ރާއްޖޭގައި މިހާރު ކޮވިޑް-19ގެ ހާލަތު އިންތިހާއަށް ގޯސްވެފައިވާތީ، މިދިޔަ މަހު ކައުންސިލްތަކަށް އިންތިހާބުވި ކައުންސިލަރުން ހުވާކުރުން އޮންލައިންކޮށް ކުރިއަށް ގެންދަން ލޯކަލް ގަވަމަންޓް އޮތޯރިޓީ (އެލްޖީއޭ)އިން ނިންމައިފި އެވެ.
މިދިޔަ މަހުގެ 10 ވަނަ ދުވަހު ބޭއްވި ކައުންސިލް އިންތިހާބުގައި އިންތިހާބުވި ކައުންސިލަރުން ހުވާކުރުމުގެ ރަސްމިއްޔާތު ބާއްވަން ނިންމާފައި އޮތީ އަންނަ ހޯމަ ދުވަހަށެވެ.
ނަމަވެސް، މާލޭގެ އިތުރުން ގިނަ ރަށްތަކަށް ކޮވިޑު ފެތުރި، ބައެއް ރަށްތައް ލޮކްޑައުންކުރަންޖެހިފައިވާއިރު، ކައުންސިލަރުންގެ ހުވާކުރުމުގެ ރަސްމިއްޔާތާމެދު ވަނީ ސުވާލު އުފެދިފަ އެވެ.
އެކަމާ ގުޅޭގޮތުން ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ސުވާލު ކުރުމުން އެލްޖީއޭގެ ޑިރެކްޓާ ޖެނެރަލް އާދަމް ޝަރީފް ވިދާޅުވީ ކޮވިޑުގެ ސަބަބުން އިންތިހާބު ފަސްކުރަންޖެހުމުން އާ ކައުންސިލަރުން އިންތިހާބު ނުކުރެވި ވެސް ގިނަ ދުވަސްތަކެއްވެފައިވާއިރު، ކައިރި މުސްތަގުބަލެއްގައި ކޮވިޑުގެ ހާލަތު ރަނގަޅުވާނެ މަންޒަރެއް ވެސް އަދި ނުފެންނަ ކަމަށެވެ.
އަދި އާ ކައުންސިލަރުން ހުވާކުރުން ލަސްވާ ކޮންމެ ދުވަހަކީ ކައުންސިލުތައް ހިންގުމަށް އިތުރު ހުރަހެއް އެޅޭ ކަމެއް ކަމަށް އޭނާ ވިދާޅުވި އެވެ.
އެހެންކަމުން، އިންތިހާބުވި ބޭފުޅުން ކައުންސިލުތަކާ ހަވާލުވުން އިތުރަށް ފަސްކުރެވެން ނެތްކަން ފާހަގަކުރައްވަމުން ޝަރީފް ވިދާޅުވީ ހުރިހާ ކައުންސިލަރުން ވެސް އޮންލައިންކޮށް ހުވާކުރާ ގޮތަށް މިހާރު ހަމަޖައްސާފައިވާ ކަމަށެވެ.
"ގާތްގަނޑަކަށް ހުރިހާ ރަށެއްގައި ވެސް ހުވާ ކުރުމުގެ ކަންކަން ދާނީ އޮންލައިންކޮށް. ޕަބްލިކަށް އެ ރަސްމިއްޔާތުގައި ބައިވެރިވުމުގެ ފުރުސަތު ލިބިވަޑައިގަންނަވާނީ މިހާރު ހުރި މީސް މީޑިޔާގެ ލައިވް ޕްލެޓްފޯމުތަކުގެ ތެރެއިން،" ޝަރީފް ވިދާޅުވި އެވެ.
އޭގެ އިތުރުން ކޮވިޑާ ގުޅިގެން މިހާރު އަޅާފައިވާ ފިޔަވަޅުތަކުގެ ސަބަބުން އެއް ރަށުން އަނެއް ރަށަށް ދަތުރުކުރުމަށް ހުރަސްތަކެއް ކުރިމަތިވެފައިވާތީ، ފަނޑިޔާރުން ނެތް ރަށްރަށުގައި ތިބި ކައުންސިލަރުންނަށް ހުވާލައިދެއްވާނީ އޮންލައިންކޮށް ކަމަށެވެ.
ނަމަވެސް، އަންނަ ހޯމަ ދުވަހުގެ ކުރިން އެއް ރަށުން އަނެއްް ރަށަށް ދަތުރުކުރުމަށް އަޅާފައިވާ ފިޔަވަޅު ލުއިކޮށްފި ނަމަ، ކުރިން ވެސް ހުވާ ކުރުމުގެ ރަސްމިއްޔާތު ބޭއްވޭ ގޮތަށް އިންތިޒާމުތައް ހަމަޖައްސާފައިވާ ކަމަށް އިތުރަށް ވިދާޅުވި އެވެ.
ރާއްޖޭގައި ފުރަތަމަ ފަހަރަށް ދެ އިންތިހާބެއް އެކުގައި ބޭއްވިއިރު ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 3،814 ކެންޑިޑޭޓުން ވާދަކުރި އެވެ. މީގެ ތެރެއިން ކައުންސިލްތަކަށް 982 މީހަކު އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް 930 މީހުންނާ އެކު ޖުމްލަ 1912 މީހުން އިންތިހާބު ކުރަން ޖެހުނެވެ.
އެ އިންތިހާބުގައި ވެރިކަންކުރާ އެމްޑީޕީން ވަނީ 400 ގޮނޑިއާއެކު ކައުންސިލުތަކުގެ އަގުލަބިއްޔަތު ނަގައިފަ އެވެ. އިދިކޮޅު ޕީޕީއެމް/ޕީއެންސީ ކޯލިޝަނަށް ކާމިޔާބުވީ 325 ގޮނޑި އެވެ.
ނަމަވެސް، މާލެ ސިޓީ ކައުންސިލްގެ އަގުލަބިއްޔަތާއި ކުރިން އެމްޑީޕީގެ ތާއީދު ބޮޑު ބައެއް ރަށްތަކުން ވެސް މުހިއްމު ގޮނޑިތަކެއް އިދިކޮޅުން ވަނީ ކާމިޔާބުކޮށްފަ އެވެ.
