މާލޭ ސްކޫލެއްގައި ކިޔަވައިދެމުންދިޔަ ޓީޗަރަކު ދަރިވަރުންތަކަކަށް ޖިންސީ ގޯނާ ކުރި މައްސަލައެއް ފުލުހުން ބަލަން ފަށައިފި އެވެ.
މައުލޫމާތު ލިބިފައިވާ ގޮތުގައި އެ ޓީޗަރަކީ އަމީނިއްޔާ ސްކޫލުގައި ކިޔަވައިދެމުންދިޔަ ޓީޗަރެކެވެ.
ފުލުހުންގެ މީޑިއާ އޮފިޝަލް "އަދަދު"އަށް ވިދާޅުވީ މާލޭ ސްކޫލެއްގެ ޓީޗަރަކު އެ ސްކޫލުގައި ކިޔަވަމުންދިޔަ ދަރިވަރުންތަކަކަށް ޖިންސީ ގޯނާ ކުރި މައްސަލައެއް މި މަހުގެ 19 ވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ.
އެ މައްސަލަ ފުލުހުން ބަލަމުންދާއިރު، ގއ. ކޮލަމާފުށީގައި ކިޔަވަމުންދިޔަ ބިދޭސީ ޓީޗަރެއްގެ މައްސަލަވެސް ވަނީ މިދިޔަ މަހު ފެންމަތިވެފަ އެވެ.
އެ މައްސަލައާ ގުޅިގެން އޭނާ ވަނީ ސަސްޕެންޑްވެސް ކޮށްފަ އެވެ.
މީގެ އިތުރުން މިދިޔަ ޖޫން މަހު ނ. ޅޮހީ ސްކޫލުގެ އަންހެން ޓީޗަރަކު އެ ސްކޫލްގެ ދަރިވަރަކާ ދެމެދު ބަދުއަހުލާގީ ކަންތައްތަކެއް ހިނގި ކަމަށް ތުހުމަތު ކުރެވޭ މައްސަލައެއްގައި އެ ޓީޗަރު ވެސް ސަސްޕެންޑް ކޮށްފައިވެ އެވެ.
