މިލާން (އޮކްޓޫބަރު 24) - އިޓާލިއަން ލީގުގައި ރޭ ޒްލަޓާން އިބްރަހިމޮވިޗްގެ ގޯލާ އެކު 4-2 އިން ބޮލޯނިއާ ބަލިކޮށް އޭސީ މިލާން ލީގުގެ އެއް ވަނަ އަށް ޖެހިލައިފި އެވެ.
މިލާން އެއް ވަނައިގައި އޮތީ ނުވަ މެޗުން 25 ޕޮއިންޓް ހޯދައިގެންނެވެ. ދެ ވަނައިގައި އޮތް ނަޕޯލީ އަށް ވަނީ އަށް މެޗުން 24 ޕޮއިންޓް ލިބިފަ އެވެ. ހޯސޭ މޮރީނިއޯ ކޯޗުކޮށްދޭ ރޯމާ އަތުން މިރޭ ކުޅޭ މެޗުން މޮޅުވެގެން ނަޕޯލީ އަށް އެއް ވަނަ އަށް އެރޭނެ އެވެ.
ބޮލޯނިއާ ދަނޑުގައި ރޭ ކުޅުނު މެޗުގެ 16 ވަނަ މިނިޓްގައި މިލާން ލީޑުނެގީ ރަފައެލް ލެއާއޯ ޖެހި ގޯލުންނެވެ. ލެއާއޯ ޖެހި ބޯޅަ ގޯލަށް ވަނީ ބޮލޯނިއާގެ ޑިފެންޑަރު ގެރީ މެޑަލް ފައިގައި ޖެހިފަ އެވެ. ބޮލޯނިއާ އަށް މެޗުގައި އިތުރަށް މައްސަލަ ދިމާވީ 20 ވަނަ މިނިޓްގައި އެ ޓީމުގެ އަޑަމާ ސޫމާރޯ އަށް ރަތް ކާޑު ދެއްކުމުންނެވެ. ސޫމާރޯ އަށް ރަތް ކާޑު ދެއްކީ މިލާންގެ ރާޑް ކްރުނިޗް އަށް ފައުލުކުރުމުންނެވެ.
ބޮލޯނިއާގެ ކުޅުންތެރިއަކު މަދުވުމުގެ ފައިދާނަގައި މިލާނުން 35 ވަނަ މިނިޓްގައި ލީޑުފުޅާކުރި އެވެ. މި ގޯލު ޖެހީ އެ ޓީމުގެ ކެޕްޓަން ޑޭވިޑޭ ކަލަބްރިއާ އެވެ.
ދެ ވަނަ ހާފް ފެށިގެން ތަފާތު ރޫހެއް ދައްކައި، އެއް ކުޅުންތެރިއަކު މަދުކޮށް ކުޅެމުން އައި ބޮލޯނިއާ އިން ވަނީ ހަތް މިނިޓް ތެރޭ ދެ ގޯލު ޖަހައިފަ އެވެ. މެޗުގެ 49 ވަނަ މިނިޓްގައި ބޮލޯނިއާ އިން ޖެހި ފުރަތަމަ ގޯލަކީ މިލާންގެ އިބްރަހިމޮވިޗް އަތުން ބައިކޮޅަށް ވަން ގޯލެކެވެ. ބޮލޯނިއާ އިން ނެގި ކޯނަރެއް ދިފާއުކުރަން އުޅުމުގެ ތެރޭގައި އިބްރަހިމޮވިޗް ބޮލުގައި ޖެހުނު ބޯޅަ ވަނީ ބައިކޮޅަށެވެ. އޭގެ ތިން މިނިޓް ފަހުން މޫސާ ބަރޯ ވަނީ މިލާންގެ ޑިފެންޑަރުންގެ އޮފްސައިޑް މަޅިން ސަލާމަތްވެ، ބޮލޯނިއާ އަށް އެއްވަރުކޮށްދީފަ އެވެ.
ބޮލޯނިއާ އިން ނަތީޖާ ހަަމަހަމަކުރިތާ ހަ މިނިޓް ފަހުން އަނެއްކާ ވެސް އެ ޓީމުގެ ކުޅުންތެރިއަކަށް ރަތް ކާޑު ދެއްކި އެވެ. ބޮލޯނިއާގެ ރޮބާޓޯ ސޮރިއާނޯ އަށް ރަތް ކާޑު ދެއްކީ ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީ ހޯދުމަށް ފަހު އެވެ.
ނުވަ ކުޅުންތެރިންނާ އެކު ފަހު 30 ވަރަކަށް މިނިޓް ކުޅުނު ބޮލޯނިއާ ކޮޅަށް މިލާނުން މޮޅުވި ގޯލުތައް ޖެހީ ފަހު ހަ މިނިޓް ތެރޭގަ އެވެ. މެޗުގެ 84 ވަނަ މިނިޓްގައި ވޮލީ އަކުން މިލާނަށް ލީޑުނަގައިދިނީ އަލްޖީރިއާގެ މިޑްފީލްޑަރު އިސްމައެލް ބެނަސިއާ އެވެ. މެޗުގެ ފަހު މިނިޓްގައި އުމުރުން 40 އަހަރުގެ އިބްރަހިމޮވިޗް ވަނީ އޭރިއާ ރޮނގުކައިރިން ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ.
