ކޮވިޑް-19 ގެ އެންމެ ނުރައްކާތެރި ހާލަތަށް ދުރާލައި ރައްކާތެރިވުމަށް، ވެންޓިލޭޓަރު މެޝިނުތަކެއް ގަތުމަށް ސަރުކާރުން ހަރަދު ކުރި 30 މިލިއަން ރުފިޔާ ގެއްލުނު މައްސަލައިގެ ތަހުގީގު އަލުން ހިންގައި އެ މައްސަލައިގައި ދައުވާކުރަން ދެވަނަ ފަހަރަށް ފޮނުވުމާ މެދު މި މަސް ނިމުމުގެ ކުރިން ގޮތެއް ނިންމާނެ ކަމަށް އެންޓިކޮރަޕްޝަން ކޮމިޝަން (އޭސީސީ) އިން ބުނެފި އެވެ.
ވެންޓިލޭޓަރުތަކުގެ މައްސަލައިގައި އޭސީސީ އިން މައްސަލަ ތަހުގީގުކޮށް ދައުވާ ކުރަން އެދިފައި ވަނީ އޭރުގެ ހެލްތު މިނިސްޓަރު އަބްދުﷲ އަމީނާއި އޭނާގެ 10 މުވައްޒަފެއްގެ މައްޗަށެވެ.
އެކަމަކު އެ މައްސަލައަކީ ކަންހިނގާފައިވާ ގޮތަށް ބަލާއިރު ޖިނާއީ ކުށެއްގެ އުންސުރުތައް ހަމަވާ މައްސަލައެއް ކަމަށް ނުފެންނާތީ އެ މައްސަލައިގައި ޕްރޮސިކިއުޓަރ ޖެނެރަލްގެ އޮފީހުން ނިންމެވީ ދައުވާ ކުރެވެން ނެތް ކަމަށެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ މިއަދު ބޭއްވި ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްްވަމުން އެ ކޮމިޝަނުގެ ރައީސް މަރިޔަމް ޝިއުނާ ވިދާޅުވީ، ވެންޓިލޭޓަރުތަކުގެ މައްސަލައިގެ ތަގުގީގަށް ނަގަން ޖެހޭ ހުރިހާ ބަޔާންތަކެއް މިހާރު ނަގައި ނިންމާފައިވާ ކަމަށެވެ.
"ވެންޓިލޭޓަރު މައްސަައިގައި މިހާރު ހުރިހާ ބަޔާންތައް ނަގައި ނިމިފަ ވަނީ، އިންފެކްޓް މި މަސް ނިމުމުގެ ކުރިން އެ ކޭސް އަޅުގަނޑުމެން ނިންމާނަން. ގޮތެއް ނިންމާނަން،" ޝިއުނާ ވިދާޅުވި އެވެ.
މި މަސް ނިމުމުގެ ކުރިން ގޮތެއް ނިންމާނޭ ކަމަށް ޝިއުނާ ވިދާޅުވުމުން މިނިވަން މުއައްސަސާތަކުގެ ކޮމިޓީގެ މެމްބަރު އަދި މަޖިލީހުގެ ބިލެއްދޫ ދާއިރާގެ އެމްޑީޕީ މެމްބަރު އަހުމަދު ހަލީމް (ދޮންބިލެތް ހަލީމް) ތަކުރާރުކޮށް ސުވާލު ކުރެއްވީ ދައުވާ ކުރާނެ ތޯ އެވެ. ނަމަވެސް އެ ސުވާލަށް ޝިއުނާ ޖަވާބެއް ނުދެއްވަ އެވެ.
ޝިއުނާ ވިދާޅުވީ މައްސަލައިގައި ދައުވާ ނުކުރަން ނިންމައި އަނބުރާ ފޮނުވައިލި އިރު ޕީޖީ އޮފީހުން އެދުނު ކަންތައްތައް ބަލަމުން އަންނަ ކަމަށެވެ.
"ޕީޖީން ރިވިއު ކުރައްވާފައިި ދެ ކަމެއް ފާހަގަ ކުރެއްވި އަޅުގަނޑުމެންނަށް. އެގްރިމެންޓްގައި ދައުލަތަށް ގެއްލުންވާ ގޮތަށް ކަންތައްތަކެއް ހިނގާފައި ހުރީމާ އެ ކަންތައް އިތުރަށް ތަހުގީގު ކޮށްފައި ފޮނުވައި ދިނުމަށް އެދުނީ. އަދި ފައިނޭޭންޝަލް މައުލޫމާތުތަކާ އެކީގައި އެބައި ތަހުގީގުކޮށްފައި ފޮނުވަން އެދުނީ،" ޝިއުނާ ވިދާޅުވި އެވެ.
ރާއްޖޭގައި ކޮވިޑްގެ ހާލަތު ގޯސްވެގެންދާނެ ކަމުގެ ބިރު އޮތް ވަގުތެއްގައި ދުބާއީގެ އެގްޒެކިއުޓާސް ކުންފުންޏާ ހަވާލުކުރީ 75 ވެންޓިލޭޓަރު ހޯދުމަށެވެ. އެކަމަށް އެދުނު މުއްދަތު ހަމަވިތާ އެތައް ދުވަހެއް ފަހުން އެ ކުންފުނިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ 60 ވެންޓިލޭޓަރު އަދިވެސް ނުލިބެ އެވެ.
އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏާ އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފައެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.
ވެންޓިލޭޓަރުތައް ނުލިބުމުން ފައިސާ އަނބުރާ ހޯދުމަށް އެ މައްސަލަ ބައިނަލްއަގުވާމީ އާބިޓްރޭޝަނަށް ހުށަހެޅުމުގެ މަސައްކަތް ކުރަމުން އަންނަ ކަމަށް ސަރުކާރުން މީގެ ކުރިން ވަނީ ބުނެފަ އެވެ.
