ދ. ކުޑަހުވަދޫގައި ހުރި 200 އެއްހާ ރުއް، އެ ރަށުން ވަގަށް ބާލަން އުޅުނު މައްސަލައެއް ފަޅާއަރައި، ރަށު ކައުންސިލާއި ރައްޔިތުން ނިކުމެ ހުކުރު ދުވަހު އެކަން ހުއްޓުވައިފި އެވެ.
ކުޑަހުވަދޫގައި ޖުވެނައިލް ރެސިޑެންސް ސެންޓަރެއް އެޅުމަށް ހޯމް މިނިސްޓްރީއަށް ދޫކޮށްފައިވާ ބިމުގައި ހުރި 195 ރުއް ނެގުމުގެ ހުއްދަ އެ ރަށު ކައުންސިލަށް ތިމާވެށި ރައްކާތެރި ކުރުމާ ބެހޭ އެޖެންސީން އޮތީ ދީފަ އެވެ. އެކަމަކު އަންގާފައި އޮތީ ރުއްތައް ރަށުގެ އެހެން ސަރަހައްދެއްގައި އަލުން އިންދުމަށެވެ.
އެންވަރަމަންޓް ޕްރޮޓެކްޝަން އެޖެންސީގެ އެންގުމާ ހިލާފަށް އަދި ރަށު ރައްޔިތުންނަށް ވެސް ސިއްރުން އެ ރުއްތައް ކުޑަހުވަދޫއިން ބާލަން އުޅުނީ އެންމެ ކައުންސިލަރެއްގެ ނިންމުމެއްގެ މައްޗަށް ބިނާކޮށް ކަމަށް އެ ރަށުން ވާހަކަ ދެއްކި މީހަކު ބުންޏެވެ. އަދި ރުއްތައް ބާލަން އުޅުނުކަން ކައުންސިލްގެ އެހެން މެމްބަރުންނަށް އެނގުނީ ލޮރީތަކަކަށް އަރުވައިގެން ރުއްތައް ބާލަން އުޅުނު މަންޒަރު ފެނުމުން ކަމަށް ވެސް އޭނާ ބުންޏެވެ.
"ރުއް ނަގާފަ ރިލޮކޭޓު ކުރަން އިންދާނެ ތަނެއް ނެތް ކަމަށް ބުނެ ރުއްތައް ބާލަން އުޅުނީ. 195 ރުއް ބަދަލު ކުރާ ގޮތަށް ނިންމިއިރު، މީހަކު ގަބޫލެއް ނުކުރާނެ ކުޑަހުވަދޫގަ ބިން ނެތް ކަމަކަށް. ސެޓްލައިޓް ފޮޓޯއަށް ބަލާލީމަ ވެސް އެނގޭނެ އެކަން. އަލަށް ހިއްކާފަ އެބަ އޮތް 40 ހެކްޓަރުގެ ބިން. އަދިވެސް ބޭނުން ނުކޮށް އެބަ އޮތް 20 ހެކްޓަރުގެ ބިން،" އަދާ ކުރާ ވަަޒީފާގެ ގޮތުން ނޫހުގައި ނަން ނުޖެހުމަށް އެދި އޭނާ ބުންޏެވެ.
އެކަމާ ގުޅިގެން އީޕީގެ ޑިރެކްޓަރު ޖެނެރަލް އިބްރާހިމް ނައީމް ވިދާޅުވީ އެ އިދާރާގެ އެންގުމާ ހިލާފަށް ރުއްތައް ނެގުމުގެ އިތުރުން އެ މަސައްކަތް ކުރަމުންދިޔައީ އެކަމަށް ހުއްދަ ދިން ފަރާތުން ނޫން ކަމަށެވެ. އެހެންވެ، އެ މަސައްކަތް މިހާރު ހުއްޓުވާފައިވާނެ ކަމަށް ނައީމް ވިދާޅުވި އެވެ.
"ކުރިން ހުއްދަ ދީފަ އޮންނާނީ ރަށުން ނަގާ ރުއްގަސް ރަށުގެ އެހެން ތަނެއްގަ އިންދުމަށް. ރަށުން ބޭރުކުރާކަށް ހުއްދައެއް ނުދޭ. އެ ހުއްދަ ދީފަ އޮތީ ވެސް އެހެން ފަރާތަކަށް. މިހާރު ރުއް ނެގުމުގެ މަސައްކަތް ކުރަމުންދާ މީހުންނަކަށް ނޫން،" ނައީމް ވިދާޅުވި އެވެ.
މި މައްސަލައިގައި ކައުންސިލްގެ އެއްވެސް މެމްބަރެއްގެ ކޮމެންޓު މި ނޫހަށް ލިބޭ ގޮތް ވަނީ ނުވެފަ އެވެ.
