މާލޭ މިސްކިތަކަށް ވަދެ ހަތިމަކަށް ކުޅު ޖެހި މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.
މި މައްސަލައިގައި ހައްޔަރުކޮށްފައިވަނީ މީގެ ކުރިން މިސްކިތަކަށް ކުޑަކަމު ދިޔަ މައްސަލައިގައި މ. ޝޭޑީހޯމް، ހަސަން ޒިޔާދު، 40، ކަމަށް ވެއެވެ.
މީގެ މަހެއްހާ ދުވަސް ކުރިން، ޒިޔާދު ވަނީ މަޣްރިބް ނަމާދު ވަގުތު އިސްލާމީ މަރުކަޒަށް އަރާ އެ މިސްކިތުގެ ތެރެއަށް ކުޑަކަމު ގޮސްފަ އެވެ. މީގެ އިތުރުން އޭނާ ވަނީ ހުކުރު މިސްކިތުގެ ތެރެޔަށާއި ރައީސް އޮފީހުގެ ގޭޓު ކުރިމައްޗަށް ވެސް ކުޑަކަމު ގޮސްފަ އެވެ.
ފުލުހުން ބުނީ މާލޭގެ އިބްރާހީމް މިސްކިތަށް އަރައި ހަތިމަކަށް ކުޅު ޖެހި މައްސަލައެއްގައި 40 އަހަރުގެ މީހަކު ހަވީރުު ހައްޔަރު ކޮށްފައިވާ ކަމަށެވެ. އެ މައްސަލަ އިތުރަށް ތަހުގީގުކުރަމުން އަންނަ ނަމަވެސް އެކަމާ ގުޅޭ އިތުރު ތަފްސީލެއް ފުލުހުން ހާމައެއް ނުކުރެ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި މިސްކިތަށް އަރާ ހަތިމަކަށް ކުޅު ޖެހުމުން، އެވަގުތު މިސްކިތުގައި ތިބި މީހުން ވަނީ އޭނާ ފުލުހުންނާ ހަވާލު ކޮށްފަ އެވެ. އޭނާ ހައްޔަރުކޮށްގެން ފުލުހުން ގެންދިޔައިރު، އޭނާ ގާތު ހަތިމަށް ކުޅުޖެހިތޯ މީހަކު ސުވާލު ކުރުމުން، އޭނާ ވަނީ ހަތިމަށް ކުޅު ޖެހިކަމަށް އެއްބަސްވެފަ އެވެ.
މިސްކިތަށް އަރާ ހަތިމަކަށް ކުޅުޖަހައިގެން ހައްޔަރު ކުރީ މިސްކިތްތަކަށް އަރާ ކުޑަކަމުދިޔަ މައްސަލާގައި މީގެ ކުރީން ހައްޔަރު ކުރި މީހާ ކަމަށް ވެއެވެ.
ހަތިމަކަށް ކުޅު ޖަހައިގެން މިއަދު ޒިޔާދު ހައްޔަރުކޮށްފައިވާއިރު ޖެންޑާ މިނިސްޓްރީން މީގެ ކުރިން ބުނެފައި ވަނީ އޭނާގެ ހާލަތު ބަލައި އެހީތެރިކަން ފޯރުކޮށްދެމުންދާ ކަމަށެވެ. އެގޮތުން އެ ފިރިހެން މީހާގެ އާއިލާ އާ ގުޅިގެން އޭނާ ހޮސްޕިޓަލަށް ދެއްކުމުގެ މަސައްކަތް މިހާރު ކުރިއަށްދާ ކަމަށް ޖެންޑާއިން ވަނީ ބުނެފަ އެވެ. އެއީ އޭނަގެ ނަފްސާނީ މައްސަލައެއް ހުރިތޯ ބެލުމަށެވެ.
އެ މައްސަލާގައި މިހާރު ވަނީ ތަހުގީގު ނިންމައި ދައުވާކުރަން ވެސް ފޮނުވައިފަ އެވެ.
