އަންނަ މަހު ސްރީ ލަންކާ ފުޓްބޯޅަ ފެޑެރޭޝަން އިން ކޮލަމްބޯގައި ކުރިއަށް ގެންދަން ނިންމާފައިވާ ފޯ ނޭޝަންސް ކަޕްގައި ރާއްޖެ ކުޅޭ ފުރަތަމަ މެޗުގައި މުބާރާތް އިންތިޒާމްކުރާ ސްރީ ލަންކާއާ ވާދަކުރަން ޖެހިއްޖެ އެވެ.
ލަންކާގައި އަންނަ މަހު 8-17 އަށް ބާއްވާ މުބާރާތުގައި ވާދަކުރާ ރާއްޖޭގެ ޓީމުން ފުރަތަމަ މެޗުގައި އަށް ވަނަ ދުވަހުގެރޭ ލަންކާއާ ދެކޮޅަށް ކުޅުމަށް ފަހު 11 ވަނަ ދުވަހު ހަވީރު ބަންގްލަދޭޝްއާ ބައްދަލުކުރާނެ އެވެ. އަދި ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހު އެވެ. ފައިނަލަށް ގޮސްފިނަމަ އެ މެޗު އޮންނާނީ އަންނަ މަހު 17 ވަނަ ދުވަހުގެރޭގަ އެވެ.
މިހާރު ރާއްޖޭގައި ކުރިއަށްދާ ސާފް ޗެމްޕިއަންޝިޕްގައި ރާއްޖެ ދިޔައީ ލީގު ބުރުގެ ތިން ވަނަ އެވެ. ފުރަތަމަ މެޗުން ނޭޕާލް އަތުން 1-0 އިން ބަލިވިއިރު، ދެ ވަނަ މެޗުން ވަނީ ބަންގްލަދޭޝްގެ މައްޗަށް 2-0 އިން ކުރިހޯދައިފަ އެވެ. އޭގެ ފަހުން ތިން ވަނަ މެޗުގައި ލަންކާ އަތުން 1-0 އިން މޮޅުވިއިރު، ފަހު މެޗުގައި ރޭ ވަނީ އިންޑިއާއާ ވާދަކޮށް 3-1 އިން ބަލިވެފަ އެވެ.
2012 ވަނަ އަހަރު ރާޖަޕަކްސަ މުބާރާތް ކާމިޔާބުކުރި ޓީމު އޭރުގެ ރައީސް ވަހީދުއާ އެކު ފޮޓޯ އަކަށް ހުއްޓިގެން.
ސާފް ޗެމްޕިއަންޝިޕަށް ރާއްޖޭގެ ކޯޗަކަށް ހަމަޖެއްސީ ކުރިން އެސިސްޓަންޓަކަށް ހުރި ރާއްޖޭގެ އެންމެ ކާމިޔާބު އެއް ކޯޗު އަލީ ސުޒޭން އެވެ. ސާފް އަށް ފަހު ބިދޭސީ އާ ކޯޗެއް ގައުމީ ޓީމާ ހަވާލުވާނެ ކަމަށް މީގެ ކުރިން އެފްއޭއެމްގެ ރައީސް ބައްސާމް އަދީލް ޖަލީލް ވަނީ ވިދާޅުވެފަ އެެވެ.
އެފްއޭއެމުން މިއަދު ބުނީ ލަންކާ މުބާރާތަށް ޓީމުގެ ކޯޗުގެ ކަންތައް ކުރިއަށް ދުވަސްތަކުގެ ތެރޭގައި ފައިނަލް ކުރެވިގެންދާނެ ކަމަށެވެ.
ރާއްޖޭން ވަނީ މީގެ ކުރިން 2012 ވަނަ އަހަރު ލަންކާގައި ބޭއްވި މަހިންދުރަ ރާޖަޕަކްސަ މުބާރާތުގެ ޗެމްޕިއަންކަން ހޯދައިފަ އެވެ. އެ ފަހަރު މުބާރާތް ކުރިއަށް ގެންދިޔައީ 23 އަހަރުން ދަށުގެ މުބާރާތެއްގެ ގޮތުގަ އެވެ. ރާއްޖޭން މުބާރާތް ކާމިޔާބު ކުރިއިރު ކޯޗަކަށް ހުރީ ހަންގޭރީގެ އިސްތަވާން އުރުބާނީ އެވެ. ފައިނަލުގައި ރާއްޖޭން ވަނީ 2-1 އިން ޕާކިސްތާން ބަލިކޮށްފަ އެވެ.
އެ ފަހަރު ރާޖަަޕަކްސަ މުބާރާތުގައި ކުޅުނު ބައެއް ކުޅުންތެރިން މި ފަހަރު ސާފްގައި ވާދަކުރި ރާއްޖޭގެ ސްކޮޑުގައި ހިމެނެ އެވެ. އެއީ އަސަދުﷲ އަބްދުﷲ (އަސަކޮ)، މޫސާ ޔާމީން (ޔާމްބެ) އަދި އަހުމަދު ނޫމާން (ހެލްމެޓް) އެވެ.
