ރާއްޖޭގެ ޖަލުތަކުގައި ކޮވިޑް-19 ގެ ކޭސްތައް ގިނަވެ، ބަލި ފެތުރެން ފެށުމާއެކު މޯލްޑިވްސް ކަރެކްޝަނަލް ސާވިސަސް އިން މިދިޔަ މޭ މަހުން ފަށައިގެން ގޭ ބަންދަށް ބަދަލުކުރަން ނިންމި ހައި ރިސްކު ގައިދީން އަލުން އަބުރާ ޖަލަށް ބަދަލުކުރުމުގައި އަދިވެސް ގޮތެއް ނިންމާފައިނުވާކަމަށް ކޮމިޝަނާ އޮފް ޕްރިސަން އަހުމަދު މުހައްމަދު ފުޅު ވިދާޅުވެއްޖެ އެވެ.
ކަރެކްޝަންސްގެ ބެލުމުގެ ދަށުގައި ހުރި ޖަލުތަކުގައި ކޮވިޑް-19 ފެތުރެން ފެށުމާއެކު ހައި ރިސްކު ގައިދީން ގޭބަންދަށް ބަދަލުކުރަން ނިންމީ ކަރެކްޝަންސްގައި ހުރި ލިޔުންތަކަށް ބަލައިގެން ދާއިމީ ބަލިތަކަށް ފަރުވާ ހޯދާ ގައިދީންނާއި، ސާޖަރީ ހަދާފައި ތިބި ގައިދީންނެވެ.
އެ ނިންމުމަށް މިހާރު ތިން މަސް ފާއިތުވެފައިވާއިރު، ރާއްޖޭގައި ކޮވިޑުގެ ހާލަތު ވަނީ ވަރަށް ބޮޑަށް ހަމަޔަކަށް އެޅިފަ އެވެ.
އަދި ސިޔާސީ ޕާޓީތަކުގެ އެކި ޖަލްސާތަކާއި ހަރަކާތްތައް އަދި ބައެއް ކަހަލަ ކުޅިވަރު މުބާރާތްތަކަށް ވެސް މިހާރު ހުއްދަދެމުންދާއިރު، ގޭ ބަންދުގައި ތިބި ގައިދީން އަބުރަ ޖަލަށް ބަދަލުކުރުމުގެ އިޝާރާތެއް ކަރެކްޝަންސްގެ ފަރާތުން ނުފެންނާތީ ބައެއް ފަރާތްތަކުން ދަނީ ފާޑުކިޔަމުންނެވެ. ޖަލުގައި ތިބޭ ގައިދީންނާއި ގުޅޭ އެކަހަލަ ނިންމުންތައް ނިންމަނީ ކަރެކްޝަންސްއިންނެވެ.
އެ މައްސަލައިގަ ކޮމިޝަނަރު އޮފް ޕްރިޒަންސް އަހުމަދު މުހައްމަދު ފުޅު "އަދަދު" އަށް ވިދާޅުވީ، އަދި ހައި ރިސްކު ގައިދީން އަބުރާ ޖަލަށް ބަދަލުކުރަން ކަރެކްޝަންސްއިން ނުނިންމާކަމަށެވެ.
"އެއީ ބޮޑަށް އެކަމުގައި ވަށައިގެންވާ ކަންކަމަށް ބަލާފައި އަދި އެގޮތަށް އެ ހައި ރިސްކު ގައިދީން ގެޔަށް ބަދަލު ކުރަން ވަކި ގޮތެއް ނުނިންމަނީ،" ކޮމިޝަނަރު އަހުމަދު ވިދާޅުވި އެވެ.
އޭނާ ވިދާޅުވި ގޮތުގައި އަދިވެސް މާފުށި ޖަލު ފަދަ ތަންތަނުގައި ކޮވިޑުގެ ހާލަތު އެބަ އޮތެވެ. އެގޮތުން މިއަދު ވެސް މާފުށި ޖަލުން ވަނީ ކޮވިޑުގެ ކޭސްއެއް ފެނިފަ އެވެ.
އަދި މިހާރު ކޮވިޑުގެ ހާލަތު ޖަލުތަކުގައި ރަނގަޅުވެފައިވީނަމަވެސް ބަލި ފެތުރުނަ ނުދިނުމަށް ކަރެކްޝަންސްއިން ދަނީ މަސައްކަތްކުރަމުންނެވެ.
ކަރެކްޝަންސްއިން ބުނި ގޮތުގައި އަދިވެސް ގައިދީން އަބުރާ ޖަލަށް ބަދަލުކުރަން އެންމެ ރައްކާތެރިއެއް ނޫނެވެ.
މިއަދު ފެނުނު ކޭސްއާއެކު މިވަގުތު މާފުށި ޖަލުގައި އެކްޓިވް ތިން ކޭސް އެބަ އެބައޮތެވެ. މިއަދު ފެނުނު ކޭސްއަކީ މިދިޔަ މަހުގެ ފަހުކޮޅު ފެނުނު ކޭސްތަކަށްފަހު ފެނުނު ފުރަތަމަ ކޭސް އެވެ. މިދިޔަ މަހުގެ ފަހުކޮޅު ފެނުނު ދެ ކޭސް މިވަގުތު ކަރަންޓީނުގައި ތިބިއިރު، މިއަދު ފެނުނު ކޭސް ވެސް މިހާރު ވަނީ ކަރަންޓީނުގަ އެވެ.
އެހެންނަމަވެސް މި ކޭސްތަކާއި ހެދި ޖަލުގައި ތިބޭ ގައިދީންނަށް ނުރައްކާ ހުރި މިންވަރެއް އަދި ސާފެއް ނުވެ އެވެ.
