ކޮވިޑު ފެތުރުން ކޮންޓްރޯލް ކުރުމުގެ ގޮތުން ކުރިއަށް އޮތް ފިތުރު އީދާ ދިމާކޮށް ޕާކިސްތާނުގައި ނުވަ ދުވަހުގެ ލޮކްޑައުން ތަންފީޒު ކުރަން ފަށައިފި އެވެ.
މި ބަލީގެ ތިން ވަނަ ރާޅެއް ކުރިމަތިވެފައިވާ ޕާކިސްތާނުގައި މިދިޔަ އޭޕްރިލް މަހު ވެސް އެއް މަސް ވަންދެން ލޮކްޑައުން ތަންފީޒު ކުރި އެވެ.
ދެ ވަނަ ލޮކްޑައުނަކަށް ގޮސްފައި މި ވަނީ ކޭސްތައް އިތުރުވާ ނަމަ ސިއްހީ ނިޒާމު ފެއިލްވުމުގެ ބިރު އޮތުމުން ކަމަށް ޕާކިސްތާން ސަރުކާރުން ބުނެ އެވެ.
ބަލިމަޑުކަމާ ގުޅޭ ކަންކަމުގައި އިސްކޮށް އުޅުއްވާ ޕްލޭނިން މިނިސްޓަރު އަސަދު އުމަރު ވިދާޅުވީ ޕާކިސްތާނަށް ދިމާވެފައި ވަނީ "ނުރައްކާތެރި ހާލަތެއް" ކަމަށެވެ.
އެ ގައުމުގައި މިހަތަނަށް 850،000 ޕޮޒިޓިވް ކޭސް ފެނިފައި ވާއިރު، 18،600 މީހުން މަރުވެފައި ވެއެވެ. ފަހަކަށް އައިސް ކޮންމެ ދުވަހަކު ވެސް 100 އެއްހާ މީހުން މަރުވެ އެވެ.
އެ ގައުމުގެ އާބާދީގެ 200 މިލިއަނަށް ވުރެ ގިނަ މީހުންގެ ތެރެއިން މިހާތަނަށް ވެކްސިން ދީފައިވަނީ އެންމެ 3.32 މިލިއަން މީހުންނަށެވެ.
