ރާއްޖޭގެ ސްކޫލްތަކުގައި މަސައްކަތްކުރާ ޓީޗަރުންނާއި ދަރިވަރުންނާ ބައްދަލުވާ ސްކޫލްގެ އެހެން މުވައްޒަފުންނަށް ވެސް ލައިސެންސެއް ދޫކުރުމުގެ ނިޒާމެއް ގާއިމުކުރުމުގެ މަސައްކަތް ކުރަމުންދާ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ މިއަދު ވިދާޅުވެއްޖެ އެވެ.
ސްކޫލުތަކުގައި މަސައްކަތް ކުރާ ޓީޗަރުން ނޫން މުވައްޒަފުންނަށް ލައިސެންސެއް ދިނުމުގެ ވާހަކަ މިނިސްޓަރު ވިދާޅުވީ، ގަލޮޅު ސްކޫލުގައި ހަތަރު އަހަރުގެ ކުޑަ ކުއްޖަކަށް އެ ސްކޫލު ސާފު ކުރުމުގެ މަސައްކަތް ކުރާ މުވައްޒަފަކު ޖިންސީ އަނިޔާ ކުރި މައްސަލައިގައި ރައްޔިތުންގެ މަޖިލީހުގެ މިއަދުގެ ޖަލްސާގައި ސުވާލު ކުރުމުންނެވެ.
މަޖިލީހުގެ މިއަދުގެ ޖަލްސާގައި މިނިސްޓަރާ އިތުރަށް ސުވާލުކުރަން ލިބުނު ފުރުސަތުގައި ހިންނަވަރު ދާއިރާގެ މެމްބަރު ޖީހާން މަހްމޫދު ވަނީ ގަލޮޅު ސްކޫލްގައި ދިމާވި ހާދިސާ ތަކުރާރުވިޔަ ނުދިނުމަށް މިނިސްޓްރީން އަޅާފައިވާ ފިޔަވަޅުތަކާ ގުޅޭގޮތުން ސުވާލު ކުރައްވައިފަ އެވެ.
އެ ސުވާލަށް ޖަވާބު ދެއްވަމުން އައިޝަތު އަލީ ވިދާޅުވީ އެފަދަ ހާދިސާތަކަކީ ވަރަށް ސީރިއަސް މައްސަލައެއް ގޮތުގައި އަބަދުވެސް މިނިސްޓްރީން ބަލާ މައްސަލަތަކެއް ކަމަށާއި، އެ ހާދިސާ ރިޕޯޓު ކުރެވުމާއެކު ފުލުހުންނާއި ޖެންޑާ މިނިސްޓްރީއަށް އަންގައި، އެކަމުގައި އިހުމާލުވި ކަމަށް ތުހުމަތުކުރެވުނު ހުރިހާ ފަރާތްތައް ވަގުތުން ސަސްޕެންޑް ކުރެވިފައިވާ ކަމަށެވެ.
އޭގެ އިތުރުން ވެސް، އެ ސްކޫލްގައި އިތުރު ސީސީޓީވީ ކެމެރާތައް ހަރުކުރުމުގެ އިތުރުން، މިފަދަ ކަންކަމަށް ޓީޗަރުން އިތުރަށް ސަމާލުވުމަށް ހުރިހާ ސްކޫލްތަކަށް އަންގާފައިވާކަމަށް މިނިސްޓަރު ހާމަކުރެއްވި އެވެ.
އޭނާ ވިދާޅުވީ ސްކޫލްތަކުގައި ހިނގާ މިފަދަ ހާދިސާތައް ހުއްޓުވަން ގިނަ ފިޔަވަޅުތަކެއް އެޅިފައިވާ ކަމަށާއި އިތުރު ފިޔަވަޅުތައް އަޅައި ކަންކަން ތަރުތީބުކުރުމުގެ މަސައްކަތް ކުރަމުންދާކަމުގެ ޔަގީންކަން ހުރިހާ ބެލެނިވެރިންނަށް ދެއްވާ ކަމަށެވެ.
އެގޮތުން، މި ސަރުކާރު އައި ފަހުން ވެސް ސްކޫލްތަކުގައި ހިނގި 40 އެއްހާ ހާދިސާއެއް ތަހުގީގުކޮށް، އެކަމުގައި ޝާމިލުވި 30 މުވައްޒަފުން ވަޒީފާއިން ވަކިކުރެވިފައިވާ ކަމަށް މިނިސްޓަރު މިއަދު ހާމަކުރެއްވި އެވެ.
މިފަދަ ހާދިސާތައް ތަކުރާރުވިޔަ ނުދިނުމަށް އެންމެ މުހިންމު އެއް މަސައްކަތެއްގެ ގޮތުގައި މިހާރު ކުރެވެމުންދަނީ ޓީޗަރުންނަށް މިހާރު ދޫކުރާ ލައިސެންސް ފަދަ ލައިސެންސެއް ސްކޫލްތަކުގައި ހާއްސަކޮށް ދަރިވަރުންނާ ސީދާ ބައްދަލުވާ ހުރިހާ މުވައްޒަފުންނަށް ވެސް ދޫކުރާ ނިޒާމެއް ގާއިމުކުރުން ކަމަށް އޭނާ ވިދާޅުވި އެވެ.
"މިފަދަ ނިޒާމެއް ގާއިމުކުރެވެމުން ދަރިވަރުންނާ ބައްދަލުވާ ހުރިހާ މުވައްޒަފުން ސްކްރީންކުރުން ފަދަ ކަންކަން އިތުރަށް ހަރުދަނާ ވެގެންދާނެ،" އައިޝަތު އަލީ ވިދާޅުވި އެވެ.
މިދިޔަ އަހަރު ތައާރަފް ކުރި މަތީ ތައުލީމުގެ ގާނޫނުގެ ދަށުން ޓީޗަރުންނަށް ސްކޫލްތަކުގައި މިހާރު ވެސް މަސައްކަތް ކުރެވޭނީ އެޑިއުކޭޝަން މިނިސްޓްރީގައި ރަޖިސްޓްރީ ކުރުމަށްފަހު، އެ އޮފީހުން ދޫކުރާ ހާއްސަ ލައިސެންސެއް ލިބިގެންނެވެ.
ގަލޮޅު ސްކޫލްގެ ހާދިސާ
ގަލޮޅު ސްކޫލުގައި ކިޔަވަމުންދާ އުމުރުން ހަތަރު އަހަރުގެ ކުޑަ އަންހެން ކުއްޖަކަށް ޖިންސީ ގޯނާކުރިކަމުގެ ތުހުމަތުގައި 63 އަހަރުގެ ދިވެހި އަންހެނަކު ރޭ ވަނީ ހައްޔަރުކޮށްފަ އެވެ.
މިހާތަނަށް އެނގިފައިވާ ގޮތުގައި މި މައްސަލައިގައި ތުހުމަތުވާ އަންހެން މީހާއަކީ ސްކޫލު ސާފު ކުރުމާއި ދަރިވަރުން ފާހާނައަށް ދިޔުމަށް އެހީވުމުގެ ޒިންމާ އޮންނަ މަސައްކަތު މީހެކެވެ.
މި މައްސަލައިގައި އެ ސްކޫލުގެ ހުރިހާ މަސައްކަތު މުވައްޒަފުން ތިބީ ހުކުރު ދުވަހުން ފެށިގެން ސަސްޕެންޑުކޮށްފަ އެވެ.
"ހުކުރު ދުވަހުން ފެށިގެން މި ސްކޫލުގައި މަސައްކަތް ކުރާ ހުރިހާ މަސައްކަތު މީހުން [ދައްތަމެން] ވާނީ ވަޒީފާގެ މަސްއޫލިއްޔަތުތަކުން އެކަހެރިކުރެވިފަ،" ގަލޮޅު މަދަރުސާއިން ނެރުނު ބަޔާނެއްގައި ބުނެފައިވެ އެވެ.
އޭގެ އިތުރުން މައްސަލައިގައި އަމާޒުވެފައިވާ ފާޑުކިޔުންތަކާ ގުޅިގެން ގަލޮޅު މަދަރުސާއިން ވަނީ ޓީޗަރުގެ ބެލުމުގެ ދަށުން ދަރިވަރުން ފާހާނާއަށް ދާގޮތަށް ހަމަޖައްސާފަ އެވެ. އަދި ދަރިވަރުންގެ ސަލާމަތަށްޓަކައި ސްކޫލުގެ 18 ދިމާލެއްގައި ސީސީޓީވީ ކެމެރާ ހަރުކޮށް ވަނީ ނިންމައިފަ އެވެ.
މި މައްސަލަ "ސީރިއަސް" މައްސަލައެއްގެ ގޮތުގައި ބަލަމުން އަންނަ ކަމަށް އެޑިޔުކޭޝަނުން ބުނެ އެވެ. މައުލޫމާތު ލިބޭ ގޮތުގައި އެޑިޔުކޭޝަނުން ވަނީ މިކަމުގައި އިހުމާލުވި ޓީޗަރަށް ފިޔަވަޅުއަޅަން އަންގާފަ އެވެ.
ރައްޔިތުންގެ މަޖިލިހުގެ ޖެންޑާ ކޮމިޓީން ވެސް ދަނީ މި މައްސަލަ ބަލަމުންނެވެ.
