ލަންޑަން، އިނގިރޭސި ވިލާތް (ޖުލައި 25) - މޫސުމީ ބަދަލާ ގުޅޭ އދ. ގެ ކޮންފަރެންސް ކޮޕް26 ގެ ކުރިން އިނގިރޭސި ވިލާތުގައި 51 ގައުމަކާއެކު މިއަދު ބޮޑު ބައްދަލުވުމެއް ފަށަން ތައްޔާރުވެއްޖެ އެވެ.
ކޮޕް26 ބައްދަލުވުން އޮންނާނީ އަންނަ ނޮވެމްބަރު މަހު އެވެ. މިއަދު އިނގިރޭސި ވިލާތުގައި ފެށި ބައްދަލުވުމުގައި 51 ގައުމެއްގެ ތިމާވެށި މިނިސްޓަރުން ބައިވެރިވެ އެވެ.
މިއަދުގެ ބައްދަލުވުމުގައި އިސްކޮށް އުޅުއްވަނީ ކޮޕް26 ކޮންފަރެންސްގެ ރިޔާސަތު ބަލަހައްޓަވަން ހަމަޖެހިފައިވާ އިނގިރޭސި ތިމާވެށީގެ މިނިސްޓަރު އަލޮކް ޝަރުމާ އެވެ.
ދެ ދުވަހުގެ ބައްދަލުވުމުގައި މަޝްވަރާ ކުރާނީ ކޮޕް26 ކޮންފަރެންސަށް ދިޔުމުގެ ކުރިން މުހިއްމު ކަންކަމުގައި ގައުމުތަކުން އެއްބަސްވުމަކަށް އަންނަން ކަމަށް އިނގިރޭސި ވިލާތުން ބުނެ އެވެ.
ގައުމުތަކަށް އެއްބަސްވޭ ކަންތައްތައް ނިންމާ، ކޮޕް26 ކޮންފަރެންސުން ނެރޭނެ ނަތީޖާގެ ހުލާސާއެއް ތައްޔާރު ކުރަން މަސައްކަތް ކުރާނެ ކަމަށް އިނގިރޭސި ސަރުކާރުން ނެރުނު ބަޔާނެއްގައި ބުންޏެވެ.
ނޫސްތަކަށް ބަންދުކޮށްފައިވާ ދެ ދުވަހުގެ ބައްދަލުވުމުގައި ބައިވެރިވާ ގައުމުތަކުގެ ތެރޭގައި އެމެރިކާ، އިންޑިއާ އަދި ޗައިނާ ހިމެނެ އެވެ. ބައްދަލުވުން އޮންނާނީ ފިޒިކަލީ އަދި ވާޗުއަލްކޮށެވެ.
މިއީ ފާއިތުވި 18 މަސް ތެރޭގައި ގައުމުތަކުގެ ތިމާވެށި މިނިސްޓަރުން އެއްކޮށް ބައްދަލުވާނެ ފުރަތަމަ ފަހަރެވެ.
"އަޅުގަނޑުމެންގެ ދުނިޔެއަށް ދިމާވެފައި މި ވަނީ ނުރައްކާތެރި ދުވަސްތަކެއް. ދުނިޔޭގެ ކުރިމަގު ރައްކާތެރި ކުރެވޭނެ ހަމައެކަނި ގޮތަކީ ހުރިހާ ގައުމުތަކެއް އެއް މަގެއް ހިޔާރު ކުރުން،" ޝަރުމާ ވިދާޅުވި އެވެ.
ކޮޕް26 ބައްދަލުވުމުގެ މައިގަނޑު އަމާޒަކީ ދުނިޔެ ހޫނުވުން 1.5 ޑިގްރީ ސެލްސިއަސްއަށް ވުރެ މަތިވިޔަ ނުދީ ހިފެހެއްޓުމަށް ހުރިހާ ގައުމުތައް އެއް ގަލަކަށް އެރުވުމެވެ.
މިއަދު ފަށާ ބައްދަލުވުމުގެ މަގްސަދަކީ ކޮޕް26 އަށް ދިޔުމުގެ ކުރިން ގައުމުތަކުން އެކަމާ މެދު ރަސްމީ ގޮތެއްގައި ނިންމުމެއް ކަނޑައެޅުމެވެ.
ގައުމުތަކުގެ ތިމާވެށި މިނިސްޓަރުން އިތުރުން 196 ގައުމަކާއި ޔޫރަޕިއަން ޔޫނިއަން (އީޔޫ) ގެ މަންދޫބުންނާއ ވިޔަފާރިވެރިންނާއި، ތަޖުރިބާކާރުން ވެސް ބައްދަލުވުމުގައި ބައިވެރިވާނެ އެވެ.
