އިއްޒުއްދީން ސްކޫލުން މާލޭގެ އެހެން ސްކޫލްތަކަށް ބަދަލުކުރި ހަތަރު ޓީޗަރަކަށް އެކި ގޮތްގޮތުން ބިރުދައްކަމުންދާ ކަމަށް ޓީޗާސް އެސޯސިއޭޝަނުން ބުނެފި އެވެ.
އެ ސްކޫލުން ވަކިކުރަން އެޑިއުކޭޝަން މިިނިސްޓްރީން ސިޓީ ފޮނުވި ޓީޗަރުންނަށް ބިރު ދެއްކުމުގެ ގޮތުން ބުލީ ކުރުމާއި ފޯނަށް މެސެޖު ކުރުންފަދަ ކަންކަން ކުރަމުންދާ ކަމަށާއި އެ ޓީޗަރުން މިހާރު ސްކޫލުގެ އޮފިޝަލް ގްރޫޕުން ނެރެފައިވާ ކަމަށް އެ އެސޯސިއޭޝަނުން ބުނެ އެވެ.
މި މައްސަލާގައި ޓީޗާސް އެސޯސިއޭޝަންގެ ފަރާތުން އިއްޔެ ބޭއްވި ނޫސްވެރިންގެ ބައްދަލުވުމުގައި އެ އެސޯސިއޭޝަންގެ ޖެނެރަލް ސެކެރެޓަރީ މުހައްމަދު އަދުހަމް ވިދާޅުވީ ސްކޫލުން ވަކިކުރަން ސިޓީ ފޮނުވި ފަރާތްތަކުގެ ހައްގުގައި ވާހަކަ ދައްކަމުންދާ ކަމަށްޓަކައި އެ އެސޯސިއޭޝަންގެ ބޭފުޅުންނަށާއި ސިޓީ ފޮނުވި ޓީޗަރުންނަށް އެކި ފަރާތްތަކުން ބިރުދައްކަމުންދާ ކަމަށެވެ. އެކަމަކު ބިރުދައްކަނީ ކޮން ބައެއް ކަން ސާފުކޮށް ވިދާޅެއް ނުވެ އެވެ.
"ހިތާމައަކީ މި މައްސަލާގައި ކަމާބެހޭ ފަރާތްތަކަށް މައްސަލަ ހުށަހަޅައިގެން މައްސަލައަށް އިންސާފެއް ހޯދަން ކުރަމުންދިޔަ މަސައްކަތުގެ ނަތީޖާއަކީ މި މައްސަލަ ހުށަހެޅި ފަރާތުން ނުވަތަ ވިކްޓިމްއަށްވި ފަތާތްތަކަށް އެޑިއުކޭޝަން މިނިސްޓްރީން ފިޔަވަޅު އަޅާ އެ ފަރާތްތައް އެކި ސްކޫލުތަކަށް ބަދަލުކުރުން."
ބިރު ދައްކަމުން ދަނީ އެޑިއުކޭޝަން މިނިސްޓްރީން ނޫން ކަމަށާއި ނަމަވެސް ބިރު ދައްކަމުން ދަނީ ވަކި ބަޔަކަށް އަމާޒުކޮށް ކަމަށް ވެސް އޭނާ ވިދާޅުވި އެވެ.
މޯލްޑިވްސް ޓްރޭޑް ޔުނިއަން ކޮންގްރެސްގެ ފަރާތުން އެ މައްސަލައާ ގުޅިގެން ވާހަކަ ދައްކަވަމުން މައުރޫފް ޒާކިރު (މާއްޓޭ) ވިދާޅުވީ ޖިންސީ ފުރައްސާރައިގެ މިފަދަ މައްސަލައެއްގައި މި މުޖުތަމައުއަށް ޖާގަ ދެވިގެން ނުވާނެ ކަމަށެވެ. އެގޮތުން އެ ސްކޫލުގެ މުވައްޒަފުން ތަކުރާރުކޮށް މައްސަލަ ހައްލު ކުރުމަށްޓަކައި އެކި ކަހަލަ މަސައްކަތްތައް ކޮށްފައިވާ ކަމަށެވެ.
ޓީޗަރުންތަކެއް އެހެން ސްކޫލްތަކަށް ބަދަލުކުރަން ނިންމީ އިއްޒުއްދީންގެ ޕްރިންސިޕަލް އިސްމާއިލް ނަސީރު ޖިންސީ ފުރައްސާރަ ކުރުމުގެ އަމަލުތަކެއް ހިންގާފައިވާ ކަމަށް ބުނެ މައްސަލަ އެޑިއުކޭޝަނަށް ހުށަހަޅާފައި ވަނިކޮށެވެ. އެކަމަކު އެޑިއުކޭޝަނުން ބުނެފައި ވަނީ ޓީޗަރުން އެހެން ސްކޫލްތަކަށް ބަދަލުކުރީ ޖިންސީ ފުރައްސާރައިގެ މައްސަލައަކާ ގުޅިގެން ނޫން ކަަމަށެވެ.
ތުހުމަތުކުރި ޕްރިންސިޕަލް އެދިވަޑައިގެން އޭނާ ވަނީ ރ. އަތޮޅުގެ ސްކޫލަކަށް ބަދަލުކޮށްފަ އެވެ.
އެޑިއުކޭޝަނުން ނެރުނު ބަޔާނުގައި ބުނެފައި ވަނީ އިއްޒުއްދީންގެ ހަތަރު ޓީޗަރަކު މާލޭގެ އެހެން ސްކޫލްތަކަށް ބަދަލުކުރަން ނިންމީ މި އަހަރުގެ ކުރީކޮޅު ދިމާވި މައްސަލައިގައި އުފެދުނު ނުތަނަވަސްކަން ހައްލުކުރުމަށެވެ.
