ކޮރަޕްޝަން މައްސަލަތަކެއްގައި ހިމެނޭ ޕާކިސްތާނުގެ އިދިކޮޅު ލީޑަރު ޝޭހްބާޒް ޝަރީފް އެ ގައުމުން ފުރުން މަނާކޮށްފި އެވެ.
މި މަހުގެ ކުރީކޮޅު ލާހޯރުގެ ހައި ކޯޓުން ވަނީ ޖަލުގައި ބަންދުކޮށްފައި ހުރި ޕާކިސްތާން މުސްލިމް ލީގް ޕާޓީގެ ރައީސް ޝޭހްބާޒް ބޭސް ފަރުވާއަށް ގައުމުން ފުރުމުގެ ހުއްދަ ދީފަ އެވެ.
އުމުރުން 69 އަހަރުގެ ޝޭހްބާޒް މަސައްކަތް ކުރީ މެއި 8 ވަނަ ދުވަހު ލަންޑަނަށް ފުރުމަށެވެ. ނަމަވެސް ފެޑެރަލް އިންވެސްޓިގޭޝަން އެޖެންސީން އޭނާ ހުއްޓުވީ އެއާޕޯޓުގައި ހުއްޓަ އެވެ.
ޝޭހްބާޒަށް ނުފުރުނީ ބްލެކްލިސްޓުގައި ނަން އޮތުމުން ކަމަށް އެފްއައިއޭއިން އޭރު ބުންޏެވެ. އިންޓީރިއާ މިނިސްޓްރީން ބުނީ އެގޮތަށް ނިންމީ ކެބިނެޓުން ކޮރަޕްޝަން މައްސަލަތަކާ މެދު ކަންބޮޑުވާތީ ކަމަށެވެ.
ޝޭހްބާޒް ފުރަން އެދުނުއިރު އެއްވެސް މެޑިކަލް ލިޔުމެއް ވެސް ހުށަހަޅާފައި ނުވާ ކަމަށް އިންޓީރިއާ މިނިސްޓްރީން ބުނެ އެވެ. ނަމަވެސް އޭނާ މިދިޔަ ހަފްތާގައި ވިދާޅުވީ ކެންސަރަށް ފަރުވާ ކުރަން ޖެހޭ ކަމަށެވެ.
ލަންޑަނާއި ނިއު ޔޯކުން ކުރިން ފަރުވާ ހޯދި ކަމަށާއި ޖަލުގައި ހުރެ ހެދި ޓެސްޓުތަކުން އަވަސް ފަރުވާ މިހާރު ބޭނުންވާކަން ހާމަވެފައިވާ ކަމަށް ޝާހްބާޒް ވިދާޅުވި އެވެ.
ޝޭހްބާޒްގެ ބޭބެ، ކުރީގެ ބޮޑުވަޒީރު ނަވާޒް ޝަރީފްގެ މައްޗަށް ވެސް ކޮރަޕްޝަންގެ ކުށް ސާބިތުވެ ޖަލުގައި ހުއްޓާ ބޭސް ފަރުވާ އަށް 2019 ވަނަ އަހަރު ލަންޑަނަށް ދިޔަ ގޮތަށް އަނބުރާ ގައުމަށް ނާދެ އެވެ.
އިންޓީރިއާ މިނިސްޓްރީން ބުނީ އޭރު ނަވާޒަށް ޖާމިނުވީ ޝޭހްބާޒް ކަމަށާއި އެހެންވެ މިހާރު އޭނާއަށް އިތުބާރު ކުރެވެން ނެތް ކަމަށެވެ.
ނޭޝަނަލް އެކައުންޓެބިލިޓީ ބިޔުރޯއިން ބުނީ ޝޭހްބާޒްގެ އާއިލާގެ މުއްސަނދިކަމުގެ ގޮތުގައި 1990 އާ ހަމައަށް ހުރީ 16.5 މިލިއަން ޕާކިސްތާން ރުޕީޒް (107،896 ޑޮލަރު) ކަމަށެވެ. ނަމަވެސް 2018 ވަނަ އަހަރު އައިއިރު އެ އަދަދު ވަނީ ހަތް ބިލިއަނަށް އިތުރުވެފަ އެވެ. މިއީ އާމްދަނީއާ ނުބައްދަލު އަދަދެއް ކަމަށް ވަނީ ކަނޑައަޅާފަ އެވެ.
