ރާއްޖޭގެ ސްކޫލުތަކުގައި ގްރޭޑް އެކެއްގެ ދަރިވަރުންނަށް ކިޔަވައިދޭން ބޭނުންކުރާ ގުރުއާން ޓެކްސްޓް ފޮތްތަކުގައި ހިމެނޭ ދެ ސޫރަތެއްގެ އާޔަތްތަކެއް އެއްވެފައިވާ މައްސަލައެއް ފެންމަތިވެއްޖެ އެވެ.
އެއްވެފައިވަނބީ ސޫރަތުއް ނާޒިއާގެ ބައެއް އާޔަަތްތަކާއި ސޫރަތުއް ނަބާގެ ބައެއް އާޔަތްތަކެކެވެ. އެގޮތުން ސޫރަތުއް ނާޒިއާގެ އަށް ވަނަ އާޔަތުން ފެށިގެން 13 ވަނަ އާޔަތާހަމަޔަށް ސޫރަތުއް ނަބާގެ ތެރެއަށް ވަނީ އެއްކުރެވިފަ އެވެ. ސޯޝަލް މީޑިއާގައި އާންމުވެފައިވާ ފޮތްތަކުގެ ފޮޓޯތަކުން ފެންނަ ގޮތުގައި އެއްވެފައިވާ އާޔަތްތަކުގައި އަރަބިން ލިޔެފައިވާ އާޔަތް ނަންބަރުތައް ހުރީ ނުބައިކޮށެވެ.
މިކަމާ ގުޅިގެން އެޑިއުކޭޝަން މިނިސްޓްރީއިން ނެރުނު ބަޔާނެއްގައި ބުނެފައިވަނީ ދެ ސޫރަތެއްގެ އާޔަތްތައް އެއްވެފައިވާ މައްސަލަ މިނިސްޓްރީއަށް ފާހަގަކުރެވުނު ހިސާބުން އެކަން ހައްލުކުރުމަށް ނެޝަނަލް އިންސްޓިޓިއުޓް އޮފް އެޑިއުކޭޝަނުން މަސައްކަތް ފަށާފައިވާކަމަށެވެ. އަދި މައްސަލަ ދިމާވި ސަފްހާތައް ބަދަލުކުރުމުގައި އަމަލުކުރަންޖެހޭ ގޮތް ސްކޫލުތައް މެދުވެރިކޮށް އެ މިނިސްޓްރީން ބެލެނިވެރިންނަށް އަންގަމުންގެންދާނެ ކަމަށް ބުންޏެވެ.
"މި ފޮތްތަކަކީ ޕްރިންޓް ކުރުމުގެ ކުރިން އެންއައިސީ އާއި މިނިސްޓްރީ އޮފް އިސްލާމިކް އެފެއާޒްއިން ޗެކްކުރެވިފައިވާ ފޮތްތަކެކެވެ. މި ފޮތްތަކުގައި މައްސަލަ ދިމާވި ސަބަބު ދެނެގަތުމަށްވެސް މިހާރުވަނީ މަސައްކަތް ފައްޓާފަ އެވެ،" މިނިސްޓްރީގެ ބަޔާނުގައިވެ އެވެ.
އިސްލާމިކް މިނިސްޓްރީގެ އޮފިޝަލަކު "އަދަދު" އަށް ވިދާޅުވީ ގްރޭޑް އެކެއްގެ ފޮތްތަކުގެ މައްސަލަ އެ މިނިސްޓްރީގެ ސަމާލުކަމަށް ވެސް އައިސްފައިވާ ކަމަށާއި އަދި މާދަމާ އެކަމާ ގުޅޭ ގުޅޭގޮތުން ވަކި އެއްޗެއް ބުނަން އެނގޭނެ ކަމަށެވެ. އަދި މިހާތަނަށް ބެލި ބެލުމުން އެއްވެފައިވަނީ ނާޒިއާ ސޫރަތާއި ނަބާ ސޫރަތުގެ އާޔްތަކެއްކަމަށް އެ އޮފިޝަލް ވެސް ވިދާޅުވި އެވެ. އެކަން އެހެން ވާން މެދުވެރިވީ ކިހިނެތްތޯ ބެލުމުގެ މަސައްކަތް މިހާރު އެ މިނިސްޓްރީން ވެސް ކުރަމުންދާކަމަށް އެ އޮފިޝަލް ވިދާޅުވި އެވެ.
