ލަންޑަން (ޖުލައި 9) - އިނގިރޭސި ޓީމަށް މި ފަހަރުގެ ޔޫރޯގައި މޮޅު ކުޅުމެއް ދައްކަމުން އަންނަ ރަހީމް ސްޓާލިން އަށް އެ ޓީމުގެ ކޯޗު ގަރެތު ސައުތުގޭޓް ތައުރީފުކޮށްފި އެވެ.
އިންްގްލެންޑަށް އެންމެ ފުރަތަމަ ސްޓާލިން ކުޅުނު 45 މެޗުން އޭނާ ޖެހީ ދެ ގޯލެވެ. ދެން އޭނާ ގައުމީ ޓީމަށް ކުޅުނު 27 މެޗުގައި ގޯލެއް ނުޖަހަ އެވެ. އޭގެ ތެރޭގައި 2018 ވަނަ އަހަރުގެ ވޯލްޑް ކަޕް ހިމެނެ އެވެ. އުމުރުން 26 އަހަރުގެ ސްޓާލިން ވަނީ މި ފަހަރުގެ ޔޫރޯގައި މިހާތަނަށް ތިން ގޯލު ޖަހައި ގޯލެއް ޖަހަން ފުރުސަތު ތަނަވަސްކޮށްދީފަ އެވެ.
ޔޫރޯގެ ސެމީ ފައިނަލުގައި އިންގްލެންޑުން އެއްވަރުކުރި ގޯލާއި މޮޅުވި ގޯލުގައި ވެސް ސްޓާލިންގެ ދައުރު ބޮޑެވެ. އިންގްލެންޑުން އެއްވަރުކުރި ގޯލަކީ ސްޓާލިން އަށް ލިބުމުގެ ކުރިން ބޯޅަ ސަލާމަތްކުރަން އުޅެނިކޮށް ޑެންމާކްގެ ކެޕްޓަން ސިމޯން ކިއޭ އަތުން ބައިކޮޅަށް ވަން ގޯލެކެވެ. ދެން އިންގްލެންޑް މޮޅުވި ޕެނަލްޓީ އަކީ ސްޓާލިން އަށް ކުރި ފައުލަކަށް ދިން ޕެނަލްޓީ އެެކެވެ.
"ސްޓާލިން އަކީ ފައިޓަރެއް. އޭނާގެ ފަރާތުން މި މުބާރާތުގައި މި ފެންނަނީ ހަގީގަތުގައި އޭނާ ބޭނުންވާ ލެވަލްގެ ކުޅުން. އިންގްލެންޑުން މޮޅުވި ކޮންމެ މެޗެއްގައި ސްޓާލިންގެ ހިއްސާއެއް އޮންނާނެ. އަހަރެން އޭނާ ދަނޑުމަތީގައި ގިނަ ވަގުތު މި ބަހައްޓަނީ ވެސް މި ޓީމަށް އޭނާގެ މުހިއްމުކަން ބޮޑުވީމަ. އޭނަ އަށް ކުރާ އިތުބާރުގެ ބަދަލު އޭނާ ޓީމަށް ދޭތީ،" ސައުތުގޭޓް ބުންޏެވެ.
ސައުތުގޭޓް ބުނީ ވޯލްޑް ކަޕްގައި ސްޓާލިންގެ ކުޅުން ދަށްވުމުން އޭނާ އަމިއްލަ އަށް އެކަމަށް ވިސްނައި ކަންކަން ރަނގަޅުކުރި ކަމަށާއި މިހާރު އެ ފެންނަނީ އޭގެ ނަތީޖާ ކަމަށެވެ. އަދި ކްލަބް ލެވަލްގައި މެންޗެސްޓާ ސިޓީގައި ވެސް ސްޓާލިން މޮޅު ކުޅުމެއް ދައްކަމުން އަންނަ ކަމަށެެވެ.
"ވޯލްޑް ކަޕަކީ ޓާނިން ޕޮއިންޓެއް. އޭގެ ފަހުން ދެން ފެށި ޔުއެފާ ނޭޝަންސް ލީގުގައި ސްޓާލިންގެ އަސްލު ކުޅުން ގައުމީ ޓީމުގައި ފެންނަން ފެށީ. އަހަރެމެން ސެވިލްގައި ސްޕެއިން އަތުން ނޭޝަންސް ލީގުގައި މޮޅުވި މެޗުގައި ސްޓާލިން ދެ ގޯލު ޖެހުމަކީ މިހާރު ގައުމީ ޓީމުގައި އޭނާ އެ ހުރި ލެވަލަށް އައުމުގެ ފެށުން،" ސައުތުގޭޓް ބުންޏެވެ.
މި ފަހަރުގެ ޔޫރޯގެ ފައިނަލުގައި އިންގްލެންޑް އާދިއްތަ ދުވަހު ކުޅޭނީ އިޓަލީއާ އެވެ. އިންގްލެންޑުން މި ފަހަރުގެ ޔޫރޯ ކާމިޔާބުކޮށްފިނަމަ މުބާރާތުގެ މޮޅު ކުޅުންތެރިޔާގެ މަގާމު ލިބެން ޖެހޭނީ ސްޓާލިން އަށް ކަމަށް އިނގިރޭސި ފުޓްބޯޅަ އެނަލިސްޓުން ދަނީ ބުނަމުންނެވެ.
