ލަންޑަން (ޖޫން 20) - ސްޕެއިނުގެ ރެއާލް ސޮސިއެޑާޑަށް ކުޅެމުން އަންނަ އަލެކްސަންޑަ އިސާކް ހޯދަން އިނގިރޭސި ކްލަބްތަކުން މަސައްކަތް ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 21 އަހަރުގެ އިސާކްގެ ވާހަަކަ ބޮޑަށް ދެކެވެން ފެށީ މި ފަހަރުގެ ޔޫރޯ ފުޓްބޯޅަ މުބާރާތުގައި އޭނާ ދައްކަމުން އަންނަ މޮޅު ކުޅުމުގެ ސަބަބުންނެވެ. ސްވިޑެން އިން ފުރަތަަމަ މެޗުގައި ސްޕެއިނާއި އެއްވަރުވިއިރު، އިސާކް ވަނީ ސްޕެއިނުގެ ޑިފެންޑަރުންނަށް ބާރުބޮޑުކޮށް ލަނޑެއް ޖެހުމާ ގާތަށް ޖެހިލައިފަ އެެވެ. އަދި ސްލޮވާކިއާއާ ދެކޮޅަށް ސްވިޑެން އިން ކުޅުނު މެޗުގައި ވެސް މޮޅަށް ކުޅެ، އެ މެޗުގެ މޮޅު ކުޅުންތެރިޔާގެ މަގާމު ހޯދި އެވެ.
އިނގިރޭސި މީޑިއާ ރިޕޯޓްތައް ބުނާގޮތުން އިސާކް ހޯދަން މަސައްކަތް ކުރަނީ މެންޗެސްޓާ ސިޓީ، ޗެލްސީ އަދި ލިވަޕޫލް އެވެ. ސޮސިއެޑާޑާ އެކު އިސާކް ހަދާފައިވާ އެއްބަސްވުން އުވާލަން ދައްކަން ޖެހޭ އަގު 70 މިލިއަން ޔޫރޯ އަށް އަަރަ އެވެ. ސޮސިއެޑާޑުން ވަނީ އިސާކް ވިއްކާލަން ބޭނުންނުވާ ކަމަށް ބުނެފަ އެވެ.
މީގެ ދެ އަހަރު ކުރިން 2019 ވަަނަ އަހަރު ޖޫން މަހު ބޮރޫޝިއާ ޑޯޓްމަންޑް ދޫކޮށް ސޮސިއެޑާޑަށް ބަދަލުވެ، އިސާކް އެ ޓީމާ އެކު ސޮއިކުރީ ފަސް އަހަރުގެ އެއްބަސްވުމެއްގަ އެވެ. އެ ފަހަރު ޑޯޓްމަންޑް ދޫކޮށްލިއިރު، އެ ކްލަބުން ވަނީ އަލުން ބޭނުންނަމަ 30 މިލިއަން ޔޫރޯ ދީފައި އިސާކް ގެނެވޭ ގޮތަށް މާއްދާއެއް (ބައިބެކް ކްލޯސް) އެއް ހިމަނައިފަ އެވެ. ރިޕޯޓްތައް ބުނާގޮތުން މިދިޔަ ސީޒަނުގެ ނިޔަލަށް އެ މާއްދާ ވަނީ ހަމަވެފަ އެވެ.
ސްޕެއިންގެ ލަޕޯޓް (ވ) ކައިރިން ސްވިޑެންގެ އިސާކް ބޯޅަ ފޮނުވާލަނީ.-- ފޮޓޯ: އޭއެފްޕީ
އުމުރުން 16 އަހަރުގައި ސްވިޑެންގެ އޭއައިކޭ އަށް 2016 ވަަނަ އަހަރު ކުޅެން ފެށި އިސާކް ވަނީ 2017 ވަނަ އަހަރު ޑޯޓްމަންޑަަށް ބަދަލުވެފަ އެވެ. އެ ޓީމަށް ކުޅެމުން 2018-2019 ވަނަ އަހަރުގެ ސީޒަން ލޯން އެއްބަސްވުމެއްގެ ދަށުން ކުޅުނީ ނެދަލެންޑްސްގެ ވިލެމް އަށެެވެ. ޑޯޓްމަންޑުން ފުރުސަތު ނުލިބޭތީ މީގެ ދެ އަހަރު ކުރިން ސޮސިއެޑާޑަށް ބަދަލުވީ އެވެ. އެ ޓީމާ އެކު ސޮއިކުރި ކޮންޓްރެކްޓް ހަމަވާނީ 2024 ވަނަ އަހަރުގެ ޖޫންގެ ނިޔަލަށެވެ.
ޗެލްސީ އާއި ސިޓީން އަންނަނީ އަންނަ ސީޒަނަށް ފޯވާޑެއް ހޯދަން ވަރަށް މަސައްކަތް ކުރަމުންނެވެ. އެ ދެ ޓީމުން ވެސް ޑޯޓްމަންޑްގެ ފޯވާޑް އާލިން ބްރައުޓް ހާލަންޑަށް ޝައުގުވެރިވީ ނަމަވެސް އޭނާ ވިއްކާލަން ޑޯޓްމަންޑުން ކިޔާ އަގު ބޮޑުވުމުން މި ފަހަރުގެ ޓްރާންސްފާ މާކެޓްގައި އެ ޑީލް ހިނގުމުގެ ފުރުސަތު ކުޑަ އެވެ. ލިވަޕޫލުން އެ ޓީމުގައި ތިބި ހަ ވަރަކަށް ކުޅުންތެރިން ދޫކޮށްލުމަށް ފަހު އާ ކުޅުންތެރިން ހޯދާއިރު، އިތުރު އެއް ފޯވާޑް ގެންނަން ބޭނުންވެ އެވެ. ރިޕޯޓްތައް ބުނާގޮތުން އިސާކް ލިބޭތޯ މަސައްކަތް ކުރަނީ އެހެންވެ އެވެ.
ޒްލަޓާން އިބްރަހިމޮވިޗަށް ފަހު އައި ސްވިޑެންގެ އެންމެ ހުނަރުވެރި ފޯވާޑް ކަމަށް ގިނަ ބަޔަކު އެއްބަސްވާ އިސާކް ވަނީ މި ސީޒަނުގައި ޑޯޓްމަންޑަށް 44 މެޗުން 17 ގޯލު ޖަހައި ދެ ގޯލު ޖަހަން ފުރުސަތު ތަނަވަސްކޮށްދީފަ އެވެ. ސްވިޑެން ޓީމަށް 23 މެޗުން ފަސް ގޯލު ޖަހައިދިނެވެ.
