ގެތާ، ޕާކިސްތާން (އޮކްޓޯބަރު 7) - ބުރާސްފަތި ދުވަހުގެ އިރާކޮޅުގެ ވަގުތެއްގައި ޕާކިސްތާނުގެ ހުޅަނގު ދެކުނުގެ ހިސާބަކަށް އައި ބިންހެއްލުމެއްގައި 20 މީހުން މަރުވެ، 200 އަށް ވުރެ ގިނަ މީހުންނަށް އަނިޔާވެއްޖެ އެވެ.
ގިނަ ބަޔަކު މަރުވީ ބަލޮޗިސްތާން ޕްރޮވިންސަށް 5.7 މެގްނިޓިއުޑް ބާރު މިނުގައި އައި ބިންހެލުމުގައި ވެއްޓުނު އިމާރާތްތަކުގެ ދަށުވެ އެވެ. ބިންހެލުމާއެކު ކަރަންޓު ކެނޑުމުން އަނިޔާވި މީހުންނަށް ފަރުވާ ދޭން ޖެހިފައި ވަނީ ޓޯޗުން އަލިކޮށްގެންނެވެ.
ބިންހެލުމުގެ އަސަރު އެންމެ ބޮޑަށް ކުރީ މީހުން މަދު، ފަރުބަދަ މަތީގެ ހަރްނާއީ ޑިސްޓްރިކްޓަށެވެ. އެ ހިސާބުގެ މަގުތައް ހަދާފައި ނުވުމާއި، ކަރަންޓާއި މޮބައިލް ފޯނުގެ ހިދުމަތް ނުލިބުމާ ހެދި މީހުން ސަލާމަތް ކުރުމުގެ މަސައްކަތަށް ވަނީ ހުރަސްއެޅިފަ އެވެ.
"އަޅުގަނޑުމެންނަށް މައުލޫމާތު ލިބޭ ގޮތުގައި ބިންހެލުމުގައި 20 މީހުން މަރުވި،" ބަލޮޗިސްތާނުގެ ހޯމް މިނިސްޓަރު މީރް ޒިއާއުﷲ ލަންގާއޫ ވިދާޅުވި އެވެ.
ހަރްނާއީގެ ޕްރޮވިންޝަލް ސަރުކާރުގެ އިސް އޮފިޝަލް، ސުހައިލް އަންވަރު ހާޝިމީ ވިދާޅުވީ މަރުވި 20 މީހުންގެ ތެރޭގައި އަންހެނަކާއި ހަ ކުޑަކުދިން ހިމެނޭ ކަމަށާއި 200 އަށް ވުރެ ގިނަ މީހުންނަށް އަނިޔާވި ކަމަށެވެ.
"އަވަށުގެ ބޭރުގައި ހުންނަ މައިނެއްގެ ތެރޭގައި 15 މީހުން ތާށިވެފައިވާ ކަމަށް ރިޕޯޓުތައް ބުނޭ،" އޭނާ ވިދާޅުވި އެވެ.
ރޭގަނޑުގެ ވަގުތުގައި ފިނިހޫނުމިން ދަށްވުމުން މައިނުގައި މަސައްކަތް ކުރާ މީހުން ވަޒީފާ އަށް ނުކުތުމަކީ ޕާކިސްތާނުގައި އާއްމު ކަމެކެވެ.
މައިނު ކައިރިއަށް މީހުން ސަލާމަތް ކުރާ ޓީމެއް ފޮނުވަން މަސައްކަތް ކުރަމުން ދާއިރު، އެ ޓީމަށް އެހީވުމަށާއި އަނިޔާވެފައިވާ މީހުން އިވެކުއޭޓް ކުރުމަށް ހެލިކޮޕްޓަރެއް ފޮނުވަން ހަމަޖެހިފައި ވެ އެވެ.
ބަލޮޗިސްތާނުގެ ޕްރޮވިންޝަލް ޑިޒާސްޓާ މެނޭޖްމަންޓް އޮތޯރިޓީގެ ވެރިޔާ ނަސީރް ނަސަރް ވިދާޅުވީ މަރުވި މީހުންގެ އަދަދު އިތުރުވުން އެކަށީގެންވާ ކަމަށެވެ.
ޕާކިސްތާނު އޮންނަނީ އާއްމުކޮށް ބިންހެލުން އަންނަ ހިސާބެއްގަ އެވެ. އެގޮތުން 2015 ވަނަ އަހަރު 7.5 މެގްނިޓިއުޑް ބިންހެލުމެއްގައި ޕާކިސްތާނާއި އަފްގާނިސްތާނުން 400 މީހުން މަރުވި އެވެ.
އޭގެ ކުރިން 2005 ވަނަ އަހަރު 7.6 މެގްނިޓިއުޑްގެ ބިންހެލުމެއްގައި 73،000 މީހުން މަރުވެ، 3.5 މިލިއަން މީހުންގެ ގެދޮރު ގެއްލުނެވެ. އެ ބިންހެލުމުގެ އަސަރު އެންމެ ބޮޑަށް ކުރީ ޕާކިސްތާނުން ކޮންޓްރޯލް ކުރާ ކަޝްމީރަށެވެ.
