ދިވެހި ސިވިލް ސާވެންޓް އެސެސޯސިއޭޝަނުން ސިވިލް ސާވެންޓުންގެ ހައްގުގައި ކުރަމުންދާ އެއްވެސް މަސައްކަތެއް ހުއްޓާނުލާނެ ކަމަށް އެ ޖަމިއްޔާއިން ބުނެފި އެވެ.
ސިވިލް ސާވެންޓުން ވަނީ މިދިޔަ ހޮނިހިރު ދުވަހުން ފެށިގެން މުސާރަ މައްސަލައިގައި އިހުތިޖާޖެއް ފަށައިފަ އެވެ. ދިވެހި ސިވިލް ސާވެންޓު އެސޯސިއޭޝަނުން އިސްނަގައިގެން މުޅި ރާއްޖޭގައި ކުރިއަށްގެންދާ އެ ހަރަކާތަކީ މުވައްޒަފުންގެ މުސާރައިގެ މައްސަލަތައް ސަރުކާރުގެ ސަމާލުކަމަށް ގެނައުމަށް ފަށާފައިވާ ހިމޭން އިހުތިޖާޖެކެވެ.
އެގޮތުން ފުރަތަމަ ދުވަހު ވަޒީފާއަށް ނުކުމެފައި ވަނީ ކަޅުހެދުމުގަ އެވެ. އަދި އިއްޔެ އިން ފެށިގެން އޮފީސްތަކަށް ނުކުތް ނަމަވެސް, މަސައްކަތް ނުކުރަން ވަނީ ނިންމައިފަ އެވެ.
އެކަމުގައި ބައިވެރިވި ސިވިލް ސާވިސްގެ މުވައްޒަފުންގެ ތެރޭގައި ރާއްޖޭގެ 98 ޕަސެންޓު ރަށްރަށުގެ މުވައްޒަފުން ބައިވެރިވި ކަމަށް އެ ކަމުގައި އިސްކޮށް ހަރަކާތެރިވާ އެސޯސިއޭޝަނުން ބުންޏެވެ.
އެކަމާ ގުޅިގެން ސަރުކާރުން ބުނެފައި ވަނީ ސިވިލް ސާވެންޓުންގެ މުސާރައިގެ ކަންބޮޑުވުންތައް ހައްލު ކުރުމަށް އެކުލަވާލަމުން އަންނަ މުސާރައާ ބެހޭ އާ އޮނިގަނޑަށް އަމަލު ކުރަން ފެށޭނީ އަންނަ އަހަރު ކަމަށެވެ.
އިހުތިޖާޖުގައި އިސްކޮށް ހަރަކާތްތެރިވާ ފަރާތްތަކުން "އަދަދު" އަށް މައުލޫމާތު ދެމުން ބުނީ އެ އިހުތިޖާޖު ހުއްޓާލާނީ މުވައްޒަފުންގެ ޑިމާންޑުތަކަށް މި މަހުގެ ނިޔަލަށް ހައްލެއް ހޯދަދޭނެ ކަމަށް ސަރުކާރުން ބުނުމުން ކަމަށެވެ.
"ލައްކަ ދުވަހު ބަހެއް ނުބުނެ ހުރެވިއްޖެ. އަންނަ އަހަރު، އަންނަ އަހަރޭ ކިޔައިގެން މިފަހަރު ފުއްދައެއް ނުލެވޭނެ،" މައުލޫމާތު ދިން މީހާ ބުންޏެވެ.
ސިވިލް ސާވިސް މުވައްޒަފުން އެދޭ ބައެއް ކަންކަމުގެ ތެރޭގައި:
- މިނިމަމް ވޭޖު އެއީ އަސާސީ މުސާރަ ކަމަށް ކަނޑަ އަޅައިދިނުން.
- ސެސް 1 އިން އެމްއެސް 1 އަށް މުސާރަ ބޮޑުކުރުން.
- މަގާމްތަކަށް ސެޓްފިކެޓް ކުރިއެރުން ލިބޭނެ ގޮތް ހަމަޖެއްސުން.
- ލިވިން އެލަވަންސް ލިބޭނެގޮތް ހަމަޖެއްސުން.
އޭނާ ބުނީ ސްކޫލުތަކުގެ މުވައްޒަފުންވެސް އެ ހަރަކާތުގައި ބައިވެރިވަމުންދާތީ އިއްޔެ އެޑިޔުކޭޝަން މިނިސްޓްރީ ހުރިހާ ސްކޫލުތަކެއްގެ ޕްރިންސިޕަލުންނާ ބައްދަލުކޮށް މަޝްވަރާ ކޮށްފައިވާ ކަމަށެވެ.
"އިހުތިޖާޖު ކުރަން ފުރުސަތު ނުދޭން އަންގާފަ އޮތީ. ބައެއް މުވައްޒަފުންނަށް ވަޒީފާގެ ބިރުދައްކަމުން ދަނީ،" އޭނާ ބުންޏެވެ.
މި މަހުގެ ނިޔަލަށް ވަކި ގޮތެއް ނިންމައި ދިނުމަށް މުވައްޒަފުން ބުނަމުންދާއިރު، ދައުލަތުގެ ހުރިހާ ފަންނުތަކެއް ހިމެނޭގޮތަށް ޕޭ ކޮމިޝަނުން އެކުލަވާލާ އެއްހަމަ ޕޭ ފްރޭމްވޯކްގެ މަސައްކަތް މިހާރު އޮތީ ފަހު މަރުހަލާގައި ކަމަށް ސިވިލް ސާވިސް ކޮމިޝަނުން ވަނީ ބުނެފަ އެވެ.
އޭރަށް މުސާރަ ކަނޑައަޅާއިރު މަގާމުގެ މަސްއޫލިއްޔަތު އަދާ ކުރުމަށް އިލްމާއި ގާބިލްކަމާއި މަސައްކަތުގެ ބުރަކަމުގެ އިތުރުން މަސައްކަތު މާހައުލުގައި ކުރިމަތިލާން ޖެހޭނެ ބުރަތަކަށް ރިއާޔަތް ކުރާނެ ކަމަށް ވެސް ކޮމިޝަނުން ބުނެ އެވެ.
މިނިމަމް ވޭޖެއް ކަނޑައަޅައި މިއަހަރު އިއުލާން ކުރާނެ ކަމަށް ވެސް ކޮމިޝަނުން އިއްޔެ ބުންޏެވެ. އޭރަށް ސިވިލް ސާވިސްގައި ހިމެނޭ އެންމެ ދަށް ފަންތީގެ މުވައްޒަފުންނަށް ލިބޭ އިނާޔަތްތަކަށް ހެޔޮ ބަދަލެއް އަންނާނެ ކަމަށް ވެސް ކޮމިޝަނުން ބުނެ އެވެ.
