ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅުމަށްޓަކައި ހަތަރު ބިލެއް އެކުލަވާލައި އެޓާނީ ބަންޑާރަ ނައިބުގެ އޮފީހުން ރައީސް އޮފީހަށް ފޮނުވައިފި އެވެ.
އޭޖީ އޮފީހުން މިއަދު ބުނީ ސަރުކާރުގެ ފަރާތުން މަޖިލީހަށް ހުށަހަޅާ ހަތަރު ބިލެއް އެކުލަވާލައި ރައީސް އޮފީހަށް މިއަދު ފޮނުވިފައިވާ ކަމަށެވެ.
ރައީސް އޮފީހަށް ފޮނުވި ހަތަރު ބިލު
- ނެތިދިޔުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރިކުރުމުގެ ބިލު.
- ފެނާއި ނަރުދަމާގެ ގާނޫނަށް އިިސަލާހުގެނައުމުގެ ބިލު.
- ކޯޓުތަކުގެ ގާނޫނަށް އިިސްލާހުގެނައުމުގެ ބިލު.
- ފަނޑިޔާރުންގެ ގާނޫނަށް އިިސްލާހުގެނައުމުގެ ބިލު.
މި ހަތަރު ބިލު އެކުލަވާލާފައިވަނީ ރައްޔިތުންގެ މަޖިލީހުގެ މި ހިނގާ ތިންވަނަ ދައުރަށް ސަރުކާރުގެ ފަރާތުން ހުށަހަޅަން ނިންމި ބިލުތަކުގެ ތެރެއިން ގިނަ ބިލުތައް ނުލިބޭތީ ތަޅުމުގައި މެމްބަރުން ކުރާނެ މަސައްކަތެއް ނެތް ކަމުގެ ޝަކުވާ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ކުރައްވާފައިވަނިކޮށެވެ.
ބަންޑާރަނައިބުގެ އޮފީހުން އާންމުކޮށްފައިވާ މައުލޫމާތަށް ބަލާއިރު، މިދިޔަ އޯގަސްޓު 16، ގައި ފެށި މަޖިލީހުގެ ތިން ވަނަ ދައުރަށް އެކި ދާއިރާތަކުން ޖުމްލަ 32 ބިލެއް ހުށަހަޅަން ނިންމައި ލިސްޓެއް އާންމުކުރި އެވެ.
އޭގެ ތެރޭގައި، ގާނޫނީ އަދި ޝަރުއީ ދާއިރާއާ ގުޅުންހުރި ބިލުތަކާއި ދީނީ އަދި އިޖްތިމާއީ ދާއިރާއާގުޅޭ ބިލުތަކާއި އިގުތިސާދީ އަދި ތިމާވެށީގެ ދާއިރާއާ ގުޅޭ ބިލުތައް ހިމެނެ އެވެ.
ނަމަވެސް، ނަޝީދު ވިދާޅުވެފައި ވަނީ މި ދައުރަށް ސަރުކާރުގެ ފަރާތުން ހުށަހަޅަން ނިންމާފައިވާ ބިލުތަކުގެ ތެރެއިން އަދި މިހާތަނަށް ހުށަހަޅާފައިވަނީ އެންމެ ހަތަރު ބިލު ކަމަށެވެ.
ނަޝީދު އެހެން ވިދާޅުވިއިރު، މީގެ ކުރީގެ ދައުރުތަކުން ވާރުތަކޮށް، މަޖިލީހަށް ނުނިންމި ގިނަ ބިލުތަކެއް އެބަހުއްޓެވެ.
އެކަން ބައެއް ފަރާތްތަކުން ފާހަގަކުރަން ފެށުމުން، ނަޝީދު ވިދާޅުވީ އާ ބިލުތައް ނުލިބޭ ކަމަށް ވިދާޅުވުމުން، ސަރުކާރުން ބިލުތައް ހުށަހެޅުން ލަސްވެގެން މަޖިލީހުގެ ގާނޫނީ މަސައްކަތް ނުކުރެވޭ ކަމުގެ މަންޒަރެއް އެމަނިކުފާނަށް ސިފަވެވަޑައިގެންނެވި ކަމަށެވެ.
ނަމަވެސް، އާ ބިލު ލިބުމުގައި ލަސްތަކެއް ހުރި ނަމަވެސް، މިހާރު ވެސް ކޮމިޓީތަކުގައި ޖުމްލަ 33 ބިލެއް ހުރިކަން ނަޝީދު ވެސް ފާހަގަކުރެއްވި އެވެ.
ނަޝީދު ވިދާޅުވި ގޮތުގައި ތަޅުމުގެ މަސައްކަތް މަދުވި ނަމަވެސް، ކޮމިޓީތަކުގެ މަސައްކަތް އިތުރުކޮށް ބިލުތައް އަވަހަށް ނިންމަންޖެހެ އެވެ.
"ހުއްޓިފައި ހުރި ބައެއް މަސައްކަތް، އަޅުގަނޑުމެންގެ ތެރޭގައި މަޝްވަރާ ކުރުމަށްފަހު އެ ގެންދާނެ ގޮތެއް ކަނޑައަޅާފައި އެ ގެންގޮސް ނިންމާލުން [މުހިންމީ]،" އެމަނިކުފާނު ވިދާޅުވި އެވެ.
އާ ބިލުތަކެއް ފޮނުވަން ސަރުކާރުން ތައްޔާރުވަމުން އައި ނަމަވެސް، އަންނަ އަހަރަށް ލަފާކޮށް ސަރުކާރުން ވަނީ ދައުލަތުގެ ބަޖެޓު މިހާރު މަޖިލީހަށް ހުށަހަޅައިފަ އެވެ.
އެގޮތުން ބަޖެޓު ބަހުސް އަންނަ ހޯމަ ދުވަހު ފަށަން ތާވަލުކޮށްފައިވާއިރު، މިދައުރުގެ ދެން ބާކީ އޮތް މުއްދަތުގައި މަޖިލީހުގެ މަސައްކަތުގެ މައިގަނޑު އަމާޒަކަށް ވާނީ ބަޖެޓު ފާސްކުރުމެވެ.
