މެޑްރިޑް (ނޮވެމްބަރު 15) - މިރޭ ކުޅުނު މެޗުތަކުން މޮޅުވެ, ކްރޮއޭޝިއާ އާއި ސްޕެއިން އަންނަ އަހަރު ގަތަރުގައި ބާއްވާ ފީފާ ވޯލްޑް ކަޕުގެ ޖާގަ ކަށަވަރުކުރިއިރު، އަމިއްލަ ދަނޑުގައި ސާބިއާ އަތުން 2-1 އިން ބަލިވެ ޕޯޗުގަލުން ވޯލްޑް ކަޕްގެ ޖާގަ ހޯދަން ޕްލޭއޮފް ބުރުުގައި ކުޅެން ޖެހިއްޖެ އެވެ.
އެންމެ ފަހުން ބޭއްވި ވޯލްޑް ކަޕްގެ ރަނަރަޕް ކްރޮއޭޝިއާ އިން ވަނީ މިރޭ 1-0 އިން ރަޝިއާ ބަލިކޮށްފަ އެވެ. ސްވިޑަންގެ މައްޗަށް ސްޕެއިން އިން ކުރިހޯދީ 1-0 އިންނެވެ. ޕޯޗުގަލް އިން އެއްވަރުކޮށްލައިގެން ވެސް ވޯލްޑް ކަޕަށް ދެވެން އޮތް މެޗުގައި ބަލިވިއިރު، އެ މެޗުން މޮޅުވި ސާބިއާ ވަނީ ވޯލްޑް ކަޕްގެ ޖާގަ ކަށަވަރުކޮށްފަ އެވެ.
ލިޒްބަންގައި މިރޭ ކުޅުނު މެޗު ފެށިގެން ދެ ވަނަ މިނިޓްގައި ބެނާޑޯ ސިލްވާ ދިން ބޯޅައަކުން ރެނާޓޯ ސަންޗޭޒް ވަނީ ޕޯޗުގަލަށް ކުރިހޯދައިދީފަ އެވެ. އެކަމަކު، މެޗުގެ ފުރަތަމަ ހާފު ނިމުމުގެ ކުރިން ޑޫސާން ޓަޑިޗް ވަނީ ސާބިއާ އަށް ގޯލެއް ޖަހައި ނަތީޖާ ހަމަހަމަކޮށްދީފަ އެވެ.
އެއްވަރުކޮށްލައިގެން ވެސް ވޯލްޑް ކަޕަށް ދެެވެން އޮތް ޕޯޗުގަލް ދެ ވަނަ ފަހަރަށް ލީޑުނަގަން މަސައްކަތް ކުރަމުން ދަނިކޮށް މެޗުގެ ފަހު މިނިޓްގައި ސާބިއާގެ ފޯވާޑް އަލެކްސަންޑަ މިޓްރޮވިޗް ވަނީ ގޯލެއް ޖަހައި ސާބިއާ މޮޅުކޮށްދީފަ އެވެ. އޭރިއާތެރޭގައި ހުސްކޮށް ހުރެފައި މިޓްރޮވިޗް ބޮލުން ޖެހި ބޯޅަ ހުއްޓުވަން ޕޯޗުގަލްގެ ކީޕަރު ރުއީ ޕެޓްރީޝިއޯ އަށް މާ ބޮޑު ކަމެއް ނުކުރެވުނެވެ.
ރޭގެ މެޗަށް ފަހު ޕޯޗުގަލްގެ ތަރި ރޮނާލްޑޯ ދަނޑުމަތީގައި އިށީނދެގެން.
ސާބިއާ، ޖެހިޖެހިގެން ދެ ވަނަ ވޯލްޑް ކަޕަށް ކޮލިފައިވިއިރު، އެ ޓީމަށް ކޮލިފައިން ގްރޫޕް އޭގެ އެއް ވަނަ ލިބުނީ އަށް މެޗުން 20 ޕޮއިންޓާ އެކު އެވެ. ދެ ވަނައިގައި ނިންމާލި ޕޯޗުގަލް އަށް އަށް މެޗުން ވަނީ 17 ޕޮއިންޓް ލިބިފަ އެވެ.
ސްޕެއިނަށް ވޯލްޑް ކަޕްގެ ޖާގަ ޔަގީންކޮށްދިން ގޯލު ޖެހީ މެޗު ނިމެން ހަތަރު މިނިޓަށް ވެފައި ހުއްޓައި އަލްވާރޯ މޮރާޓާ އެވެ. ސްޕެއިނުގެ ޒުވާން މިޑްފީލްޑަރު ގަވީގެ މޮޅު ކުޅުން ފެނުނު މި މެޗުގައި އޭނާ ދިން ބޯޅަ އަކުން އޭރިއާބޭރުން ސްޕެއިނުގެ ޑެނީ އޯލްމޯ ޖެހި ބޯޅަ ސްވިޑެން ކީޕަރު ރޮބިން އޮލްސެން އަތުގައި ޖެހިފައި ނުކުތް ވަގުތު މޮރާޓާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ގްރޫޕް ބީގެ އެއް ވަނަ ސްޕެއިނުން ހޯދީ އަށް މެޗުން 19 ޕޮއިންޓާ އެކު އެވެ. ދެ ވަނަ ހޯދި ސްވިޑެން އަށް އަށް މެޗުން 15 ޕޮއިންޓް ލިބުނުއިރު، އެ ޓީމު ވެސް ޕްލޭއޮފް ބުރުގައި ވާދަކުރާނެ އެވެ.
ރަޝިއާ އަތުން ކްރޮއޭޝިއާ މޮޅުވީ މެޗުގެ ފަހު ވަގުުތު ގޯލު ޖަހައިގެންނެވެ. މި ގޯލަކީ މެޗުގެ 81 ވަނަ މިނިޓްގައި ކްރޮއޭޝިއާ އިން ނެގި ހުރަހެއް ޑިފެންޑް ކުރަން އުޅުމުގެ ތެރޭގައި ރަޝިއާގެ ފެޑޯ ކުދްރާޝޯފް އަތުން ބައިކޮޅަށް ވަން ގޯލެކެވެ.
ގްރޫޕް އެޗްގެ އެއް ވަަނަ ކްރޮއޭޝިއާ ދިޔައީ 10 މެޗުން 23 ޕޮއިންޓާ އެކު އެވެ. ދެ ވަނަ އަށް ދިޔަ ރަޝިއާ އަށް ވަނީ 10 މެޗުން 22 ޕޮއިންޓް ލިބިފަ އެވެ.
ގަތަރުގައި އަންނަ އަހަރު ކުޅެން ރާވާފައިވާ ފީފާ ވޯލްޑް ކަޕުގެ ޖާގަ ހޯދާފައިވަނީ ހޯސްޓްގެ ހައިސިއްޔަތުން ގަތަރުގެ އިތުރުން އަށް ގައުމަކުންނެވެ. އެއީ ދެކުނު އެމެރިކާގެ ބްރެޒިލްގެ އިތުރުން ޔޫރަޕްގެ ހަތް ގައުމެކެވެ. ޔޫރަޕްގެ ގައުމުތަކަކީ ޖަރުމަނާއި ފްރާންސް، ޑެންމާކް، ބެލްޖިއަމް، ސްޕެއިން، ސާބިއާ އަދި ކްރޮއޭޝިއާ އެވެ.
