ރަސްފަންނަށް ލީކްވެފައިވާ ތެޔޮތައް ވަރަށް ބޮޑަށް ސާފު ކުރެވިއްޖެ ކަމަށާއި ނަމަވެސް އަދިވެސް އެ ސަރަހައްދަށް މޫދަށް އެރެން ހުޅުވާލެވޭނެ ދުވަހެއް ނޭނގޭ ކަމަށް، އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފި އެވެ.
އެ ސަރަހައްދަށް ތެޔޮ ޖަމާވުމާ ގުޅިގެން ރަސްފަންނު ބަންދު ކުރީ މިދިޔަ ބުރާސްފަތި ދުވަހުގެ ހަވީރު ވަރަށް ކުއްލި ގޮތަކަށެވެ. އެވަގުތު މޫދަށް އެރި ތިބި މީހުން ބާލުވައި، ފުލުހުންނާއި ސިފައިން ވަނީ އެއްގަމާއި މޫދު ބަލައި ފާސްކޮށްފަ އެވެ. އަދި ސިފައިން ވަނީ އެ ސަރަހައްދުން ތެޔޮތައް ނެގުމުގެ މަސައްކަތް ފަށައިފަ އެވެ.
އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް، "އަދަދު" އަށް ވިދާޅުވީ މިހާރު އެ ސަރަހައްދު މޫދުން ތެލުގެ އަސަރު ނުފެންނަ ކަމަށެވެ. ނަމަވެސް އަދިވެސް ތެޔޮ ހުރެދާނެތީ އިތުރަށް ބަލަމުން އަންނަ ކަމަށް އޭނާ ވިދާޅުވި އެވެ.
"ފަހަރެއްގައި ގާތަކުގައި ހަރުވެފައި ހުރި ތެޔޮ ލީކް ވެދާނެ. އެ ފުރުސަތު އެބައޮތް. އެހެންވެ ބަލަމުން މިދަނީ،" ނައީމް ވިދާޅުވި އެވެ.
އޭނާ ވިދާޅުވީ އެއީ ގިނަ ބަޔަކު ބޭނުން ކުރާ ސަރަހައްދަކަށް ވާއިރު ވީހާވެސް އަވަހަކަށް ހުޅުވޭތޯ މަސައްކަތް ކުރައްވާނެ ކަމަށެވެ. ނަމަވެސް އަދި ހުޅުވޭނެ ދުވަހެއް ދަންނަވަން ނޭނގޭ ކަމަށް ވިދާޅުވި އެވެ.
ރަސްފަންނަނީ މާލެ ވަށައިގެން ޖަހާފައި ތޮށިގަނޑު ތަޅާލުމަށްފަހު މޫދުން ބައެއް ހިއްކައިގެން ހަދާފައިވާ ތަނެކެވެ. ގާތްގަނޑަކަށް 150،000 އަށް ވުރެ ގިނަ މީހުން ދިރިއުޅޭ ތޮއްޖެހިފައިވާ މާލޭގައި ދިރިއުޅޭ ވަރަށް ގިނަ ބަޔަކު ރަސްފަންނު ބޭނުން ކުރެ އެވެ.
