ލަންޑަން (ޖޫން 22) - ޔޫރޯ ފުޓްބޯޅަ މުބާރާތުގެ ފުރަތަމަ ތިން ގްރޫޕްގެ ކުޅުން ނިމިފައިވާއިރު، ގްރޫޕް ސްޓޭޖުގެ ފަހު މެޗުތައް ނުކުޅެ އޮތް ފްރާންސާއި އިންގްލެންޑާއި ޗެކް ރިޕަބްލިކް އަދި ސްވިޑެން އަނެއް ބުރުގެ ޖާގައެއް ކަށަވަރުކޮށްފި އެވެ.
މި ޓީމުތަކުގެ އިތުރުން ގްރޫޕް އޭގައި ވާދަކުރި ސްވިޒަލެންޑް ވެސް ވަނީ އަނެއް ބުރުން ޖާގަ ހޯދައިފަ އެވެ. މި ފަސް ޓީމަށް އަނެއް ބުރުގެ ފުރުސަތު ލިބުނީ ވާދަކުރާ ގްރޫޕްގެ ގަދަ ދެ ޓީމުގެ ތެރޭގައި ނުހިމެނުނު ނަމަވެސް އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ރޭންކިންގެ ތެރެއިން ނޮކައުޓް ބުރުގެ ޖާގައެއް ކަަށަވަރުވާތީ އެވެ.
ސްވިޒަލެންޑް ގްރޫޕް އޭގެ މެޗުތައް ނިންމާލިއިރު، އޮތީ ހަތަރު ޕޮއިންޓާ އެކު ތިން ވަނައިގަ އެވެ. ގްރޫޕް ބީ އާއި ގްރޫޕް ސީގެ ކުޅުން ނިމުނުއިރު، ތިން ވަނަ އަށް ދިޔަ ޓީމުތައް ކަަމަށްވާ ފިންލެންޑާއި ޔޫކްރެއިނަށް ލިބުނު ތިން ޕޮއިންޓެވެ. އެހެންވުުމުން މިހާރު ހަތަރު ޕޮއިންޓް ހޯދާފައިވާ ހުރިހާ ޓީމަކަށް އަނެއް ބުރުގެ ޖާގަ ޔަގީންވާނެ އެވެ. ފްރާންސާއި އިންގްލެންޑް، ޗެކް ރިޕަބްލިކް އަދި ސްވިޑެން ވަނީ ފުރަތަަމަ ދެ މެޗުން ހަތަރު ޕޮއިންޓް ހަމަކޮށްފަ އެވެ. އެހެންވެ، އެ ޓީމުތައް ގްރޫޕް ސްޓޭޖުން ކަޓާނެ ގޮތެއް މިހާރު ނެތެވެ.
އަނެއް ބުރުގެ ޖާގަ ކަށަވަރުވުމުގެ ހިތްހަަމަ ޖެހުން ލިބޭނެ އެއް ޓީމަކީ މަރުގެ ގްރޫޕްގައި އޮތް ފްރާންސް އެވެ. ފްރާންސް ގްރޫޕްގެ ފަހު މެޗުގައި ޕޯޗުގަލްއާ ދެކޮޅަށް ކުޅޭއިރު، ހަމަޖެހިލައިގެން ކުޅެވޭނެ އެވެ.
އެންމެ ފަހުގެ ޗެމްޕިއަން ޕޯޗުގަލް މި ވަގުތު ތިން ޕޮއިންޓާ އެކު އޮތްއިރު، އެ ޓީމުގެ މި ވަގުތު އޮތީ ތިން ޕޮއިންޓެވެ. އަނެއް ބުރުން ފުރުސަތު ހޯދަން ބޭނުންނަމަ ޕޯޗުގަލް އެ މެޗުން ނަތީޖާ ނެރެންޖެހެ އެވެ. ޕޯޗުގަލް އިން 2016 ވަނަ އަހަރުގެ ޔޫރޯ ކާމިޔާބުކުރީ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން ނޮކައުޓް ބުރުން ފުރުސަތު ހޯދައިގެންނެވެ. އެ ފަހަރު ގްރޫޕް ސްޓޭޖުގެ ތިން މެޗުން ވެސް ޕޯޗުގަލް ވީ އެއްވަރެވެ.
މިހާތަނަށް ގްރޫޕްތަކުގެ ގަދަ ދެ ޓީމުގެ ތެރެއިން އަނެއް ބުރުން ޖާގަ ހޯދާފައިވާ ޓީމުތަކަށް ބަލާއިރު، ގްރޫޕް އޭގެ އެއް ވަނައިގެ ގޮތުގައި އިޓަލީ އާއި އެ ގްރޫޕްގެ ރަނަރަޕަށް ދިޔަ ވޭލްސް އަނެއް ބުރުން ފުރުސަތު ހޯދިއިރު، ގްރޫޕް ބީގެ އެއް ވަނަ ހޯދީ ބެލްޖިއަމް އެވެ. އަދި ފަހު މެޗުން މޮޅުވެގެން ޑެންމާކް ވަނީ އެ ގްރޫޕް ދެ ވަނަ ސްލޮޓްގައި އަނެއް ބުރުން ފުރުސަތު ހޯދައިފަ އެވެ. ޑެންމާކަކީ ޔޫރޯގެ ތާރީހުގައި ފުރަތަމަ ދެ މެޗުން ބަލިވި ނަމަވެސް ފަހު މެޗުން މޮޅުވެގެން އަނެއް ބުރުގެ ޖާގަ ހޯދި ފުރަތަމަ ޓީމެވެ. ގްރޫޕް ސީން އެއް ވަނަ ހޯދީ ނެދަލެންޑްސް އެވެ. އަދި އޮސްޓްރިއާ ވަނީ އެ ގްރޫޕްގެ ދެ ވަނަ ހޯދައި މުޅިން އަލަށް މުބާރާތުގެ ނޮކައުޓް ބުރުން ފުރުސަތު ހޯދައިފަ އެވެ.
ގަދަ 16 ޓީމުގެ ބުރު (ދެ ވަނަ ބުރު)ގައި ކުޅޭނެ ދެ މެޗެއް މިހާރު ވަނީ ކަށަވަރުވެފަ އެވެ. އިޓަލީ ކުޅެން ޖެހޭނީ އޮސްޓްރިއާއާ އެވެ. އަދި ވޭލްސް ބައްދަލުކުރަން ޖެހޭނީ ޑެންމާކާ އެވެ.
