ގުޅިފަޅުން ގެދޮރު ދިނުމަށް ސިޓީ ކައުންސިލުން ސަރުކާރުގައި ތަކުރާރުކޮށް އެދިފައިވީ ނަމަވެސް، އެކަމުގައި އަދިވެސް އެއްވެސް ކުރިއެރުމެއް ލިބިފައިނުވާ ކަމަށް މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ކުރީ ދެ ސަރުކާރުގައި ހައުސިން މިނިސްޓަރަކަށް މުއިއްޒު ހުންނެވިއިރު ނިންމާފައިއޮތީ މާލެ ވިޔަފާރި ބަނދަރު ތިލަފުއްޓަށް ބަދަލުކޮށް، ގުޅިފަޅު ހިއްކައި އެތަނުން ގޯއްޗާއި ފްލެޓު ދޫކުރުމަށެވެ. ނަމަވެސް، މި ސަރުކާރުން އެ ނިންމުން ބަދަލުކޮށް، ވިޔަފާރި ބަނދަރު ތަރައްގީކުރުމުގެ މަޝްރޫއު ހިންގަން ނިންމާފައިވަނީ ގުޅިފަޅުގަ އެވެ.
އެކަމާ ދެކޮޅަށް ވަކާލާތު ކުރައްވަމުން ގެންދަވައި، މޭޔަރު ކަމަށް އިންތިހާބުވުމާ އެކު ވެސް ކުރިން އޮތް ގޮތަށް ގުޅިފަޅަކީ ގެދޮރުވެރި މަންޒިލެއްގެ ގޮތުގައި ތަރައްގީކުރަން މުއިއްޒު އިސްވެ ހުންނަވައިގެން އާ ސިޓީ ކައުންސިލުން ވަނީ ނިންމައިފަ އެވެ. އެކަމަށް ސަރުކާރުން އެއްބާރުލުން ނުދީފިނަމަ ކޯޓަށް ދާން ކައުންސިލުން ވަނީ ފާސްކޮށްފަ އެވެ.
ސިޓީ ކައުންސިލުން ކުރިއަށް ގެންދަން ނިންމާފައިވާ މަސައްކަތްތަކާ ގުޅޭގޮތުން ރައްޔިތުންގެ ހިޔާލު ހޯދަން މިރޭ ފަށާ ސިލްސިލާ ބައްދަލުވުންތަކާ ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން، މުއިއްޒު ވިދާޅުވި ގޮތުގައި އެ މައްސަލައިގައި ސަރުކާރުގެ ވިސްނުން ބަދަލުކުރުމަށް އެދި އެކި ފަހަރު މަތިން އެދިފައިވާ ކަމަށެވެ.
ނަމަވެސް، އެކަމަށް އަދިވެސް ކުރިއެރުމެއް ނުލިބޭ ކަމަށް މުއިއްޒު ވިދާޅުވި އެވެ.
"އެކަމަކު އަޅުގަނޑުމެންނަށް ޔަގީން އެކަމުގައި ކުރިއެރުމެއް ލިބޭނެ ކަމަށް. ރައްޔިތުން އެދޭ ގޮތަށް ގުޅިފަޅަކީ ދިރިއުޅެވޭ ތަނެއްގެ ގޮތުގައި ތަރައްގީ ކުރެވިގެންދާނެ ކަމަށް،" މޭޔަރު ވިދާޅުވި އެވެ.
އެކަމަށް ހައްލެއް ނުލިބިއްޖެނަމަ ކޯޓަށް ހުށަހަޅަން ކައުންސިލުން ނިންމާފައިވީ ނަމަވެސް، އެއީ އެންމެ "ލާސްޓް އޮޕްޝަން" ކަމަށާއި، އެ ހިސާބަށް ނުގޮސް މި މައްސަލަ ހައްލުކުރެވޭނެކަމުގެ ޔަގީންކަން ބޮޑުކަމަށް ވެސް އޭނާ ވިދާޅުވި އެވެ.
މިރެއިން ފެށިގެން މިމަހުގެ 14 އާ ހަމައަށް މާލޭގެ ހަތަރު އަވަށުގެ އިތުރުން ވިލިމާލޭގެ ރައްޔިތުންގެ ހިޔާލު ހޯދަން ސިޓީ ކައުންސިލުން ވަނީ ބައްދަލުވުންތަކެއް ރާވައިފަ އެވެ.
ސިޓީ ކައުންސިލުން އާއްމުކޮށްފައިވާ ސްޓްރެޓީޖިކް އެކްޝަން ޕްލޭން (ސެޕް)ގައި ހިމެނޭ މަޝްރޫއުތައް ހިންގުމަށްޓަކައި ރައްޔިތުންގެ ހިޔާލު ވަރަށް މުހިންމު ކަމަށް މުއިއްޒު ވިދާޅުވި އެވެ.
އެގޮތުން، މާލޭ ސަރަހައްދުގައި ސީސީޓީވީ ކެމެރާގެ ނިޒާމެއް ގާއިމުކުރުމާއި، ޕާކުތަކާއި ކުޅިވަރު ދަނޑުތަކާއި، މަގު ހެދުން އަދި ޕާކިން ބިލްޑިންތަކާ ގުޅޭގޮތުން ރާވާފައިވާ މަޝްރޫއުތަކާ ގުޅޭގޮތުން ރައްޔިތުންގެ ހިޔާލު ހޯދަން ބޭނުންވާ ކަމަށް މޭޔަރު ވިދާޅުވި އެވެ.
އޭގެ އިތުރުން ސްކޫލް ކުދިންނަށް ހާއްސަކޮށްގެން ގާއިމުކުރަން ނިންމާފައިވާ ބަހުގެ ހިދުމަތާއި އިންޑަސްޓްރިއަލް ވިލެޖު ތަރައްގީކުރަން ރައްޔިތުން ބޭނުންވާ ގޮތް ދެނެގަތުން ވެސް ހިމެނެ އެވެ.
އެހެންކަމުން އެ ބައްދަލުވުންތަކުގައި ވީހާވެސް ގިނަ ރައްޔިތުން ބައިވެރިވި، ހިޔާލު ހުށަހެޅުމަށް މުއިއްޒު އެދިވަޑައިގެންނެވި އެވެ.
"އަޅުގަނޑުމެން މަސައްކަތް ކުރާނީ ރައްޔިތުންނާ އެކީގައި، ރައްޔިތުންގެ ހިޔާލު ހޯދައިގެން، ރައްޔިތުން ބޭނުންވާ ގޮތަށް،" މޭޔަރު ވިދާޅުވި އެވެ.
