ކުރިން ރިޔާސީ ގަނޑުވަރުގެ ގޮތުގައި ބޭނުންކުރަމުން އައި ތީމުގެ އަލުން ރައީސް ދިރިއުޅުއްވާ ރަސްމީ ގެކޮޅުގެ ގޮތުގައި ހަމަޖައްސަން ރައްޔިތުންގެ މަޖިލީހުގައި މިއަދު ގޮވާލައިފި އެވެ.
ރައްޔިތުންގެ މަޖިލީހުގެ ރައީސްގެ އިތުރުން އުއްތަމަ ފަނޑިޔާރަށް ފޯރުކޮށްދެމުންދާ ސެކިއުރިޓީ އިތުރަށް ވަރުގަދަ ކުރުމަށްޓަކައި ދައުލަތުން އެ ދެ މަގާމުގައި ތިއްބަވާ ބޭފުޅުން ދިރިއުޅުއްވާނެ ރަސްމީ ގެއެއް ހަމަޖައްސައިދިނުމަށް ސަރުކާރުން ހުށަހަޅާފައިވާ އިސްލާހުތައް ދިރާސާކޮށް ސަލާމަތީ ހިދުމަތްތަކާ ބެހޭ ކޮމިޓީން ނިންމި ގޮތުގެ ރިޕޯޓުގެ ބަހުސްގެ ތެރެއިން ބައެއް އެމްޑީޕީ މެމްބަރުން ވަނީ ތީމުގެ އަލުން ރިޔާސީ ގަނޑުވަރަކަށް ހެދުމަށް ގޮވާލައްވައިފަ އެވެ.
އެގޮތުން، ކޮމިޓީގެ މުގައްރިރު އަދި ހިތަދޫ ދާއިރާގެ މެމްބަރު މުހައްމަދު އަސްލަމް ވިދާޅުވީ އެ ދެ ބާރުގެ ވެރިންނަށް ސެކިޔުރިޓީ ފޯރުކޮށް ދިނުމުގައި މިހާރު ދިމާވާ އެންމެ ބޮޑު ގޮންޖެހުމަކީ ދިރިއުޅުއްވާ ތަން ސެކިޔުރިޓީ މިންގަނޑަށް ނުފެތުން ކަމަށެވެ.
އަސްލަމް ވިދާޅުވި ގޮތުގައި ދައުލަތުން ބޮޑު ހަރަދުތައް ކޮށްގެން ތީމުގެ ތަރައްގީކުރީ ރައީސުލްޖުމްހޫރިއްޔާ ދިރިއުޅުއްވާނެ ތަނެއްގެ ގޮތުގައި ވަރުގަދަ ސެކިޔުރިޓީ ފިޔަވަޅުތަކާއި ވަސީލަތްތަކާއެކު ކަމަށެވެ.
"އޭރު އެތަން ބިނާކުރަމުންދިޔައިރު ވަރަށް ގިނަ ފާޑުކިޔުންތައް އަމާޒުވި ނަމަވެސް، އަޅުގަނޑުމެން މިހާރު ރަނގަޅަށް ވިސްނާލާއިރު، އޭރުގެ ރައީސް މައުމޫންގެ ދުރު ވިސްނުންފުޅާއެކު އޭރު ނިންމެވި ނިންމުމަކީ ރަނގަޅު ނިންމުމެއް ކަމުގައި އަޅުގަނޑު ގަބޫލުކުރަން،" އަސްލަމް ވިދާޅުވި އެވެ.
އެއާއެކު ރައީސްގެ ސެކިޔުރިޓީ ފޯރުކޮށްދެމުންދާ އެމްއެންޑީއެފްގެ އިތުރުން ރައީސް އޮފީހުގެ ކަމާބެހޭ ބޭފުޅުން އެކަމާ ވިސްނައި، އަވަސް ފިޔަވަޅުތަކެއް އެޅުމަށް އޭނާ ގޮވާލެއްވި އެވެ.
އެ ބަހުސްގައި މަރަދޫ ދާއިރާގެ މެމްބަރު އިބްރާހިމް ޝަރީފް ވެސް ވިދާޅުވީ ތީމުގޭގައި މިހާރު ހިންގަމުންދާ ސުޕްރީމް ކޯޓު އެހެން ތަނަކަށް ބަދަލުކޮށް، އެތަނަކީ ރައީސް ދިރިއުޅުއްވާ ރަސްމީ ގެކޮޅުގެ ގޮތުގައި ހަމަޖައްސައިދިނުމަކީ މުހިއްމު ކަމެއް ކަމަށެވެ.
އެހެންކަމުން އެކަން އަވަސް ކުރުމަށް އޭނާ ވެސް ގޮވާލެއްވި އެވެ.
ރިޔާސީ ގަނޑުވަރެއްގެ ގޮތުގައި ތީމުގެ ޒަމާނީ ފެންވަރަށް އަދި ސަލާމަތީ ގޮތުން ވެސް ވަރުގަދަ ފިޔަވަޅުތަކާއެކު މައުމޫންގެ ވެރިކަމުގައި އަލުން އިމާރާތްކުރި ނަމަވެސް 2008 ވަނަ އަހަރު ކުރީގެ ރައީސް މުހައްމަދު ނަޝީދު ވެރިކަމާ ހަވާލުވެވަޑައިގަތުމަށް ފަހު، އެ ތަން ސުޕްރީމް ކޯޓާއި ހައި ކޯޓު ހިންގާ އިމާރާތުގެ ގޮތުގައި ހަމަޖެއްސެވި އެވެ.
އެ ބަދަލު ގެންނެވީ ވެރިކަމަށް ވަޑައިގެންނެވުމުގެ ކުރިން ތީމުގެ ޒަމާނީ ފެންވަރަށް ތަރައްގީކުރާތީ ވަރަށް ބޮޑަށް ފާޑުވިދާޅުވުމަށްފަހު އެވެ.
ނަޝީދުގެ ވެރިކަމުގައި އެމަނިކުފާނު ދިރިއުޅުއްވީ މިހާރު ރައީސް އިބްރާހިމް މުހައްމަދު ސޯލިހު ވެސް ދިރިއުޅުއްވަމުން ގެންދަވާ މުލިއާގޭގަ އެވެ.
ދެ ބާރުގެ ވެރިންނަށް ގެއެއް ދެނީ ކީއްވެ؟
ނަޝީދު އަވަހާރަކޮށްލަން މިދިޔަ މަހުގެ ހަ ވަނަ ދުވަހު ދިން ހަމަލާއަށް ފަހު ދައުލަތުން ސެކިއުރިޓީ ފޯރުކޮށްދެމުންދާ ދައުލަތުގެ އިސް ބޭފުޅުންގެ ސަލާމަތާ ރައްކާތެރިކަމާމެދު ގިނަ ބަޔަކު ދިޔައީ ސުވާލު އުފައްދަމުންނެވެ.
ނަޝީދު އަވަހާރަކޮށްލަން ހަމަލާދިނީ އެމަނިކުފާނު ދިރިއުޅުއްވާ ގެކޮޅުން ނުކުންނަވައިގެން ކާރަށް އަރައިވަޑައިގަންނަވަނިކޮށް ބާރުގަދަ އައިއީޑީއެއް ގޮއްވާލައިގެންނެވެ.
އެ ހަމަލާ ދިނުމުގެ އެތައް މަހެއް ކުރިން، އެ ގެ ހުންނަ ނީލޯފަރު މަގު ހަނިކަމުން ނަޝީދަށް ސެކިއުރިޓީ ފޯރުކޮށްދޭން ދަތިކަމަށް އެމްއެންޑީއެފުން ބުނެފައިވާކަން ހާމަވުމާ އެކު ފާޑުކިޔުންތައް ވަނީ އިތުރުވެފަ އެވެ.
އަދި ރައީސުލްޖުމްހޫރިއްޔާއެކޭ އެއްފަދައިން، ދައުލަތުގެ އަނެއް ދެ ބާރުގެ ވެރިންނަށް ވެސް ދައުލަތުން ރަސްމީ ގެއަކާއި ސެކިއުރިޓީ ފޯރުކޮށްދޭންޖެހޭ ކަމުގެ އަޑުތައް މަޖިލީހުގެ ތެރެއިން ވެސް ގަދަވި އެވެ.
އެއާއެކު، އެކަމާ ގުޅޭ ދެ ގާނޫނު ބަދަލުކުރަން ސަރުކާރުގެ ފަރާތުން މަޖިލީހަށް ވަނީ ވައްދައިފަ އެވެ.
އެގޮތުން، މަޖިލީހުގެ އިމްތިޔާޒްތަކާއި ބާރުތަކުގެ ގާނޫނަށް ފޭދޫ ދާއިރާގެ މެމްބަރު މުހައްމަދު ނިހާދު ހުށަހެޅުއްވި އިސްލާހުގައި ބުނެފައިވަނީ މަޖިލީހުގެ ރައީސަށާއި އޭނާގެ އާއިލާއަށް ދިރިއުޅެވޭނެ ގެއަކާއި އެ ގެއަށް ބޭނުންވާ މުވައްޒަފުންނާއި އެ ގެއަށް ހިނގާނެ ހަރަދު ދައުލަތުން ހަމަޖައްސައި ދޭންވާނެ ކަމަށެވެ.
އަދި އެ ގެއަކީ ސަލާމަތީ ގޮތުން ފިޔަވަޅުތައް އެޅޭނެ ގޮތަކަށް ހުރި ގެއަކަށް ވާންވާނެ ކަމަށް އެ އިސްލާހުގައި ބުނެފައިވެ އެވެ.
އޭގެ އިތުރުން، ސަރުކާރުގެ ފަރާތުން މަތިވެރި ދާއިރާގެ މެމްބަރު ހަސަން ޒަރީރު ފަނޑިޔާރުންގެ ގާނޫނަށް ވެސް އިސްލާހު ހުށަހަޅާފައިވަނީ ހަމަ އެއްގޮތަކަށް އިބާރާތްކޮށް އުއްތަމަ ފަނޑިޔާރަށް ވެސް ރަސްމީ ގެއެއް ހަމަޖައްސައި ދޭން ޖެހޭ ގޮތަށެވެ.
