ހިޔާ ފްލެޓްތަކުގެ އަގުތައް ކަނޑައަޅާފައިވާ ގޮތް ބެލުމަށް އޮޑިޓާ ޖެނެރަލްގެ އޮފީހުން ނެރުނު ރިޕޯޓު ސަރުކާރުން ދިރާސާ ކުރާނެ ކަމަށާއި ރިޕޯޓާ ގުޅިގެން ފިޔަވަޅެއް އަޅަންޖެހިއްޖެ ނަމަ އެކަން ކުރާނެ ކަމަށް ރައީސުލްޖުމްހޫރިއްޔާގެ އޮފީހުން މިއަދު ބުނެފި އެވެ.
މިދިޔަ ބުރާސްފަތި ދުވަހު އޮޑިޓާ ޖެނެރަލް އަބްދުﷲ ނިޔާޒީ ނެރުއްވި ރިޕޯޓުގައި ބުނެފައި ވަނީ 25 ބުރީގެ 16 ޓަވަރުގައި އިމާރާތްކޮށްފައިވާ 7000 ހައުސިން ޔުނިޓަށް ދައްކަންޖެހޭ އަގުތައް ކުރީގެ ސަރުކާރުން ހިސާބުކޮށްފައިވާ ގޮތަށް ދޫކޮށްފި ނަމަ ކޮންމެ ޔުނިޓަކުން މިލިއަނަކަށްވުރެ ބޮޑު ގެއްލުމެއް ލިބޭނެ ކަމަށެވެ.
އެކަމާ ގުޅޭ ގޮތުން "އަދަދު" އާ ވާހަކަ ދައްކަވަމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ އެ އޮޑިޓް ރިޕޯޓު ދިރާސާ ކުރުމުގެ މަސައްކަތް ވަރަށް އަވަހަށް ސަރުކާރުން ފަށާނެ ކަމަށެވެ. އަދި އެ މަސައްކަތަށްފަހު، އެއްވެސް ފިޔަވަޅެއް އަޅަންޖެހޭ ނަމަ ލަސްނުކޮށް އެކަން ސަރުކާރުން ކުރާނެ ކަމަށް ވެސް މަބްރޫކް ވިދާޅުވި އެވެ.
"އޮޑިޓް ރިޕޯޓުން ކޮންފާމްވެއްޖެ އަޅުގަނޑުމެން އަބަދުވެސް ދައްކަމުން އައި ބައެއް ވާހަކަތައް. އަދި އޭގެން އެނގިއްޖެ އަޅުގަނޑުމެން ބުނަމުން އައި ވަރަށްވުރެ ވެސް ބައެއް ކަންކަން ގޯސްކަން،" މަބްރޫކް ވިދާޅުވި އެވެ.
ރައީސް ޔާމީންގެ ސަރުކާރުން ޗައިނާގެ ސީސީސީސީ ކުންފުންޏާއެކު ސޮއިކޮށްގެން ކުރިއަށްގެންދިޔަ ސޯޝަލް ހައުސިން މަޝްރޫއުގެ ފްލެޓަކަށް ޖެހޭ އަގު ކަމަށް އެ ސަރުކާރުން 2018 ވަނަ އަހަރު ކަނޑައެޅީ 6،600ރ. އެވެ. ނަމަވެސް އެ އަގަށް ފްލެޓު ދޫކޮށްފި ނަމަ ޔުނިޓަކުން 1.1 މިލިއަން ރުފިޔާ ގެއްލުންވާނެ ކަމަށް އޮޑިޓު ރިޕޯޓުން ހޯދާފައިވެ އެވެ. އޭރުން ޖުމްލަ އެ ވަނީ އަށް ބިލިއަން ރުފިޔާގެ ގެއްލުމެކެވެ.
ހައުސިން ޔުނިޓުތަކަށް ދައްކަންޖެހޭ އަގަކީ 6،600ރ. ކަމަށް 2018 ވަނަ އަހަރު ހައުސިން މިނިސްޓްރީގެ ފަރާތުން ކަނޑައެޅީ މަޝްރޫއު ކުރިއަށްގެންދިޔުމަށް ނެގި ލޯނުތަކާއި ރީފައިނޭންސިން ލޯނުތަކާއި އިންޓްރެސްޓާއި ލޯނު އަނބުރާ ދެއްކުމަށްދާނެ ކޭޝްފްލޯއަށް ބެލުމެއްނެތި ކަމަށް ވެސް އޮޑިޓް ރިޕޯޓުގައި ބުނެފައިވެ އެވެ.
އޮޑިޓް ރިޕޯޓު ނެރުމާއެކު ސަރުކާރުގެ ބައެއް ފަރާތްތަކުން ބުނަމުން އަންނަނީ ފްލެޓުތަކުގެ އަޑު ކުޑަކޮށް ކުރީ ސަރުކާރުން އިއުލާނު ކުރުމަކީ ރައްޔިތުނަށް އޮޅުވާލުން ކަމަށާއި ހިޔާ މަޝްރޫއަކީ އެކަށީގެންވާ މިންވަރަށް ނުވިސްނާ ކުރިއަށްގެންދިޔަ އަގުބޮޑު ޕްރޮޖެކްޓެއް ކަމަށެވެ.
ފްލެޓު ލިބޭ މީހުން ފިނިޝިންގެ މަސައްކަތް އަމިއްލައަށް ކުރަންޖެހޭ ގޮތަށް ހުޅުމާލެ ދެ ވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކަށް ބައެއް އާއިލާތަކުން މިހާރު ވަނީ ބަދަލުވެފަ އެވެ. އެތަނުގައި މިހާރު ވެސް ގާތްގަނޑަކަށް 100 އެއްހާ އާއިލާ ދިރިއުޅޭނެ ކަމަށް ބައެއް ފަރާތްތަކުން އަންދާޒާކުރެ އެވެ.
