ވަރަށް މަދުން ފެންނަ ނުރައްކާތެރި އިންފެކްޝަނެއް ކަމަށްވާ މިޔުކޯމައިކޮސިސް ނުވަތަ "ބްލެކް ފަންގަސް" އަށް ޝައްކު ކުރެވިގެން ޓެސްޓް ހެދި ދެ މީހުންގެ ނަތީޖާ ވެސް ނެގަޓިވް ވެއްޖެ އެވެ.
އައިޖީއެމްްއެޗްގެ ސީނިއާ ޑޮކްޓަރަކު "އަދަދު" އަށް ޔަގީން ކޮށްދީފައިވާ ގޮތުގައި ބްލެކް ފަންގަސް ކަމަށް ޝައްކު ކުރެވިގެން ޓެސްޓް ކުރި މީހުންގެ ނަތީޖާއިން އެ މީހުންގެ ގައިން ފެނުނީ ބްލެކް ފަންގަސް ނޫންކަން ވަނީ ޔަގީންވެފަ އެވެ.
"ފަންގަސް އަށް ޓެސްޓް ކުރުމަކީ ހަމަ އާއްމު ރޫޓިން. އެ ދެ ޕޭޝެންޓުންގެ ރިޕޯޓްވެސް ވަނީ ލިބިފައި. ރާއްޖޭން މިހާތަނަށް އެ ބަލި ފެނިފައެއް ނުވޭ،" ޑޮކްޓަރު ވިދާޅުވި އެވެ.
ބްލެކް ފަންގަސް ހުރި ކަމަށް ޝައްކު ކުރެވުނު އެކަކަކީ ކޮވިޑު ޖެހި އެ ބަލިން ފަސޭހަ ވެފައި ހުރި މީހެކެވެ. އަވައްޓެރި އިންޑިއާގައި ހަލުވި ކަމާއެކު އެ ބަލި ޖެހެމުން ދަނީ ކޮވިޑާއެކު އެވެ.
އާއްމުކޮށް ވަރަށް މަދުން ފެންނަ މި އިންފެކްޝަނަކީ ހަކުރު ބަލީގެ މީހުންނާއި ހަށިގަނޑުގެ ދިފާއީ ނިޒާމު ބަލިކަށި މީހުންގެ ފުރާނައަށް ނުރައްކާވެދާނެ އިންފެކްޝަނެކެވެ. އެގޮތުން ކެންސަރާއި އެއިޑްސް ބަލީގެ މީހުންނަށް ވެސް ނުރައްކާ ބޮޑެވެ. ނަމަވެސް ބްލެކް ފަންގަސްއަކީ ގައިން ގަޔަށް އަރާ ބައްޔެއް ނޫނެވެ.
ބްލެކް ފަންގަސް އިންފެކްޝަން ހަށިގަނޑުގައި އާއްމުކޮށް ފެތުރެނީ ވެއްޔާއި، ގަހާއި، ގަސް ކާނާގެ ގޮތުގައި ބޭނުން ކުރާ ޖަނަވާރުގެ ނަޖިސް އަދި ކުނިވަމުންދާ މޭވާ އާއި ތަރުކާރީގައި ހުންނަ މިއުކާ މޯލްޑް ހަށިގަނޑުގެ ތެރެއަށް ވަނުމުންނެވެ.
ކޮވިޑްގެ ހާލަތު ގޯސްވެފައިވާ އިންޑިއާގައި ބްލެކް ފަންގަސް ވަނީ ވަރަށް ބޮޑަށް އިތުރުވެފަ އެވެ. ޑޮކްޓަރުން ލަފާކުރަނީ ބްލެކް ފަންގަސް އިތުރުވީ ކޮވިޑުގައި ހާލު ދެރަވާ މީހުންނަށް ފަރުވާއެއްގެ ގޮތުގައި ބޭނުން ކުރާ ސްޓިރޮއިޑްސްގެ ސަބަބުން ކަމަށެވެ.
ރާއްޖޭގައި މަސައްކަތްކުރާ ތަޖުރިބާކާރު ޑޮކްޓަރުން ބުނާ ގޮތުގައި ބްލެކް ފަންގަސް އަކީ ދިފާއީ ނިޒާމު ދަށް މީހުންނަށް ޖެހުމުގެ ފުރުސަތު އޮތް ބައްޔެކެވެ. ކޮވިޑުގެ ސަބަބުން އެ ބަލި ފެތުރުން އިތުރުވެފައިވަނީ ސްޓެރޮއިޑްފަދަ ބޭސްތަކުގެ އަސަރުން ކަމަށް ޑޮކްޓަރުން ވަނީ ބުނެފަ އެވެ.
އެންމެ ގިނަ ބަޔަކު ބިރުގަންނަ އެއް ސަބަބަކީ ބްލެކް ފަންގަސް އަކީ ކޮވިޑުގެ ގޮތަށް ފަސޭހައިން ގައިން ގަޔަށް އަރާ ބައްޔަކަށް ވެދާނެތީ އެވެ. ނަމަވެސް ޑޮކްޓަރުން ބުނާ ގޮތުގައި މިއީ އެގޮތަށް ފެތުރޭ ބައްޔެއް ނޫނެވެ.
ބްލެކް ފަންގަސްއަށް ދޭ ބޭސް ލިބުން އިންޑިއާގައި ވެސް ވަނީ ދަތިވެފަ އެވެ. އެ ބައްޔަށް ފަރުވާ ދޭން ބޭނުން ކުރާ އެމްފޯޓެރިސިންބީގެ ބޭސް ރާއްޖޭގައި ވެސް ނެތް ކަމަށް ކުޑަކުދިންގެ ޑޮކްޓަރު އަހުމަދު ފައިސަލް ވިދާޅުވެ އެވެ.
