އިސްލާމީ ޝަރީއަތް ނުކިޔަވާ ތިބި، ދީނުގެ އިލްމު އުނގެނިފައި ނެތް މީހުންނަށް ދީނީ ހުކުމްތައް ނެރުމުގެ ހައްގެއް ނޯންނާނެ ކަމަށް ވިދާޅުވެ ޖަމިއްޔަތުއް ސަލަފުން މާލޭގައި ބޭއްވި ޖަލްސާއެއްގައި ސުޕްރީމް ކޯޓުން ކުރި ދާދިފަހުން ޒިނޭގެ މައްސަލައެއްގައި ހުކުމް ކުރެއްވި ފަނޑިޔާރުންނަށް ވަރަށް ބޮޑަށް ފާޑުކިޔައިފި އެވެ.
ޑީއެންއޭ ފަދަ ހެކިތަކަކީ ޒިނޭގެ މައްސަލަތަކުގައި އިތުރު ގަރީނާތައް ހުރިނަމަ ކުށް ސާބިތު ކުރުމަށް ބޭނުންކުރެވިދާނެ ވަސީލަތެއް ކަމަށް ސުޕްރީމް ކޯޓުން މިދިޔަ އާދީއްތަ ދުވަހު ހުކުމް ކުރެއްވި ފަނޑިޔާރުންނަށް އެ ޖަލްސާގައި ވަރަށް ބޮޑަށް ފާޑުވިދާޅުވި ނަމަވެސް އެބޭފުޅުންގެ ނަން އަދި ކޯޓުގެ ނަމެއް ވެސް ބޭނުންކޮށްފައެއް ނުވެ އެވެ.
"މަގޭ ދީން" ގެ ނަމުގައި ކާނިވާ ސަރަހައްދުގައި ބޭއްވި އެ ޖަލްސާގައި ވާހަކަ ދައްކަވަމުން ސަލަފުގެ އިލްމުވެރިންގެ މަޖިލީހުގެ ރައީސް ޝެއިހް އަހުމަދު ސަމީރު ވިދާޅުވީ، ދީނުގެ އިލްމު ނޭނގޭ ބަޔަކު ދީނުގެ ހައްދުތައް ކުޅޭ ކުޅިވަރަކަށް ރާއްޖޭގައި ހަދާފައިވާ ކަމަށެވެ.
"އިސްލާމްދީނުގެ ޖިނާއީ އަދުލުގެ ނިޒާމު އެއްކޮށް ފުނޑާލައި، ދީނުގެ ހައްދުތަކަކީ ކުޅިވަރާއި މަޖަލާއި ސަކަރާތެއްކަމުގައި ހަދައިގެން އުޅޭ ބަޔަކު އަޅުގަނޑުމެން ތެރޭގައި އެބަ އުޅޭ. އެމީހުން ވެސް ކިޔަނީ އިސްލާމް ދީނުގެ މަގުސަދުގެ ވާހަކަ. އެމީހުންނަށް ކޮން ހައްގެއްތަ އޮތީ އިސްލާމްދީނުގެ މަގުސަދުގެ ވާހަކަ ދައްކަން؟،" ސަމީރު ސުވާލު އުފެއްދެވި އެވެ.
އަރަބި ބަސް ނޭނގޭ މީހުން އިސްލާމް ދީނާ ގުޅޭ ގޮތުން ވާހަކަ ދެއްކުން ރަނގަޅު ނޫން ކަމަށް ވެސް ސަމީރު އެއްޗެއް ވިދާޅުވި އެވެ.
"އެދީނުގެ ފޮތް އޮތް ބަހުރުވައެއް އެދީނުގެ ގުރުއާން، އެ ގުރުއާނުގެ ތަފްސީރެއް އޭގެ އުސޫލެއް ހަމައެއް ހަދީސެއް ސައްހައެއް ނުސައްހައެއް އިލްމުވެރިންގެ ބަސްތަކެއް ކިޔޭނެ ބަހުރުވައެއް ނުދަންނަ ބަޔަކު އިސްލާމްދީނުގެ ކައްޗަށާއި ދިގަށް ހުރަހަށް ވާހަކަ ދައްކަން ފެށީމަ އަމިއްލަ މީހުންނަށް އެބަ އެނގެން ޖެހޭ މިއީ ތިމާމެންގެ ދާއިރާއެއް ނޫންކަން،" ޝޭހް ސަމީރު ވިދާޅުވި އެވެ.
މިރޭގެ ޖަލްސާ އަޑުއަހުން ދިޔަ ބައެއް މީހުން: ވަރަށް ގިނަ ބަޔަކު ޖަލްސާ އަޑުއަހަން ކާނިވާ ސަރަހައްދަށް ދިޔަ -- ފޮޓޯ: ހުސެއިން ސަޔާހު/އަދަދު
ދީން އޮޅުވާލާ ބަޔަކު، މީހުން ދީނީ ބޮޑެތި އިލްމުވެރިންނަށް ހެދިގެން އިސްލާމް ދީން އެފުށްމިފުށަށް ޖަހަމުންދާ ކަމަށް ސަމީރު ތުހުމަތު ކުރެއްވި އެވެ.
"ބޮޑު މުޖުތަހިދަކަށްވެގެން ހުކުމްތަކާ އެއްޗިހި ނެރެ، ދީނުގެ އުސޫލުތައް ކައްޗާއި ދިގަށް އެފުށްމިފުށަށް ޖަހާ އަނބުރާ، ހަމަ އޭނާ ވެސް މި ކިޔަނީ އިސްލާމްދީން، އިސްލާމް ދީނަކީ ނުލާހިކު ލުއިފަސޭހަ ދީނެކޭ،" ސަމީރު ވިދާޅުވި އެވެ.
އިސްލާމީ ޝަރީއަތާއި އަރަބި ބަސް ނުކިޔާ މީހަކަށް "ޝަރީއަތުގެ ސިއްރުތައް" ނޭނގޭނެ ކަމަށް ވެސް ސަމީރު ވިދާޅުވި އެވެ.
"އެ ޝަރީއަތުގެ މަގާސިދުތަކެއް އެ ޝަރީއަތުގެ ނައްސުތައް ނުކިޔަވާ މީހަކަށް ނޭނގޭނެ. އެ ޝަރީއަތުގެ ސިއްރުތައް ނުދަންނަ މީހަކަށް އެ ޝަރީއަތުގެ މަގުސަދުތައް ހޯދާކަށް ނޭނގޭނެ. އަދި އެ ޝަރީއަތުގެ މަގުސަދުތައް ހާސިލުކުރަން ޝަރުއީ ނައްސުތަކުން ހުކުމްތައް އިސްތިންބާތުކުރާކަށެއް ނޭނގޭނެ އެ ޝަރީއަތް ދިރާސާ ނުކޮށެއް. އެ ޝަރީއަތް އޮތް ބަހުރުވަ ނޭނގޭ މީހަކަށް އެ ޝަރީއަތުގެ ސިއްރުތަކެއް ނޭނގޭނެ،" ޝޭހް ސަމީރު ވިދާޅުވި އެވެ.
ޝޭހް ސަމީރު އެ މޭރުމުން ވާހަކަ ދެއްކެވި ނަމަވެސް އެ ހުކުމް ކުރެއްވި ތިން ފަނޑިޔާރުންގެ ތެރެއިން ރިޔާސަތުގައި އިންނެވި އަދި ހުކުމް ނެރުއްވި ފަނޑިޔާރު ހުސްނުއްސުއޫދަކީ އިސްލާމީ ޝަރީއަތާއި ގާނޫނީ ދާއިރާއިން ދުނިޔޭގެ އެންމެ ފުންނާބުއުސް އެއް ޔުނިވާސިޓީކަމުގައިވާ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން ތައުލީމް ހާސިލުކުރައްވައިގެން ހުންނެވި ބޭފުޅެކެވެ.
އެކަމަކު އެ ހުކުމަށް ތާއީދު ކުރެއްވި ދެ ފަނޑިޔާރުން ކަމަށްވާ ޑރ. އަޒްމިރަލްދާ ޒާހިރާއި އާއިޝާ ސުޖޫން މުހައްމަދަކީ ޝަރީއާ ކިޔަވައިގެން ތިއްބެވި ފަނޑިޔާރުން ކަމަށް ސުޕްރީމް ކޯޓުގެ ވެބްސައިޓުގައި ބުނަފައެއް ނުވެ އެވެ.
