އުރީދޫ ސާފް ޗެމްޕިއަންޝިޕްގައި މިއަދު ހަވީރު ސްރީ ލަންކާއާ ދެކޮޅަށް ނުކުންނައިރު މިހާރު އޮތް ޓީމަކީ ލަންކާ އިން ކުރިން ނުފެންނަ ވަރުގެ ރަނގަޅު ސްކޮޑެއް ކަމަށް ރާއްޖޭގެ ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ގަނީ (އަކޫ) ބުނެފި އެވެ.
ރާއްޖޭން 2018 ވަަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕްގައި ވަނީ 0-0 އިން ލަންކާއާ އެއްވަރުވެފަ އެވެ. އެ ޓީމާ މިހާރު އޮތް ލަންކާގެ އެންމެ ބޮޑު ތަފާތަކީ އެހެން ގައުމުތަކުގައި ކުޅޭ ކުޅުންތެރިން ލަންކާ ޓީމުގައި ހިމަނާފައިވުމެވެ.
އެ ގޮތުން އިންގްލެންޑްގެ ކުއީންސްޕާކް ރޭންޖާސް (ކިއުޕީއާރް)ގެ ޒުވާން ޓީމަށް ކުޅޭ 19 އަހަރުގެ ޑިލޯން ޑަ ސިލްވާ އާއި އިންގްލެންޑްގެ ދަށް ޑިވިޝަންގެ ޓީމަކަށް ކުޅޭ މާވިން ހަމިލްޓަން އަދި ކުރިން ޖަރުމަނުގައި ކުުޅުނު ވަސީމް ރަޒީގް ލަންކާ ޓީމަށް އަންނަނީ ކުޅެމުންނެވެ.
"އަޅުގަނޑު ދެކޭ ގޮތުގައި މިދިޔަ މުބާރާތުގެ ލަންކާ އަށް ވުރެ މި ފަހަރު އައިސްގެން މި އުޅޭ ލަންކާ ޓީމު އެގްރެސިވްކޮށް (ވަރުގަދަކޮށް) މި ކުޅެނީ. ކޯޗު (ސުޒޭން) ފާހަަގަކޮށްލިހެން ވޯކްރޭޓް ހައި. މީގެ ކުރިން ވެސް އަޅުގަނޑު ނުދެކެން މިހާ ވޯކްރޭޓް ހައި ލަންކާ ޓީމެއް،" އިއްޔެ ބޭއްވި ނޫސްވެރިންގެ ބައްދަލުވުމުގައި އަކޫ ބުންޏެވެ.
ލަންކާ ޓީމުގައި މި ވަގުތު ތިބި ކުޅުންތެރިންގެ ތެރެއިން ރާއްޖޭގެ ތަޖުރިބާހުރި ދެ ކުޅުންތެރިން އެބަތިބި އެވެ. އެއީ ޓީސީ ސްޕޯޓްސް ކްލަބަށް މިދިޔަ ސީޒަނުގައި ކުޅުނު ޑިފެންޑަރު ޑަކްސަން ޕުސްލަސް އަދި އީގަލްސް އަށް ފަސް އަހަރު ކުޅެދިން ގޯލްކީޕަރު އަދި ލަންކާގެ ކެޕްޓަން ސުޖަން ޕެރޭ އެވެ. ރާއްޖެއާ އެންމެ ފަހުން ކުޅުނު މެޗުގައި ލަންކާ އިން އެއްވަރުކުރިއިރު، ސުޖަން ވަނީ މޮޅު ކުޅުމެއް ދައްކައިފަ އެވެ.
"އެ މީހުން (ލަންކާ) އަޅުގަނޑަށް ހީވަނީ ތަންކޮޅެއް ފަރިތަވާނެ ކަންނޭނގެ ރާއްޖެ އަށް ވެސް. ސުޖަން ހުރުމާ އެކީގައި. އަބަދު ވެސް ވަރަށް މޮޅަށް ކުޅޭ ކުޅުންތެރިއެއް. މުބާރާތުގައި ވެސް އެކަން ފެނިގެންދޭ ހަމަ،" ސުޖަންއާ ބެހޭގޮތުން އަކޫ ބުންޏެވެ.
ފަަސް ގައުމުގެ މެދުގައި ކުޅޭ މި ފަހަރުގެ ސާފް ޗެމްޕިއަންޝިޕްގައި ރާއްޖެ މި ވަގުތު އޮތީ ޕޮއިންޓް ތާވަލުގެ ތިން ވަނައިގަ އެެވެ. އެކަމަކު މިއަދު ހަވީރު ލަންކާ އަތުން މޮޅުވެގެން އެއް ވަނަ އަށް އެރޭނެ އެވެ. އޭރުން މިރޭ ނޭޕާލާއި އިންޑިއާ ކުޅޭ މެޗު ދެ ޓީމަށް ވެސް ނަތީޖާއެއް ނެރުން މުހިއްމުވާނެ އެވެ. ލަންކާ އޮތީ ފުރަތަމަ ތިން މެޗުން ހޯދި ޕޮއިންޓާ އެކު މުބާރާތުން ކަޓައިފަ އެެވެ.
އަކޫ ބުނީ މިއަދުގެ މެޗުން މޮޅުވުމަށް ކުރަން ޖެހޭ މަސައްކަަތަށް ހުރިހާ ކުޅުންތެރިން ތައްޔާރު ކަމަށެވެ.
"އަޅުގަނޑުމެން މުޅި ޓީމު މި އޮތީ އެ ކަމަށް ތައްޔާރުވެގެން. ނަގަން ޖެހޭ ހުރިހާ ތައްޔާރީއެއް ނަގައިގެން. އިންޝާﷲ މާދަމާގެ (މިއަދުގެ) މެޗު ވެސް ކާމިޔާބު ކޮށްގެން މިކަން ނިންމާނީ،" އަކޫ ބުންޏެވެ.
ލަންކާ އިން އެންމެ ފަހުން ރާއްޖެ ބަލިކުރީ 2002 ވަނަ އަހަރު އެވެ. އޭގެ ފަހުން ކުޅުނު އަށް މެޗުގެ ތެރެއިން ހަތަރު މެޗުން ރާއްޖެ މޮޅުވިއިރު، އަނެއް ހަތަރު މެޗު ނިމުނީ އެއްވަރު ވެގެންނެވެ. މިއަދުގެ މެޗު ފަށާނީ ހަވީރު ހަތަރެއް ޖަހާއިރު އެވެ.
