ރޯމް (ނޮވެމްބަރު 1) - ތަޖުރިބާކާރު ފޯވަޑް ޒްލަޓާން އިބްރަހިމޮވިޗްގެ ލީގު ކެރިއަރުގައި ޖެހި 400 ވަނަ ލަނޑާ އެކު، އިޓާލިއަން ލީގުގައި ރޭ އޭއެސް ރޯމާ އަތުން 2-1 އިން އޭސީ މިލާން މޮޅުވެއްޖެ އެވެ.
މި މޮޅާއެކު، މިލާނުން ވަނީ ތާވަލްގެ އެއް ވަނައިގައި އޮތް ނަޕޯލީއާ ޕޮއިންޓްގެ ގޮތުން އެއްވަރުކޮށްފަ އެވެ. އިޓާލިއަން ލީގުގައި ރޭ ސާލެނިޓާނާ އަތުން 1-0 އިން ނަޕޯލީ ވަނީ މޮޅުވެފަ އެވެ. ނަޕޯލީ އާއި މިލާން ވެސް ވަނީ 31 ޕޮއިންޓް ހޯދައިފަ އެވެ.
ތާވަލްގެ ތިން ވަނައިގައި 24 ޕޮއިންޓާ އެކު އެންމެ ފަހުގެ ޗެމްޕިއަން އިންޓަ މިލާން އޮތްއިރު، ހަތަރު ވަނައިގައި ރޯމާ އޮތީ 19 ޕޮއިންޓް ހޯދައިގެންނެވެ.
ރޯމާގެ ދަނޑުގައި ރޭ ކުޅުނު މެޗުގެ 25 ވަނަ މިނިޓުގައި މިލާނަށް ލީޑު ހޯދައިދިނީ އިބްރަހިމޮވިޗެވެ. މި ލަނޑު އިބްރަހިމޮވިޗް ކާމިޔާބުކުރީ ހިލޭ ޖެހުމަކުންނެވެ.
މެޗުގެ 57 ވަނަ މިނިޓުގައި މިލާންގެ ދެވަނަ ލަނޑު ފްރޭންކް ކެސިއޭ ކާމިޔާބުކުރީ އެ ޓީމަށް ލިބުނު ޕެނަލްޓީއަކުންނެވެ. މިލާނަށް ޕެނަލްޓީއެއް ލިބުނީ އިބްރަހިމޮވިޗަށް ރޯމާގެ ރޯޖާ އިބަނިއޭޒް ކުރި ފައުލަކާ ގުޅިގެންނެވެ.
ދެވަނަ ރީނދޫ ކާޑަކާ އެކު، މެޗުގެ 66 ވަނަ މިނިޓުގައި މިލާންގެ ތިއޯ ހެނާންޑޭޒަށް ރަތްކާޑު ދެއްކުމުން މިލާން 10 ކުޅުންތެރިންނަށް މަދުވެފައި ވަނިކޮށް، ރޯމާގެ ފޯވަޑް ސްޓެފާން އަލް ޝަރާވީ ވަނީ މެޗުގެ އިތުރު ވަގުތުގައި އޭނާގެ ކުރީގެ ކްލަބު ކޮޅަށް ލަނޑު ޖަހައިފަ އެވެ.
މިއީ ރޯމާގެ ކޯޗު ހޯސޭ މޮރީނިއޯގެ ކޯޗިން ކެރިއަރުގައި، އިޓާލިއަން ލީގުގެ މެޗަކުން އަމިއްލަ ދަނޑުގައި ބަލިވި ފުރަތަމަ ފަހަރެވެ.
މެޗުގެ ރެފްރީއާ މެދު ހިތްހަމަނުޖެހިފައި ހުރި މޮޮރީނިއޯ ރޭގެ މެޗަށް ފަހު އޮތް ނޫސްވެރިންގެ ބައްދަލުވުމުގައި ނޫސްވެރިންގެ ސުވާލުތަކަށް ޖަވާބެއް ނުދެ އެވެ. އެއީ ރެފްރީންނާ ބެހޭ ގޮތުން އޭނާ އަށް އެއްޗެއް ބުނެވޭ އެއްޗަކުން، ސަސްޕެންޝަނެއް އަތުވެދާނެތީ އެވެ. -- ބީބީސީ
