އުރީދޫ ސާފް ޗެމްޕިއަންޝިޕްގައި މިރޭ އިންޑިއާއާ ދެކޮޅަށް ރާއްޖޭން ކުޅޭ މެޗަށް ނުކުންނައިރު، ދިވެހި ސަޕޯޓަރުން ހެޔޮހިތުން ކުރާ ދުއާގެ ނަތީޖާ ދަނޑުމަތީގައި ފެންނާނެ ކަމަށް ގައުމީ ޓީމުގެ ކެޕްޓަން އަކުރަމް އަބްދުލް ގަނީ (އަކޫ) ބުނެފި އެވެ.
މުބާރާތުގެ ފައިނަލުގެ ޖާގައެއް ހޯދަން މިރޭ އިންޑިއާ ކައިރިން ޕޮއިންޓަކުން ވެސް ރާއްޖެ އަށް ފަރުޖައްސައިލެވޭނެ އެވެ. އެކަމަކު، ފައިނަލަށް ދާނަމަ އިންޑިއާ އަށް މިއީ މޮޅުވުން މަޖުބޫރު މެޗެކެވެ.
ރާއްޖޭން 2008 ވަނަ އަހަރާއި 2018 ވަނަ އަހަރު ސާފް ޗެމްޕިއަންޝިޕް ކާމިޔާބުކުރީ ފައިނަލުުގައި އިންޑިއާ ބަލިކޮށްފަ އެވެ. އެކަމަކު، އެ ދެ ފަހަރު ވެސް ގްރޫޕް ސްޓޭޖުގައި އިންޑިއާ އަތުން ބަލިވި އެވެ.
މިރޭގެ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި އަކޫ ބުނީ ކޮންމެ ފަހަަރަކު ވެސް ކާމިޔާބު ލިބެނީ އިންޑިއާ ބަލިކޮށްގެން ކަމަށެވެ. އަދި އިންޑިއާ އަކީ މި ސަރަހައްދުގެ އެންމެ ވަރުގަދަ ޓީމުކަން ދަނެގެން އެ އިހުތިރާމާ އެކު ނުކުތަސް ސަޕޯޓަރުންގެ އެހީތެރިކަމާ އެކު ނަތީޖާ ނެރެވޭނެ ކަމަށް އަކޫ ވަނީ ބުނެފަ އެވެ.
"ބޮޑު ސްކްރީން ދޮށުގައި ވިޔަސް ގޭގައި ވިޔަސް ރަށުގައި ވިޔަސް ކޮންމެ ތާކު ތިބެ ވެސް އަޅުގަނޑުމެންނަށް ސަޕޯޓް ކޮށްދެއްވާށޭ. ހެޔޮ ދުއާ ކޮށްދެއްވާ ދުއާގެ ނަތީޖާ އިންޝާﷲ މާދަމާރޭ (މިރޭ) އާއި ކުރިއަށް އޮތް ފައިނަލް މެޗުގައި ފެނިގެންދާނެއޭ. ދިވެހި ގައުމުގެ ހައްގުގައި މޭފުޅާ ކޮށްލާފައި ކެރިގެން މި ނުކުންނަނީ މިކަން ކުރަން،" އަކޫ ބުންޏެވެ.
"ހުރިހާ ބޭފުޅުންގެ ވެސް ހެޔޮހިތުން އަޅުގަނޑުމެންނަށް ކާމިޔާބީ އަށް އެދޭކަން އަޅުގަނޑުމެން ގަބޫލުކުރަން. އެ ގޮތުގައި ތިބިއްޔާ އިންޝާﷲ މި ތަށި ނުނެގޭނެ އެއްވެސް ގޮތެއް ނެތް."
މި ފަހަރުގެ މުބާރާތުގެ މެޗުން ނޭޕާލް އަތުން 1-0 އިން ބަލިވި ނަމަވެސް ރާއްޖޭން އެނބުރި އައީ ވަރުގަަދަ ކޮށެވެ. އެ ގޮތުން ދެ ވަނަ މެޗުގައި ބަންގްލަދޭޝް އަތުން 2-0 އިން މޮޅުވިއިރު، ތިން ވަނަ މެޗުން ވަނީ 1-0 އިން ލަންކާ ބަލިކޮށްފަ އެވެ.
ހަތް ފަހަރު ސާފްގެ ޗެމްޕިއަންކަން ހޯދާފައިވާ އިންޑިއާއާ މިރޭ ބައްދަލުކުރާއިރު، މިއީ އެ ޓީމުގެ އިތުރުން ރާއްޖެ އަށް ވެސް ކޮންމެ ވެސް ވަރެއްގެ ޕްރެޝަރެއް އޮތް މެޗެކެވެ.
"ޕްރެޝަރު ވެސް މެޗެއް. ޕްރެޝަރު ނެތިއްޔާ ބޯޅައެއް ފޯރިއެއް ގަދައެއް ނުވާނެ. އެ ހުރިހާ ޕްރެޝަރެއް ޕޮޒިޓިވްކޮށް ނަގައިގެން މި ނުކުންނަނީ ޓީމާ ދޭތެރޭ އެ އިތުބާރު އޮތީމަ. އިންޝާﷲ މާދަމާރޭ (މިރޭ) ރަނގަޅު ކާމިޔާބީއަކާ އެކު ދިވެހި ސަޕޯޓަރުންނަށް މި އުފާވެރިކަން ގެެނެސްދިނުމަށް މި ނުކުންނަނީ،" އަކޫ ބުންޏެވެ.
މާލޭގައި ރާއްޖެ އާއި އިންޑިއާ މިހާތަނަށް ތިން ފަހަރު ބައްދަލުކޮށްފައިވާއިރު، ރާއްޖެ މޮޅުވީ 2000 ވަނަ އަހަރުގެ ގޯލްޑަން ޖުބުލީ މުބާރާތުގަ އެވެ. އޭގެ ފަހުން 2008 ވަނަ އަހަރުގެ ސާފް ޗެމްޕިއަންޝިޕްގެ ގުރޫޕް ސްޓޭޖުގައި ރާއްޖެ ވަނީ އިންޑިއާ އަތުން ބަލިވެފަ އެވެ. ދެހާސް އެގާރަ ވަނަ އަހަރު މާލޭގައި ކުޅުނު އެކުވެރިކަމުގެ މެޗު ނިމުނީ 1-1 އިން އެއްވަރުވެގެނެވެ.
ސާފްގައި އިންޑިއާ އަތުން އެންމެ ގިނައިން މޮޅުވުމުގެ ރެކޯޑް އޮތީ ވެސް ރާއްޖެ އަތުގަ އެވެ. މިރޭ ރާއްޖެ އާއި އިންޑިއާ ކުޅޭ މެޗު ފަށާނީ 9 ޖަހާއިރު އެވެ.
