ސިވިލް ސާވީސް މުވައްޒަފުންގެ މުސާރަ މައްސަލައިގައި ގެންގުޅޭ ތަފާތުކުރުމުގެ ސަބަބުން ގިނަ އަދަދެއްގެ މުވައްޒަފުން ކަޅު ހެދުމުގައި މިއަދު ވަޒީފާއަށް ނުކުމެއްޖެ އެވެ.
ދިވެހި ސިވިލް ސާވެންޓު އެސޯސިއޭޝަނުން އިސްނަގައިގެން މުޅި ރާއްޖޭގައި ކުރިއަށްގެންދާ އެ ހަރަކާތަކީ މުވައްޒަފުންގެ މުސާރައިގެ މައްސަލަތައް ސަރުކާރުގެ ސަމާލުކަމަށް ގެނައުމަށް ބާއްވާ ހިމޭން އިހުތިޖާޖެކެވެ.
އޭގައި ބައިވެރިވުމުގެ ރާއްޖޭގެ އެކި ރަށްރަށުގައި މަސައްކަތްކުރާ ގިނަ އަދަދެއްގެ ސިވިލް ސާވެންޓުންވެސް ވަޒީފާއަށް މިއަދު ނުކުމެފައިވަނީ ކަޅު ހެދުމުގައި އެވެ.
ސިވިލް ސާވެންޓް މުވައްޒަފެއް އިހުތިޖާޖަށްނިކުމެ-- ފޮޓޯ: ދިވެހި ސިވިލް ސާވެންޓްސް އެސީސިއޭޝަން
އެގޮތުން ރަށްރަށުގެ ކައުންސިލްތަކާއި ހޮސްޕިޓަލާއި ސްކޫލުތަކުގެ އިތުރުން އެހެން ބައެއް އިދާރާތަކުގެ ސިވިލް ސާވެންޓް މުވައްޒަފުން ކަޅު ހެދުމުގައި ނުކުތެވެ. އަދި މާލޭގައި ސަރުކާރު އޮފީސްތަކުގެ ގިނަ މުވައްޒަފުންގެ ވެސް ނިކުމެފައި ވަނީ ކަޅު ހެދުމުގަ އެވެ.
އެ އިހުތިޖާޖާ ގުޅިގެން ސަރުކާރުން އެއްވެސް އިޖާބައެއް ނުލިބިއްޖެނަމަ މާދަމާ މުވައްޒަފުން މަސައްކަތަށް ނުނިކުންނާނެކަން އެ އެސޯސިއޭޝަނުން ވަނީ އިއުލާނުކޮށްފަ އެވެ.
ސިވިލް ސާވިސް މުވައްޒަފުން އެދޭ ބައެއް ކަންކަމުގެ ތެރޭގައި:
- ސެޓެފިކެޓަށް ވަޒީފާގެ ކުރިއެރުން ދިނުން.
- ސިޔާސީ މަގާމުތަކުގައި ތިބޭ މީހުންނަށް ލިވިން އެލަވެންސް ދޭ ގޮތަށް ސިވިލް ސާވިސް މުވައްޒަފުންނަށްވެސް ލިވިން އެލަވެންސް ދިނުން.
- ދަށް ފަންތީގެ މުވައްޒަފުންގެ މުސާރަ ބޮޑުކުރުން.
- އެންމެ ކުޑަ އުޖޫރަ ކަނޑައެޅުން އަވަސްކުރުން.
- ސުކޫލުތަކުގެ އިދާރީ މުވައްޒަފުންނަށް އިތުރު އެލަވެންސް ދިނުން.
ސިވިލް ސާވީސް މުވައްޒަފުން އިހުތިޖާޖަށް ނިކުތީ މުސާރައިގެ މައްސަލާގައި ހައްދު ހޯދަން ކަމަށްބުނެ-- ފޮޓޯ: ދިވެހި ސިވިލް ސާވީސް އެސޯސިއޭޝަން
މުސާރައިގެ މައްސަލައިގައި ސިވިލް ސާވެންޓުން އިހުތިޖާޖަށް ނުކުންނަން ނިންމިއިރު، ޕައިލެޓުންގެ މުސާރަ އާއި ޑޮކްޓަރުންނާއި ނަރުހުންނަށް ވަޒީފާގެ ކުރިއެރުން ނުލިބި ލަސްވަމުންދާތީ ރައީސް އިބްރާހިމް މުހައްމަދު ސޯލިހާ ވަނީ ބައްދަލުކުރައްވާފަ އެވެ. އެ މައްސަލަތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ވެސް ރައީސް ވަނީ ދެއްވައިފަ އެވެ.
ސިވިލް ސާވެންޓުންގެ މުސާރަ ބޮޑު ކުރުމަށް އަންނަ އަހަަރުގެ ދައުލަތުގެ ބަޖެޓްގައި ހިމަނާނެ ކަމަށް ރައީސް ވަނީ ވިދާޅުވެފަ އެވެ.
