ކޮވިޑް-19 ބަލީގެ މީހުންނަށް އެޑްމިޓުކޮށްގެން ފަރުވާދެވޭ ގޮތަށް އޭޑީކޭ ހޮސްޕިޓަލުގެ ހިދުމަތް ފުޅާކޮށްފި އެވެ.
ކޮވިޑުގެ ބަލިމަޑުކަމުގެ ތެރެއިން އޭޑީކޭއިން ދަނީ ފްލޫ ކްލިނިކުގެ ހިދުމަތް ދެމުންނެވެ. އޮންލައިންކޮށް ޑޮކްޓަރަށް ދެއްކުމުގެ އިތުރުން ރޯގާގެ އަލާމާތްތައް ހުންނަ ފަރާތްތައް ހޮސްޕިޓަލަށް ދިޔުމުން ވެސް އެ ކްލިނިކުން ދަނީ ފަރުވާ ދެމުންނެވެ.
ނަމަވެސް، އެ ހޮސްޕިޓަލުގެ މެނޭޖިން ޑިރެކްޓަރު އަހުމަދު އަފްއާލް މިއަދު "އަދަދު"އަށް ވިދާޅުވީ އެ ހިދުމަތް މިހާރު ހޮސްޕިޓަލުގައި އެޑްމިޓުކޮށްގެން ފަރުވާ ދެވޭ ގޮތަށް ފުޅާކުރެވިފައިވާ ކަމަށެވެ.
އެގޮތުން، ރައްކާތެރިކަމުގެ ފިޔަވަޅުތަކާއި އުސޫލުތަކާއެކު އެކަމަށް 20 އެނދުގެ ސެންޓަރެއް ގާއިމުކުރެވިފައިވާ ކަމަށް އަފްއާލް ވިދާޅުވި އެވެ.
"އެތަން ހުންނާނީ ބިލްޑިންއާ މުޅީން ވަކި ކޮށްލާފަ. އެހެން ބަލިތަކަށް ފަރުވާ ހޯދަން ދާ މީހުންނަށް އެތަނަށް އެކްސެސް ނުވެވޭ ގޮތަށް. އަދި އެ ހިސާބަށް ދާންވެސް ނުޖެހޭ ގޮތަށް އަޅުގަނޑުމެން އިންތިޒާމުތައް ހަމަޖައްސާފައި ހުންނާނީ،" އަފްއާލް ވިދާޅުވި އެވެ.
އޭނާ ވިދާޅުވީ އެޑްމިޓު ކުރާނީ ޑޮކްޓަރުން ހަދާ އެސެސްމަންޓުތަކަށްފަހު ވަކި މިންގަނޑުތަކަށް ފެތޭ ބަލި މީހުން ކަމަށެވެ.
ނަމަވެސް، މިވަގުތު އެހެން ފެސިލިޓީތަކުން ފަރުވާ ހޯދަމުންދާ ބަލި މީހުން އޭޑީކޭއަށް ޓްރާންސްފާ ނުކުރާކަމަށް ވިދާޅުވި އެވެ.
އަފްއާލް ވިދާޅުވި ގޮތުގައި މިހާރު ކޮވިޑު ފެސިލިޓީތަކުގައި ދިމާވާ ހާލަތަށް ރިއާއަތްކޮށް، އެޑްމިޓު ކުރެވޭ ބަލި މީހުންނާއެކު އެހީތެރިއަކު ވެސް ފަރުވާގެ މުއްދަތަށް ހޮސްޕިޓަލުގައި އެޑްމިޓުކުރެވޭނެ ކަމަށެވެ.
ނަމަވެސް، އެހީތެރިންނަކީ އެހެން ބައްޔަކަށް ފަރުވާ ހޯދަމުން ނުދާ، ރަނގަޅު ސިއްހަތެއްގައި ހުރުން ފަދަ ޝަރުތުތަކެއް ފުރިހަމަވާންޖެހޭނެ ކަމަށް ވިދާޅުވި އެވެ.
އެގޮތުން، އެޑްމިޓުކުރާ ބަލި މީހުންނަށް އޭޑީކޭއިން އާއްމުކޮށް ފަރުވާ ހޯދުމުގެ ފީތައް ހިނގާނެ ކަމަށާއި، ނަމަވެސް، ކޮވިޑުގެ ފަރުވާއަށް ދޭ ބޭހާއި އާސަންދައިގެ ތެރެއިން ލިބޭ އެހެނިހެން ބޭސްތައް އެ އޮންނަ އިންތިޒާމެއްގެ ތެރެއިން ލިބޭނެކަން އަފްއާލް ފާހަގަކުރެއްވި އެވެ.
އަދި އެޑްމިޓު ކުރެވޭ ބަލި މީހުންނާއި އެހީތެރިންނަށް ވެސް ކޭން ބުއިމުގެ އިންތިޒާމު ހޮސްޕިޓަލުން ހަމަޖައްސައިދޭއިރު، ބޮޑަށް ބާރު އަޅަނީ ހޮސްޕިޓަލުން ބޭރުން އެއްޗެހި ނުގެނައުމަށް ކަމަށެވެ.
"އެކަމަކު އެލާޖީއެއްގެ ސަބަބުން ވަކި ހާއްސަ އެއްޗެއް ކާންޖެހޭ ޕޭޝަންޓުންނަށް ގެއިން ކާ އެއްޗެހި ގެނައުމުގެ ފުރުސަތު އޮންނާނެ. އެކަން އަޅުގަނޑުމެންގެ އިންތިޒާމުގެ ތެރެއިން ހަމަޖެހިގެންދާނެ،" އަފްއާލް ވިދާޅުވި އެވެ.
ކޮވިޑު ބަލިމަޑުކަމުގައި ގައުމީ އުސޫލުތަކެއް ހަމަޖައްސާފައިވާއިރު، އެޑްމިޓުކުރާ ބަލި މީހެއްގެ ހާލު ބޮޑުވެ، އައިސީޔޫއަށް ލާންޖެހޭ ހާލަތެއްގައި، އެކަމަށް ސަރުކާރުން ހަމަޖައްސާފައިވާ ފެސިލިޓީއަށް ފޮނުވާލަންޖެހޭނެ ކަމަށް އޭނާ ވިދާޅުވި އެވެ.
ނަމަވެސް، އެފަދަ ފެސިލިޓީއަކަށް ގެންދިޔުމާ ހަމައަށް ބަލި މީހަކަށް ފަރުވާ ދިނުމަށް ބޭނުންވާ ވެންޓިލޭޓަރު ފަދަ ވަސީލަތްތައް ހުންނާނެ ކަމަށް އަފްއާލް ވިދާޅުވި އެވެ.
"އަޅުގަނޑުމެންގެ ފަރުވާ ބައްޓަންކޮށްފައިވަނީ އެފަދަ ހާލަތަކަށް ނުގޮސް، ފަރުވާދީ، ރަނގަޅުވެގެން ހޮސްޕިޓަލުން ޑިސްޗާޖުވުން،" އޭނާ ވިދާޅުވި އެވެ.
