މާލޭގައި މުލިއާގެ ކައިރީގައި މާރާމާރީއެއް ހިންގައި މީހަކު ޒަހަމްކޮށްލައިފި އެވެ.
ފުލުހުން ބުނި ގޮތުގައި މިރޭ އަށެއް ޖަހަނިކޮށް މުލިއާގޭ ކައިރީގައި ހިނގި މާރާމާރީގައި ފިރިހެނަކަށް ވަނީ އަނިޔާވެފަ އެވެ.
މާރާމާރީ ހިނގަން މެދުވެރިވި ސަބަބެއް ސާފެއް ނޫނެވެ.
އަނިޔާވި މީހާއަށް މިހާރު އައިޖީއެމްއެޗުގައި ފަރުވާ ދެމުންދާ ކަމަށެވެ. ނަމަވެސް, އައިޖީއެމްއެޗުން ޖަވާބު ނުދޭތީ, އެމީހާއަށް ލިބުނު އަނިޔާގެ ތަފްސީލާއި އެމީހާގެ ހާލަތެއް ސާފެއް ނޫނެވެ.
މާލޭގައި މިރޭ މާރާމާރީއެއް ހިނގިތާ ކުޑަ އިރުކޮޅެއް ފަހުން އައްޑޫ ސިޓީގައި ވެސް މާރާމާރީއެއް ހިނގާފައިވެ އެވެ.
ފުލުހުން މައުލޫމާތު ދިން ގޮތުގައި އައްޑޫގައި މިރޭ ޒަހަމްކޮށްލާފައިވަނީ ސައިކަލެއްގައި ތިބި ދެ މީހަކަށެވެ. އެ ދެ މީހުންނަށް ހަމަލާދީފައިވަނީ ދުއްވާފައި ދިޔަ ސައިކަލެއްގައި އިން އެހެން މީހަކު ތޫނު އެއްޗެއް ބޭނުން ކޮށްގެންނެވެ.
އަނިޔާވެފައިވަނީ 27 އަހަރާއި 23 އަހަރުގެ މީހަކަށެވެ. އެ ދެ މީހުންނަށް ވެސް މިހާރު ގެންދަނީ ހޮސްޕިޓަލްގައި ފަރުވާދެމުންނެވެ. ނަމަވެސް, އެމީހުންނަށް ލިބިފައިވާ އަނިޔާގެ ތަފްސީލެއް އަދި ނުލިބެ އެވެ.
އައްޑޫގައި މިއަދު ފުރަތަމަ މާރާމާރީ ހިނގީ ފްލެޓެއްގެ ތެރޭ ހުކުރު ވަގުތުގަ އެވެ. އެ މާރާމާރީގައި ޒަހަމްވި 29 އަހަރުގެ މީހާގެ ބޮލަށް އެކި ވަރުގެ އަނިޔާތައް ލިބިފައިވެ އެވެ.
އެމީހާ ވެސް ގެންދަނީ އިކްއަޓޯރިއަލް ހޮސްޕިޓަލުގައި ފަރުވާދެމުންނެވެ.
