ކޮވިޑް-19 ގައި ރޭ މަރުވި އުމުރުން 10 އަހަރުގެ އަންހެން ކުއްޖާ ބަލާ އެމްބިއުލެންސް ފޮނުވުން ލަސްވި މައްސަލަ ބަލައިދޭން ރައްޔިތުންގެ މަޖިލީހުގެ މައްޗަންގޯޅި ދެކުނު ދާއިރާގެ މެންބަރު އަހުމަދު ހައިތަމް ހުށަހަޅުއްވައިފި އެވެ.
ހދ. ކުޅުދުއްފުށީ، ލާޖަހާގޭ، ފާތިމަތު މިޝްކާ މުހައްމަދު މަރުވީ ރޭ ދަންވަރު އައިޖީއެމްއެޗު ހޮސްޕިޓަލުގައި އެމެޖެންސީކޮށް ފަރުވާދެމުން ދަނިކޮށެވެ. އިމާދުއްދީން ސްކޫލްގައި ކިޔަވަމުންދިޔަ ހާއްސަ އެހީއަށް ބޭނުންވާ މިޝްކާއަކީ ކޮވިޑް ބަލީގައި ރާއްޖޭގައި މަރުވި އެންމެ ހަގު އަދި ފުރަތަމަ ކުޑަކުއްޖާ އެވެ.
އެ މައްސަލައިގައި މިޝްކާގެ އާއިލާގެ މީހަކު ސޯޝަލް މީޑިއާގައި ބުނެފައި ވަނީ ކޮވިޑަށް ޕޮޒިޓިވްވެފައި ހުރި އެ ކުއްޖާގެ ނޭފަތުން ލޭ އައިސް ނޭވާލާން އުނދަގޫވާތީ އެމްބިއުލާންސެއް ފޮނުވައިދިނުމަށް އެދި ހެލްތު ޕްރޮޓެކްޝަން އެޖެންސީގެ އެމަޖެންސީ ނަންބަރުގައި އެދުމުން އެމްބިއުލެންސް ފޮނުވީ ދެ ގަޑިއިރާ 10 މިނެޓު ފަހުން ކަމަށެވެ.
އެކަމާ ގުޅިގެން ހެލްތު މިނިސްޓްރީއަށާއި އައިޖީއެމްއެޗްއަށް ވަރަށް ބޮޑަށް ފާޑުކިޔުން ވަނީ އަމާޒުވެފަ އެވެ.
މެންބަރު ހައިތަމް މަޖިލީހަށް ހުށަހެޅުއްވި މައްސަލާގައި ބުނެފައިވަނީ، ކުއްލި ހާލަތުގައި ސިއްހީ ފަރުވާ ލަސްވުމުގެ ހާދިސާތައް ތަކުރާރުވަމުންދާ ސަބަބު ދެނެގަތުން މުހިންމު ކަމަށެވެ.
ސިއްހީ ފަރުވާ ލިބުން ލަސްވާ ސަބަބާއި އެކަން މިއަށް ވުރެން ފަރުވާތެރި ކަމާއިއެކު ނުގެންދެވޭ ސަބަބާއި، މާލޭގެ އާބާދީ އާއި އެކަށީގެން ވާވަރަށް ހިދުމަތް ދެވޭނެ އަދަދަށް ސިއްހީ އާލާތްތަށް ހުރިތޯ ބެލަން ޖެހޭކަން ހައިތަމް ފާހަގަކުރެއްވި އެވެ.
"އަދި މިކަމުގައި ޒިންމާ ނަގަން ޖެހޭ ފަރާތްތަކާއި ސުވާލު ކުރެވެންޖެހޭ،" ހައިތަމް ހުށަހެޅުއްވި މައްސަލާގައިވެ އެވެ.
ހައިތަމް އެދިވަޑައިގެންފައިވަނީ، މިކަމުގައި ޒިންމާ ނަގަން ޖެހޭ ފަރާތްތައް މަޖިލީހުގެ ކަމާ ގުޅޭ ކޮމިޓީ އަށް ހާޒިރުކޮށް މިމައްސަލަ ވީހާވެސް އަވަސް ފުރުސަތެއްގައި ބެލުމަށެވެ.
އެ މައްސަލައިގައި ހެލްތު މިނިސްޓްރީން މިއަދު ބުނެފައި ވަނީ މިޝްކާ ބަލައި އެމްބިއުލެންސް ފޮނުވި ވަގުތުގެ މައްސަލަ ބަލަން ފަށާފައިވާ ކަމަށެވެ. އަދި އެމެޖެންސީގައި އެމްބިއުލެންސް ފޮނުވަން ހަމަޖެހިފައިވާ ގޮތްތަކަށް މިހާރު ބަދަލުތަކެއް ގެނެސްފައިވާ ކަމަށް ވެސް މިނިސްޓްރީން ބުންޏެވެ.
ހިއުމަން ރައިޓްސް ކޮމިޝަނުން މިހާރު ވަނީ މައްސަލަ ބަލަން ފަށާފަ އެވެ.
