އިސްލާމްއާބާދް، ޕާކިސްތާން (ނޮވެމްބަރު 9) - ޕާކިސްތާނުގައި ހަރަކާތްތެރިވާ ތާލިބާނުންނާ އެކު ސަރުކާރުން މަޝްވަރާ ފަށާފައިވާ ކަމަށް އިންފޮމޭޝަން މިނިސްޓަރު ވިދާޅުވެއްޖެ އެވެ.
ޓީވީ މެދުވެރިކޮށް ދެއްވި ބަޔާނެއްގައި ފަވާދް ޗައުދަރީ ވިދާޅުވީ ތެހްރީކޭ ތާލިބާން ޕާކިސްތާން (ޓީޓީޕީ) އިން މަޝްވަރާ ކުރިއަށް ދާއިރު އެއްވެސް ހަމަލާއެއް ނުދޭން އެއްބަސްވެފައިވާ ކަމަށެވެ.
ޓީޓީޕީ އާއި ޕާކިސްތާނާ އަވައްޓެރި އަފްގާނިސްތާނުގެ ވެރިކަމުގައި މިހާރު އޮތް ތާލިބާނުންނާ ގާތް ގުޅުމެއް އޮވެ އެވެ. ޓީޓީޕީގެ އެތައް ހާސް މެމްބަރުން މި ވަގުތު ތިބީ އަފްގާނިސްތާނުގައި ކަމަށް ވެ އެވެ.
އެމެރިކާ އިން ޓެރަރިޒަމާ ދެކޮޅަށް ކުރާ ހަނގުރާމަ އަށް ތާއީދު ކުރާ ކަމަށް ޕާކިސްތާނުން ބުނުމާ އެކު، 2007 ވަނަ އަހަރު އުފެދުނު ޓީޓީޕީ އިން ގައުމުގައި ގިނަ ހަމަނުޖެހުންތައް ހިންގި އެވެ.
އެގޮތުން އަމިއްލަ އަށް މަރުވެގެންނާއި ބޮން ގޮއްވައިގެން ގިނަ ހަމަލާތަކެއް ދީ ގިނަ ބަޔަކު ރަހީނު ކުރުމުގެ އަމަލުތައް ވެސް އެ މީހުން ހިންގާފައި ވެ އެވެ.
މިހާރު ނޯބެލް ސުލްހައިގެ އިނާމު ލިބިފައިވާ މަލާލާ ޔޫސަފްޒާއީ ކުޑައިރު، 2012 ވަނަ އަހަރު ޓީޓީޕީ އިން އޭނާގެ ގަޔަށް ބަޑި ޖެހި މައްސަލައިގައި މުޅި ދުނިޔެ އިން ނުރުހުން ފާޅުކުރި އެވެ.
އޭގެ ދެ އަހަރު ފަހުން ޕެޝާވަރުގެ ސްކޫލެއްގައި 150 ކުދިން މަރާލި ހާދިސާ އަށް ފަހު ޕާކިސްތާން ސިފައިން ފެށި ވަރުގަދަ އޮޕަރޭޝަނެއްގައި ޓީޓީޕީ ބަލިކަށިކޮށްލި އެވެ.
ޓީޓީޕީ އަކީ ޕާކިސްތާނުގައި މަނާކޮށްފައިވާ ގްރޫޕެކެވެ. ޗައުދަރީ ވިދާޅުވީ އެ މީހުންނާ އެކު މަޝްވަރާ ކުރާނީ ގައުމުގެ ގާނޫނު އަސާސީ އާއި ގާނޫނީ އިމުގެ ތެރެއިން ކަމަށެވެ.
"ދައުލަތުގެ އިސްތިގްލާލާއި، ގައުމުގެ ރީތި ނަމާއި، ސުލްހަ އާއި އިޖްތިމާއީ އަދި އިގްތިސާދީ ހަމަޖެހުމާ މެދު މަޝްވަރާ ކުރެވޭނެ،" އޭނާ ވިދާޅުވި އެވެ.
ޗައުދަރީ ވިދާޅުވީ ޓީޓީޕީ އާއި ސަރުކާރާ ދެމެދު މަޝްވަރާ ފެށުމަށް ބާރު އެޅުމުގެ ގޮތުން އަފްގާނިސްތާނުގެ ތާލިބާން ސަރުކާރުން މުހިއްމު ދައުރެއް އަދާކުރި ކަމަށެވެ.
