ރައްޔިތުންގެ މަޖިލީހުގެ މި ހިނގާ ތިންވަނަ ދައުރަށް ސަރުކާރުގެ ފަރާތުން ހުށަހަޅަން ނިންމާފައިވާ ބިލުތައް ފޮނުވުން ލަސްވާނަމަ، މަޖިލީހުގެ ތަޅުމުގައި ކުރާނެ މަސައްކަތެއް ނެތް ކަމަށް މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެ އެވެ.
މި ދައުރަށް ސަރުކާރުން ހުށަހަޅަން ގަސްދުކުރާ ބިލުތަކުގެ ލިސްޓު މިއަދުގެ ޖަލްސާގައި އިއްވެވުމަށްފަހު ރިޔާސަތުގައި އިންނެވި އީވާ ވިދާޅުވީ މި ހިނގާ ދައުރުގައި ގިނަ މަސައްކަތްތައް ހުރީ ކޮމިޓީ މަރުހަލާގައި ކަމަށެވެ.
އޭގެ ތެރެއިން އެއް ބިލަކީ މިއަދު ހުށަހަޅައި ބަހުސްކުރަން ފެށި، ޖަނަވާރުގެ ސިއްހަތާ ބެހޭ ބިލެވެ. ދެން ތަޅުމުގައި ބަހުސް ކުރަން އޮތީ އިތުރު ދެ ބިލުކަން އީވާ ފާހަގަކުރެއްވި އެވެ.
އެއީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނަށް އިސްލާހު ގެނައިމުގެ ބިލާއި އުފަންވުމާއި މަރުވުން ރަޖިސްޓަރީކުރުމާއި އުފަންދުވަހުގެ ސެޓްފިކެޓް އަދި ދިވެހިރައްޔިތެއްކަން އަންގައިދޭ ކާޑު ހެއްދުމާބެހޭ ބިލުގެ ބަހުސެވެ.
"އެނގިވަޑައިގަންނަވާނެ މިދިޔަ ދައުރު ނިންމާފައި އަޅުގަނޑުމެން ދިޔައީ ބަހުސް މަރުހަލާގައި ނުވަތަ ދެވަނަ ކިއުމާ ހަމައިގައި ހުރި ގިނަަ ބިލުތަކެއް، ގާތްގަނޑަކަަށް ހުރިހާ ބިލުތަކެއްގެ މަސައްކަތް ނިންމާފައި. އެހެންވެ އިއްޔެ ވެސް އަޅުގަނޑު ދެންނެވީ މި ދައުރުގެ މައިގަނޑު މަސައްކަތް މި ވަގުތު ކުރެވެން އޮތީ ކޮމިޓީ މަރުހަލާގައޭ،" އީވާ ވިދާޅުވި އެވެ.
ބަންޑަރަނައިބުގެ އޮފީހުން ހާމަކޮށްފައިވާ މައުލޫމާތައް ބަލާއިރު، އިއްޔެ ފެށުނު މަޖިލީހުގެ ތިން ވަނަ ދައުރަށް އެކި ދާއިރާތަކުން ޖުމްލަ 32 ބިލެއް ހުށަހަޅަން ވަނީ ނިންމައިފަ އެވެ.
އޭގެ ތެރޭގައި، ގާނޫނީ އަދި ޝަރުއީ ދާއިރާއާ ގުޅުންހުރި ބިލުތަކާއި، ދީނީ އަދި އިޖްތިމާއީ ދާއިރާއާގުޅޭ ބިލުތަކާއި، އިގުތިސޯދީ އަދި ތިމާވެށީގެ ދާއިރާއާގުޅޭ ބިލުތައް ހިމެނެ އެވެ.
"އެހެންވީމާ އަޅުގަނޑުމެންގެ ބަހުސް މަސައްކަތް ފެށޭނީ ސަރުކާރުގެ ލެޖިސްލޭޓިވް އެޖެންޑާގެ ކުރިއަށް އޮތް، ފޮނުވަން އޮތް ބިލްތައް އަޅުގަނޑުމެންނާ ހަމައަށް އައިމަ،" އީވާ ވިދާޅުވި އެވެ.
އޭގެ ފަހުން މެންދުރު 12:00 ޖެހިއިރު މިއަދުގެ ޖަލްސާ ވެސް ކުރުކޮށްލެއްވުމަށްފަހު ނިންމަވާލެއްވީ ތަޅުމުގައި ކުރަން ހުރި މަސައްކަތް ނިމުނީކަމަށް އިއުލާނުކުރެއްވުމަށްފަހު އެވެ.
އެ ބިލުތައް ސަރުކާރުން ފޮނުވަންދެން، ތަޅުމުގައި ކުރާނެ މަސައްކަތެއް ނެތް ނަމަވެސް، ކޮމިޓީ މަރުހަލާގައި ހުރި ބިލުތަކުގެ މަސައްކަތް ދަނީ ކުރިއަށެވެ.
އެގޮތުން، މިއަދު ވެސް މަޖިލީހުގެ ތަފާތު އަށް ކޮމިޓީއެއްގައި ހުށަހެޅިފައިވާ މައްސަލަތައް ދިރާސާކުރުމުގެ މަސައްކަތް ވަނީ ތާވަލުކުރެވިފަ އެވެ.
