުހުން ތިބޭ ގޮތަށް ޗެކް ޕޮއިންޓްތައް ގާއިމް ކުރުމަށް މަޝްވަރާތައް ކުރެވެމުންދާ ކަމަށެވެ.
"އެ ސަރަހައްދުގައި ހިނަގަމުންދާ ކަންކަން ހުއްޓުވާ ހައްލެއް ހޯދުމަށް ކަމާބެހޭ ވުޒާރާތަކާއެކު ގިނަ ބައްދަލުވުންތަކެއް ދަނީ ބާއްވަމުން،" އެޗްޑީސީން ބުންޏެވެ.
ހިޔާ ފްލެޓްގެ 7،000 އެޕާޓްމަންޓް ހުންނަ މިތަނުގައި 25 ބުރީގެ 16 ޓަވަރު ހުރެ އެވެ. މީގެތެއިން 10 ޓަވަރުގައި ހުންނަނީ 392 އެޕާޓްމަންޓެވެ. އަދި ބާކީހުރި ހަ ޓަވަރުގެ 492 އެޕާޓްމަންޓް ހުރެ އެވެ.
ފްލެޓުގައި މީހުން ދިއުޅޭނީ 6،720 އެޕާޓްމަންޓުގަ އެވެ. އަދި މިތަނުގައި އެންމެ މަދުވެގެން 35،000 މީހުން ދިރިއުޅޭނެ ކަމަށް ލަފާކޮށްފައި ވާއިރު މިހާތަނަށް ގާތްގަނޑަކަށް 300 އާއިލާ ފްލެޓަށް ބަދަލުވެ ދަނީ ދިރިއުޅެމުންނެވެ.
