ރައީސުލްޖުމްހޫރިއްޔާގެ ރަސްމީ ގެކޮޅު، މުލީއާގެ ކައިރީގައި ހުރެ އެތަން ގޮއްވާލާނެ ކަމަށް އަނގަބަހުން އިންޒާރު ދިން މައްސަލައިގައި ހައްޔަރުކުރި މީހާގެ މައްޗަށް ދައުވާ ނުކުރަން ޕްރޮސިކިއުޓަ ޖެނަރަލްގެ އޮފީހުން ނިންމުމުން އޭނާ ދޫކޮށްލައިފި އެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ ޕީޖީ އޮފީހުން އެ ގޮތަށް ނިންމުމުން އޭނާ ބަންދުން ދޫކޮށްލީ މިދިޔަ ބުރާސްފަތި ދުވަހެވެ. އެއީ އޭނާ ބަންދުގައި ބަހައްޓާފައި ހުންނަތާ ގާތްގަނޑަކަށް ދޮޅުމަސް ފަހުންނެވެ.
މިދިޔަ ޖުލައި 9 ގައި މުލީއާގެ ކައިރިއަށް އަތް ދަބަހާއި ކަރުދާސް ފޮށިގަނޑަކާއި ކޮތަޅުތަކަކާއެކު ގޮސް ގަނޑުވަރު ގޮއްވާލާނެ ކަމަށް ބުނި މައްސަލައިގައި ހައްޔަރުކޮށްފައި ހުރީ ވ. ރީތިބަހާރު، މުހައްމަދު ޝިއުނީޒް އިބްރާހީމް، 28، އެވެ.
އިންޒާރު ދިން ވަގުތު ޝިއުނީޒާއެކު އިތުރު މީހަކު ވެސް ހުއްޓެވެ. އަދި ފުލުހުން އޭނާ ހައްޔަރު ވެސް ކުރި އެވެ. އެކަމަކު އޭނާގެ ބަންދުގެ މުއްދަތު އިތުރުކޮށްފައެއް ނުވެ އެވެ.
މުލިއާގެ ގޮއްވާލާނެ ކަމަށް ބުނެ އިންޒާރުދިނީ ކުރީގެ ރައީސް މުހައްމަދު ނަޝީދު އަވަހާރަކޮށްލަން މާލޭގެ އެންމެ ތޮއްޖެހިފައިވާ އެއް މަގު ކަމަށްވާ މަޖީދީ މަގުގައި ވަރުގަދަ ބޮމެއް ގޮއްވާލިތާ މަހެއްހާ ދުވަސް ފަހުންނެވެ.
ޝިއުނީޒް ހައްޔަރު ކުރިއިރު ރިޔާސީ ގަނޑުވަރާއި ރައްޔިތުންގެ މަޖިލީހާއި ސުޕްރީމް ކޯޓާއި މާލޭގެ ޔުޓިލިޓީ ހިދުމަތްދޭ ތަންތަނުގެ ސަލާމަތީ ކަންކަން އޮތީ ވަރަށް ވަރުގަދަކޮށްފަ އެވެ.
ނަޝީދު އަވަހާރަކޮށްލަން ބޮން ގޮއްވާލާފައި ވަނީ ގެކޮޅުން ނުކުމެވަޑައިގެން ކާރުކޮޅަށް ހަމައަށް ވަޑައިގެންނެވި ތަނުންނެވެ. ބޮން ގޮއްވާލާފައި ވަނީ އެ ހަރުކޮށްފައި އިން ސައިކަލާ ނަޝީދު އެންމެ ކައިރިވި ވަގުތު ބެލުމަށްފަހު ރިމޯޓެއް ބޭނުންކޮށްގެނެވެ.
ބޮން ގޮވުމާއެކު އެއަށް އަޅާފައި ހުރި ބެއަރިން ބޯޅައިގެ 10 ފުށް ނަޝީދުގެ ހަށިކޮޅު ފޫއަޅުވާލި އެވެ. އަދި ބޮން ހަރުކޮށްފައި އިން ވޭވް ސައިކަލުގެ ޕްލާސްޓިކް ކޮޅެއް ވެސް އެމަނިކުފާނުގެ ހަށިގަނޑަށް ވަނެވެ. ނަޝީދުގެ ފުރާނަ ސަލާމަތްވީ މެދުނުކެނޑި 16 ގަޑިއިރު ވަންދެން އެމަނިކުފާނުގެ ހަށިކޮޅުގައި އޭޑީކޭ ހޮސްޕިޓަލުގެ ޑޮކްޓަރުންގެ ޓީމަކުން ކުރެއްވި ސާޖަރީތަކަކަށްފަހު އެވެ.
