ކޮވިޑް ޖެހިފައިފައިވާ މީހުންގެ ތެރެއިން ހާލު ބޮޑުނުވާ މީހުންނަށް ސިއްހީ ފަރުވާ ދިނުމުގެ ހިދުމަތް އޭޑީކޭ ހޮސްޕިޓަލުން ފަށައިފި އެވެ.
އޭޑީކޭން ކޮވިޑް ބަލީގެ މީހުންނަށް ފަރުވާ ދޭން ފެށީ މި ހަފްތާގެ ތެރޭގަ އެވެ.
އޭޑީކޭގެ މެނޭޖިން ޑިރެކްޓާ އަހުމަދު އަފްއާލް ވިދާޅުވީ ކޮވިޑަށް ޕޮޒިޓިވް ވެފައިވާ މީހުންގެ ތެރެއިން ޑޮކްޓަރަށް ދައްކަން އެޗްއޯއީސީގައި އެދެމުންދާ ބައެއް މީހުންނަށް އާސަންދައިގެ ތެރެއިން ހިލޭ ޑޮކްޓަރަށް ދެއްކުމުގެ އިންތިޒާމު ކޮންމެ ދުވަހަކު ވެސް އެ ހޮސްޕިޓަލުން ހަމަޖައްސައިދޭ ކަމަށެވެ.
އަދި، އެ މީހުންނަށް ދޭ ބޭސް ވެސް އާސަންދައިގެ ތެރެއިން ލިބޭނެ އިންތިޒާމު ހަމަޖައްސައިދެމުންދާ ކަމަށް އޭނާ ވިދާޅުވި އެވެ.
އޭޑީކޭގައި މިހާރު ވަނީ ފްލޫ ކްލިނިކެއް ވެސް ހުޅުވައިފަ އެވެ. އެތަނުން ވެސް ޑޮކްޓަރަށް ދެއްކުމާއި ބޭސް އާސަންދައިގެ ތެރެއިން ހިލޭ ލިބޭނެ ކަމަށް އަފްއާލް ވިދާޅުވި އެވެ.
އަފްއާލް ވިދާޅުވީ، ކޮވިޑަށް ހަދާ ޓެސްޓާއި އެހެން ބައެއް ޓެސްޓްތަކަށް މިހާރު ފައިސާ ދައްކަން ޖެހުނު ނަމަވެސް، އެ ހިދުމަތްތައް ވެސް އާސަންދައިގެ ތެރެއިން ހަމަޖެއްސުމުގެ މަސައްކަތް ކުރަމުން އަންނަ ކަމަށެވެ.
"ފްލޫ ކްލިނިކްގައި ނުޖެހޭނެ ކިޔޫގައި ތިބެން ވެސް. ކިޔުބީ ނަމްބަރު ނަގައިގެން ނަމްބަރު ޖެހެން ކައިރި ވީމަ ހޮސްޕިޓަލަށް ވަޑައިގެންނެވޭނެ،" އަފްއާލް ވިދާޅުވި އެވެ.
ޕޮޒިޓިވްވެފައިވާ މީހުންގެ ތެރެއިން ލޭ އަޅަން ޖެހޭ މީހުންނާއި ބޭސް ބަދަލު ކުރަން ޖެހޭ މީހުންފަދަ ފަރުވާތައް ބޭނުންވާ މީހުންނަށް ޑޭ ޓްރީޓްމަންޓް ސެންޓަރެއް ވެސް އޭޑީކޭގައި ގާއިމްކޮށްފައިވެ އެވެ.
އެތަނަށް ގުޅޭނެ ހޮޓްލައިނަކީ 3300335 އެވެ. ސެލްފް ރަޖިސްޓްރޭޝަން ފޯމެއް ވެސް ސޯޝަލް މީޑިއާ މެދުވެރިކޮށް އޭޑީކޭން އާއްމުކޮށްފައިވެ އެވެ.
ކޮވިޑް ޖެހިފައިވާ މީހުންނަށް ފަރުވާ ދޭން އޭޑީކޭން ބޭނުން ކުރަނީ ކެންޓީނާ ޖެހިގެން ހުންނަ އިމާރާތެވެ.
އަފްއާލް ވިދާޅުވި ގޮތުގައި އެ ހޮސްޕިޓަލުން ކޮވިޑުގެ ބަލި މީހުންނަށް ފަރުވާ ދޭން ފެށީ މާލެ ސަރަހައްދުގައި ބަލި އިންތިހާއަށް ފެތުރެމުންދާތީ، ސިއްހީ ހިދުމަތްދޭ ތަންތަނަށް ބާރުބޮޑުވާން ފެށުމުން އެހީތެރިވުމުގެ ގޮތުން ކަމަށެވެ.
"އަޅުގަނޑުމެންގެ ވެސް ވަރަށް ގިނަ މުވައްޒަފުން ކަރަންޓީންގައި އެބަތިބި. މުވައްޒަފުންގެ ދަތިކަން ބޮޑު. އެކަމަކު މިހާލަތުގައި ދެވެން ހުރި ހިދުމަތްތައް ދޭން ވެގެން އަޅުގަނޑުމެން ވެސް މި މަސައްކަތް ކުރަނީ،" އަފްއާލް ވިދާޅުވި އެވެ.
ކުރިއަށް އޮތް ދުވަސްތަކުގައި އިތުރު ހިދުމަތްތައް ވެސް ދޭން ފަށާނެ ކަމަށް އަފްއާލް ވިދާޅުވި އެވެ.
ކޮވިޑްގައި ހާލު ބޮޑުވާ މީހުންނަށް މިހާރު ފަރުވާ ދެމުން އަންނަނީ ހުޅުމާލޭ މެޑިކަލް ފެސިލިޓީ އާއި ދަރުމަވަންތަ ހޮސްޕިޓަލުގަ އެވެ. އެތަންތަނުގެ ޖާގައިގެ ދަތިކަން ބޮޑުވެފައިވާއިރު ހުޅުމާލޭގައި އިތުރު ފެސިލިޓީއެއް ހަދަން ސަރުކާރުން ވަނީ ނިންމައިފަ އެވެ.
މާލެ ސަރަހައްދުން ކޮވިޑަށް ޕޮޒިޓިވްވާ މީހުންގެ އަދަދު ބޮޑުތަނުން އިތުރުވެފައިވާއިރު ބަލީގައި މަރުވާ މީހުންގެ އަދަދު ވެސް ވަނީ އިތުރުވެފަ އެވެ. މި މަހަކީ ރާއްޖޭން ކޮވިޑްގައި އެންމެ ގިނަ މީހުން މަރުވި މަހެވެ.
