ލަންޑަން، އިނގިރޭސިވިލާތް (އޮކްޓޯބަރު 23) - ކުރިއަށް އޮތް ކޮޕް26 މޫސުމީ ސަމިޓުން ކާމިޔާބު ހޯދުމަކީ 2015 ވަނަ އަހަރު ޕެރިސްގައި ބޭއްވި ބައްދަލުވުންތަކަށް ވުރެ އުނދަގޫ ކަމެއް ކަމަށް އިނގިރޭސިވިލާތުން ބުނެފި އެވެ.
އޮކްޓޯބަރު 31 ވަނަ ދުވަހު ގްލާސްގޯގައި ފަށާ ކޮޕް26 ސަމިޓުގެ ރިޔާސަތުގައި އިންނަވާނީ އިނގިރޭސިވިލާތުގެ އަލޮކް ޝަރުމާ އެވެ. ނޮވެމްބަރު 12 އާ ހަމައަށް ބާއްވާ މި ސަމިޓަކީ 2015 ވަނަ އަހަރަށް ފަހު މޫސުމީ ބަދަލުގެ މައްސަލާގައި ބާއްވާ އެންމެ ބޮޑު ސަމިޓެވެ.
ބައްދަލުވުމުގެ އަމާޒަކީ ދުނިޔެ ހޫނުވާން މެދުވެރިވާ ކާބަން ގޭސް ބޭރުކުރުން މަދުކުރާނެ ޓާގެޓުތަކަށް ވާސިލްވުމަށް ގައުމުތަކުން ކުރާނެ ކަންކަން ކަނޑައެޅުމެވެ.
ގާޑިއަން ނޫހަށް ދެއްވި އިންޓަވިއުއެއްގައި ޝަރުމާ ވިދާޅުވީ ދުނިޔެ ހޫނުވުން 1.5 ޑިގްރީ ސެލްސިއަސް އަށް ވުރެ ދަށުގައި ބެހެއްޓުމަށް 200 އެއްހާ ގައުމުން ކަނޑައަޅާ ޓާގެޓުތަކަށް މަސައްކަތް ކުރަން އެއްބަސްކުރުވުމަކީ ބޮޑު މަސައްކަތެއް ކަމަށެވެ.
"ގްލާސްގޯގައި ކުރަން މި އުޅޭ މަސައްކަތަކީ ވަރަށް ބުރަ މަސައްކަތެއް. ޕެރިސްގައި ހާސިލްކުރީ ރަނގަޅު ކުރިއެރުންތަކެއް. އެކަމަކު ވަރަށް ގިނަ ކަންކަމާ މެދު ގޮތް ނިންމުން އޮތީ މުސްތަގުބަލަށް ދޫކޮށްލާފައި،" އޭނާ ވިދާޅުވި އެވެ.
"މިއީ އިމްތިހާން ކަރުދާހެއް ހަދައި ނިމޭ ހިސާބަށް ދާއިރު، އެންމެ އުނދަގޫ ސުވާލުތައް ފަހުން ހަދަން ބަހައްޓާފައި ހުއްޓާ ގަޑި ޖެހެން ގާތްވުން ކަހަލަ ކަމެއް."
ކޮޕް26 ސަމިޓުން ނަތީޖާ ނެރުން އިތުރަށް އުނދަގޫ ވެގެން ދާނީ ޗައިނާގެ ރައީސް ޝީ ޖިންޕިން އާއި ރަޝިއާގެ ލީޑަރު ލެޑިމިއަ ޕޫޓިން ބައްދަލުވުންތަކުގައި ބައިވެރިވެވަޑައިނުގަންނަވާތީ އެވެ. އެ ދެ ގައުމުން ވެސް ފޮނުވާނީ އިސްވެރިންގެ ވަފުދެކެވެ.
ބެލެވޭ ގޮތުގައި ދުނިޔޭގެ 120 ގައުމެއްގެ ލީޑަރުންނާއި 25،000 އަށް ވުރެ އިސް އޮފިޝަލުން ސަމިޓުގައި ބައިވެރިވާނެ އެވެ.
ޕެރިސް އެކޯޑްގެ ދަށުން 197 ގައުމަކުން ވަނީ ދުނިޔެ ހޫނުވުން ދެ ޑިގްރީ ސެލްސިއަސް އަށް ވުރެ ދަށުގައި ބެހެއްޓުމަށް އެއްބަސްވެ، "ނޭޝަނަލީ ޑިޓާމައިންޑް ކޮންޓްރިބިއުޝަންސް (އެންސީޑީ)" ކަނޑައަޅާފަ އެވެ. އެއީ ކޮންމެ ގައުމަކުން އަމިއްލަ އަށް އިސްނަގައިގެން ކާބަން މަދު ކުރަން ކުރާނެ ކަންކަމުގެ ވައުދެވެ.
ނަމަވެސް ޕެރިސް އެކޯޑާ ހަމައަށް ދިޔައިރު ގައުމުތަކުން ކަނޑައެޅި އެންސީޑީތަކަކީ ދެ ޑިގްރީ ސެލްސިއަސް އަށް ވުރެ ދަށުގައި ދުނިޔޭގެ ފިނިހޫނުމިން ބެހެއްޓޭ ވަރަށް ވުރެ ކުޑަ ޓާގެޓުތަކެކެވެ. ކޮޕް26 ސަމިޓުގެ އެންމެ ބޮޑު އެއް އަމާޒަކީ އެންޑީސީތައް ވަރުގަދަ ކުރުމެވެ.
"އަޅުގަނޑުމެން ގައުމުތައް ކައިރީގައި މި ބުނަނީ އެންޑީސީ ޓާގެޓުން ނުފުދެއޭ އަދި އިތުރަށް ވިސްނާފައި އެހެން ހުށަހެޅުމެއް ގެންނާނޭ،" ޝަރުމާ ވިދާޅުވި އެވެ.
ދުނިޔޭގައި މި ވަގުތު އެންމެ ގިނައިން ކާބަން ބޭރު ކުރާ ޗައިނާ އަށް އޭނާ ގޮވާލެއްވީ ކޮޕް26 ސަމިޓަށް އަންނަ އިރު އެންޑީސީތައް ހުށަހެޅުމަށެވެ.
"ޖީ20 ގައުމުތަކުން ކޮމިއުނީކްގައި ސޮއިކުރީ މިދިޔަ ޖުލައި މަހު ނޭޕަލްސްގައި. އެންމެން އެއްބަސްވީ އެންޑީސީ މުރާޖައާކޮށް ކޮޕް26 އަށް ހުށަހަޅަން. އަޅުގަނޑު ވާނީ އެކަން އަލުން ހަނދާންކޮށްދީފައި," ޝަރުމާ ވިދާޅުވި އެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ބުރާސްފަތި ދުވަހު ވިދާޅުވީ މި ވަގުތު މޫސުމީ ބަދަލުގެ ހާލަތު އޮތް ގޮތަކީ "މުސީބާތަކާ ދިމާލަށް އޮތް ވަން-ވޭ ޓިކެޓެއް" ކަމަށެވެ. އެ މުސީބާތުން ސަލާމަތްވުމަށް ކޮޕް26 އަކީ ކާމިޔާބު ސަމިޓަކަށް ހެދުމަށް އޭނާ ގޮވާލެއްވި އެވެ.
