ލަންޑަން (ޖުލައި 8) - ޔޫރޯ ފުޓްބޯޅަ މުބާރާތުގެ ސެމީ ފައިނަލުގައި ރޭ ޑެންމާކް އަތުން އިންގްލެންޑް މޮޅުވި މެޗުގައި ހިނގާދިޔަ ކަންތައްތަކުގެ ސަބަބުން އިނގިރޭސި ސަޕޯޓަރުންގެ މައްސަލަތަކެއް ޔުއެފާ އިން ބަލަން ފަށައިފި އެވެ.
ޔުއެފާ އިން ބަލަން ފެށި މައްސަލަތަކަކީ ގައުމީ ސަލާމް ކިޔަމުންދިޔަ ވަގުތުގައި އިނގިރޭސި ސަޕޯޓަރުންގެ ބަޔަކު އަޑުގަދަކޮށްފައިވުމާއި އަލިފާން ބޯޅަ ދަނޑުތެރޭގައި ރޯކުރި މައްސަލައިގެ އިތުރުން އިންގްލެންޑުން ހެރީ ކޭން ޕެނަލްޓީ ޖެހި ވަގުތު ޑެންމާކްގެ ގޯލްކީޕަރު ކެސްޕާ ޝްމައިކަލްގެ މޫނަށް ލޭޒާ އެޅުވި މައްސަލަ އެވެ.
ޕެނަލްޓީ ޖެހި ވަގުތު ޝްމައިކަލް މޫނަށް ލޭޒާ އަޅުވާފައި.
އިނގިރޭސި ރަސްމީ ސްޓޭޑިއަމް ވެމްބްލީގައި ކުޅުނު ރޭގެ މެޗުގައި ހިނގި މި ކަންތައްތަކުގެ ސަބަބުން ޔުއެފާ އިން އިނގިރޭސި ސަޕޯޓަރުންނާ ގުޅޭ މި މައްސަލައިގެ ސަބަބުން ފިޔަވަޅު އަޅާނީ އިނގިރޭސި އެފްއޭ އަށެވެ. ރިޕޯޓްތައް ބުނާ ގޮތުގައި ޔުއެފާ އިން ވަނީ އިނގިރޭސި އެފްއޭ ޖޫރިމަނާކުރަން ނިންމައިފަ އެވެ.
ޑެންމާކްގެ ސަޕޯޓަރުން އަންނަނީ އިންގްލެންޑް ރޭ މޮޅުވީ ޕެނަލްޓީ ދޭން ނުޖެހޭ ކަމަށް ބުނެ، އަލުން މެޗު ކުޅެން ޑިމާންޑްކޮށް އޮންލައިން ޕެޓިޝަނެއް ތައްޔާރު ކުރަމުންނެވެ.
އެ ޕެޓިޝަނުގައިވާ ގޮތުން އިންގްލެންޑްގެ ރަހީމް ސްޓާލިން ބޯޅަ ހިފައިގެން އޭރިއާތެރެއަށް ވަންއިރު، ދަނޑުގައި އިތުރު ބޯޅައެއް އޮތުމުން ކުޅުން ހުއްޓަން ޖެހޭނެ އެވެ. އެކަމަކު، އެ ގޮތަށް ކަންތައް ނުކޮށް ސްޓާލިން ބޯޅަ ހިފައިގެން އޭރިއާތެރެއަށް ވަދެ އޭނާ އަށް ފައުލުކުރީ ކަމަށް ހަދައި ޑައިވްކުރުމުން މެޗުގެ ރެފްރީ ނެދަލެންޑްސްގެ ޑެނީ މަކެއިލީ ޕެނަލްޓީ ދޭން ނިންމީ އެކަށީގެންވާ ވަރަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ނުބަލައި ކަމަށެވެ.
ޑެންމާކްގެ ކޯޗު ކެސްޕާ ޖޮލްމަންޑް ބުނީ އިންގްލެންޑަށް ދިނީ ދޭން ނުޖެހޭ ޕެނަލްޓީއެއް ކަމަށެވެ. އެކަމަކު، ސްޓާލިން އާއި އިނގިރޭސި ކޯޗު ގަރެތު ސައުތުގޭޓް ވަނީ އެ ޕެނަލްޓީ ދިނުން އެއީ އިންސާފުވެރި ނިންމުމެއް ކަމަށް ބުނެފަ އެވެެ.
