އަރަބި މީޑިޔަމްއަަށް ކިޔަވާދޭ ސްކޫލެއް ހުޅުމާލޭގައި ގާއިމުކޮށް ދިނުމަށް އެދި ތިންހާއްހަވުރެ ގިނަ ބެލެނިވެރިންގެ ސޮއިއާއެކު ޕެޓިޝަނެއް އެޑިއުކޭޝަން މިނިސްޓްރީއަށް ހުށަހަޅައިފި އެވެ.
އަރަބިއްޔާ ސްކޫލްގައި ކިޔަވަމުންދާ ގިނަ ދަރިވަރުންތަކެއް ހުޅުމާލެއަށް ބަދަލުވަމުން ދިއުމާއި ގުޅިގެން އެޑިއުކޭޝަނަށް ހުށަހާޅާފައިވާ މި ޕެޓިޝަނުގައި ވަނީ "ހުޅުމާލޭ އިސްލާމިކް ސްކޫލް" ގެ ނަމުގައި ހުޅުމާލޭގައި ސްކޫލެއް ތަރައްގީކޮށްދިނުމަށް އެދިފަ އެވެ.
މިކަމުގައި އިސްކޮށް ހަރަކާތްތެރިވާ އެ ސްކޫލްގެ މިދިޔަ ދައުރުގެ ޕީޓީއޭގެ ނައިބު ރައީސް ޔޫސުފް އަބްދުﷲ "އަދަދު"އަށް ބުނީ އެޑިއުކޭޝަން މިނިސްޓަރު ޑރ. އައިޝަތު އަލީއާ މިއަދު ބައްދަލުކޮށް މި ޕެޓިޝަން ހުށަހަޅާފައިވާ ކަމަށެވެ.
އެގޮތުން އަރަބިއްޔާ ކުދިންނަށް ވަކިން ހާއްސަ ސްކޫލެއް ހުޅުމާޅޭގައި އަޅަންޖެހޭ މައިގަނޑު ސަބަބަކީ އެހެން ސްކޫލްތަކާ ހިލާފަށް ދެތިން މާއްދާއެއް ފިޔަވާ ހުރިހާ މާއްދާއެއް އަރަބި ބަހުން އެ ސްކޫލްގައި ކިޔަވައިދޭ ތީ ކަމަށް އޭނާ ބުންޏެވެ.
އަދި އެހެން ސްކޫލްތަކާއި ހިލާފަށް އިސްލާމްދީނުގެ މައިގަނޑު މަސްދަރުތައް ހިމެނިފައިވާ ތައުހީދާއި، ސުންނަތާއި، ފިގްހު ފަދަ ދީނީ މާއްދާތައް ކިޔަވައިދޭ ސްކޫލެއް ކަމަށް ވާތީކަން ފާހަގަކުރި އެވެ.
މީގެ އިތުރުން އަރަބިއްޔާއަކީ ދެޖިންސް ކުދިންނަށް ވަކި ކްލާސްރޫމްތަކުގައި ކިޔެވުމުގެ ފުރުސަތު ލިބިދޭ އިސްލާމީ ރިވެތި އާދަތަކާއި، ތަރުބިއްޔަތުގެ މައްޗަށް ބިނާވެފައިވާ ސްކޫލެއް ކަމަށް އޭނާ ބުނެ އެވެ.
"މިނިސްޓަރާ ބައްދަލުކޮށް ޕެޓިޝަން ހުށަހެޅުމުން ވިދާޅުވި، ހުޅުމާލޭގައި އަރަބި މީޑިޔަމްއަށް ކިޔަވާދޭ ސްކޫލެއް އެޅުމަކީ އެޑިއުކޭޝަންގެ ޕޮލިސީގައި އޮތް ކަމެކޭ. އެކަމަކު އެކަމަށް މިވަގުތު ބަޖެޓް ނެތް ކަމަށް ވިދާޅުވީ" ޔޫސުފް ކިޔައިދިނެވެ.
އަރަބިއްޔާ ސްކޫލްގެ ބެލެނިވެރިންގެ އިސްނެގުމާއެކު ހުޅުމާލޭގައި އަރަބި އިސްލާމީ ތައުލީމު އުގަންނާދޭސްކޫލެއް އަޅައިދިނުމަށް އެދި އެޑިޔުކޭޝަން މިނިސްޓްރީއަށް ހުށަހެޅި ޕެޓިޝަންގެ ކޮޕީ ރައީސް އޮފީހަށާއި، އިސްލާމިކް މިނިސްޓްރީ އަށާއި، އެޗްޑީސީ އަދި ދީނީ ޖަމިއްޔާ ތަކަށްވެސް ހުށަހަޅާނެކަމަށް އެފަރާތުން ބުންޏެވެ.
