ރާއްޖޭގައި ދެވޭ އެންމެ ކުޑަ މުސާރައިގެ ގޮތުގައި 5،700ރ. މިނިމަމް ވޭޖް އެޑްވައިޒަރީ ބޯޑުން ކަނޑައަޅައިފި އެވެ.
ރާއްޖޭގައި ދެވޭ އެންމެ ކުޑަ މުސާރަ މިނިމަމް ވޭޖް ބޯޑުން ކަނޑައަޅައި އެ އަދަދުތައް ފާސް ކުރުމަށް މިހާރު ވަނީ ފޮނުވާފަ އެވެ.
މިނިމަމް ވޭޖް ބޯޑުގެ މެމްބަރަކު "އަދަދު"އަށް މައުލޫމާތުދިން ގޮތުގައި ބޯޑުން މިހާތަނަށް ފާސްކޮށްފައިވާ އަދަދު ތަކަކީ ކުދި، މެދު އަދި ބޮޑެތި ވިޔަފާރިތަކަށް އެކަށޭނަ ގޮތަށް ބަލައިގެން ފާސްކޮށްފައިވާ އަދަދުތަކެކެވެ.
އެގޮތުން އެންމެ ކުޑަ މުސާރައެއްގެ ގޮތުގައި ކަނޑައަޅާފައިވާ 5،700ރ. އަކީ ކުދި ވިޔަފާރިތަކުން، ދުވާލަކު އަށް ގަޑިއިރަށް ބަލައިގެން މަހަކު ދޭން ޖެހޭ މުސާރަ އެވެ.
މީގެ އިތުރުން މެދު ފަންތީގެ ވިޔަފާރިތަކުން ދުވާލަކު އަށް ގަޑިއިރު މަސައްކަތްކުރާ މުވައްޒަފުންނަށް އެންމެ ކުޑަ މުސާރައިގެ ގޮތުގައި 7،000ރ. ދޭން ޖެހޭ ކަމަށް ބޯޑުން ވަނީ ކަނޑައަޅާފަ އެވެ.
ސަރުކާރުގެ ސިވިލް ސާވިސް މުވައްޒަފުންގެ އެންމެ ކުޑަ މުސާރައިގެ ގޮތުގައިވެސް ކަނޑައަޅާފައި ވަނީ 7،000ރ. އެވެ.
ބޮޑެތި ވިޔަފާރިތަކުގައި މަސައްކަތްކުރާ މުވައްޒަފުން މަސައްކަތްކުރަނީ ދުވާލަކު އަށް ގަޑިއިރަށް ކަމަށް ބަލައިގެން މަހަކު ދޭން ޖެހޭ މުސާރައިގެ ގޮތުގައި ކަނޑައަޅާފައި ވަނީ 8،900ރ. އެވެ.
މިނިމަމް ވޭޖް ކަނޑައެޅުން ލަސްވަމުންދާ ކަމުގެ ގިނަ ޝަކުވާތަކެއް އާންމުވެފައި ވަނިކޮށް، ބޯޑުން މި އަދަދުތައް ފާސްކޮށް އިކޮނިމިކް މިނިސްޓަރަށް ފޮނުވާފައިވާއިރު، މިއަންނަ އަހަރުން ފެށިގެން މިނިމަމް ވޭޖް ތަންފީޒުކުރަން ޖެހެ އެވެ.
މިހާތަނަށް އައިރު ކަނޑައަޅާފައިވާ އަދަދުތަކުގެ ތެރޭގައި ބިދޭސީންނަށް ދޭނެ އަދަދު ކަނޑައަޅާފައި ނުވާއިރު، ބޯޑުން ވަނީ މިހާރު އިއުލާނުކޮށްފައިވާ މޮރަޓޯރިއަމް އިތުރު ފަސް އަހަރަށް ދިގު ދަންމާލަން އެދިފަ އެވެ.
އަދި ދިރާސާތައް ކުރިއަށް ގެންގޮސް އެ މުއްދަތުގައި ގައުމުގެ އިގުތިސާދީ ހާލަތައް ބަލައި ބިދޭސީންނަށް މިނިމަމް ވޭޖް ކަނޑައެޅުމުގެ ވިސްނުން ބޯޑުން ގެންގުޅެ އެވެ.
