ގުރޭޑު އެކެއްގެ ކޮންމެ ދަރިވަރަކަށް ކްރިއޭޓިވް އާޓް މާއްދާގެ ފޮތް ނޯންނާނެ ކަމަށާއި، ކިޔަވައި ދޭނީ ކޮންމެ ފަސް ކުއްޖަކަށް އެއް ފޮތުން ކަމަށް އެޑިއުކޭޝަން މިނިސްޓްރީން ބުނެފި އެވެ.
މި އަހަރު ކިޔަވައިދޭ މުގައްރަރުތައް އިސްލާހުކޮށްފައިވާއިރު، ގުރޭޑު 1ގައި ކިޔަވައިދިނުމަށް ހަމަޖެހިފައި ވަނީ ގެނެވުނު އިސްލާހާ އެއްގޮތަށް ތައްޔާރުކޮށްފައިވާ އާ ފޮތް ބަޔަކުންނެވެ.
އެޑިއުކޭޝަނުން ބުނީ މި އަހަރާއި ކުރިޔަށް އޮތް އަހަރުތަކުގައި ވެސް ގުރޭޑު އެކެއްގައި ކިޔަވާ ދަރިވަރުންނަށް ކްރިއޭޓިވް އާޓް ކިޔަވައިދިނުމަށް ބޭނުން ކުރުމަށް ހަމަޖެހިފައި ވަނީ މުދައްރިސުންގެ ފޮތަކާއި ނަމޫނާ ފޮތްތައް ކަމަށެވެ.
"ކުލާހުގައި ހާއްސަކޮށް ގުރޫޕުތަކުގައި ބޭނުން ކުރުމަށް، ތައްޔާރު ކޮށްފައިވާ ސައިޒުގެ ގޮތުން ބޮޑު ހާއްސަ ރެފަރެންސް ފޮތެެއް. އެ ފޮތް ބޭނުން ކުރުމަށް ހަމަޖެހިފައިވަނީ 5 ދަރިވަރުންގެ ގްރޫޕްތަކުގައި،" އެޑިއުކޭޝަނުން ބުންޏެވެ.
އެގޮތަށް ނިންމާފައި ވަނީ އެ މާއްދާއަކީ އެހެން މާއްދާތަކާ ހިލާފަށް މާއްދާގެ ފަންނީ ހުނަރުތައް ތަރައްގީ ކުރުމަށްޓަކައި ގިނަ އަމަލީ މަސައްކަތްތަކެއް ކުރުވާ ފަންނީ މާއްދާއަކަށް ވާތީ ކަމަށް މިނިސްޓްރީން ބުންޏެވެ.
