ސިކުނޑީގެ އެކިއެކި ބަލިތައް ހުންނަ މީހުންނާއި އުމުރުން ދުވަސްވީ މީހުން ބަލަހައްޓަމުން އަންނަ ކ. ގުރައިދޫ މަރުކަޒަށް ނަފްސާނީ ބަލިތަކަށް ފަރުވާ ދޭ ޑޮކްޓަރެއް އަދިވެސް ހަމަނުޖައްސާ ކަމަށް އެމަރުކަޒުން މިއަދު ބުނެފި އެވެ.
އެ މަރުކަޒުގައި 200 އެއްހާ މީހުން ތިބިއިރު އޭގެ ތެރެއިން 80 ޕަސެންޓް މީހުންނަކީ ސިކުނޑީގެ އުނިކަން ހުރި މީހުންނެވެ. މިދިޔަ އަހަރު ކުރީކޮޅުން ފެށިގެން އެމަރުކަޒުގައި ސައިކޭޓްރިސްޓެއް ނެތެވެ.
ގުރައިދޫ މަރުކަޒުގެ ސީއީއޯ ޔޫޝައު ޝިހާން، "އަދަދު" އަށް މިއަދު ވިދާޅުވީ އެ މަރުކަޒުގައި ކޮންމެހެން ވެސް ސައިކޭޓްރިސްޓެއް ހުންނަން ޖެހޭއިރު އެފަދަ ޑޮކްޓަރެއް ނެތުމުން ދަތިތަކާ ކުރިމަތިވާ ކަމަށެވެ. ހާލު ބޮޑުވާ ބަލި މީހުންނަށް ނަފްސާނީ ފަރުވާ މިހާރު ދެނީ މާލެ ފޮނުވައިގެން ކަމަށް އޭނާ ވިދާޅުވި އެވެ.
"ވީޑިއޯ މެދުވެރިކޮށް ވެސް ޑޮކްޓަރަށް ދައްކަން. މިތަނުގައި ކޮންމެހެން ވެސް ސައިކޭޓްރިސްޓެއް ހުންނަން ޖެހޭ،" ޝިހާން ވިދާޅުވި އެވެ.
ޖެންޑާ މިނިސްޓްރީން ބުނީ ސައިކޭޓްރިސްޓެއް ހަމަނުޖެއްސެނީ އެ މަގާމަށް މީހަކު ކުރިމަތިނުލާތީ ކަމަށާއި އައިޖީއެމްއެޗްގެ މެންޓަލް ހެލްތު ސެންޓަރާ ގުޅިގެން، މީހަކު ލިބޭތޯ މަސައްކަތްކުރަމުން އަންނަ ކަމަށެވެ.
ޖެންޑާ މިނިސްޓްރީގެ ބެލުމުގެ ދަށުގައި ހުންނަ ގުރައިދޫ މަރުކަޒުގެ ހާލަތު މިފަހުން ވެސް ވަރަށް ދަށްވި އެވެ. އެތައް ބަލި މީހަކު އުޅޭ އެ މަރުކަޒުގައި ޑޮކްޓަރެއް އަދި ނަރުހެއް ނެތްތާ ތިން ވަރަކަށް މަސް ފަހުން އާއްމު ބަލިތަކުގެ ޑޮކްޓަރަކާއި ދެ ނަރުހުން ހަމަޖެއްސީ މިދިޔަ އޭޕްރީލް މަހު އެވެ.
ގުރައިދޫ މަރުކަޒުގައި ތިބި މީހުންގެ ތެރޭގައި ގިނައީ ކޮންމެ ދުވަހަކުހެން ބޭސް ކާން ޖެހޭ މީހުންނެވެ. އަދި ސިއްހީ ތަޖުރިބާކާރެއްގެ ލަފާގެ މަތިން ވަކި ގޮތަކަށް އެމީހުން ބަލަހައްޓަން ޖެހެ އެވެ. ޑޮކްޓަރެއް ނެތި ތިން ވަރަކަށް މަސް އޭރު ހޭދަވިއިރު ބޭސްދީ ސިއްހީ ކަންކަން ބެލެހެއްޓީ އެފަދަ ދާއިރާއަކުން ކިޔަވައިފައި ނެތް އެ މަރުކަޒުގެ މުއައްޒަފުންނެވެ.
އެފަހަރު ޑޮކްޓަރަކާއި ނަރުހަކު ހަމަޖެއްސީ އެ މައްސަލަ ނޫސްތަކުގެ ސުރުހީއަށް ވެސް އަރައި މަޖިލީހުން ވެސް އެކަން ބެލިފަހުންނެވެ.
