މާލެ ސަރަހައްދުގައި އެއްތަނުން އަނެއް ތަނަށް ދިއުމުގެ ކަންކަން އިތުރަށް ހަރުކަށި ކުރަން ޖެހޭ ކަމަށާއި އެވަރުން ނުވާ ނަމަ ލޮކްޑައުންއަކަށް ވެސް ދާން ޖެހިދާނެ ކަމަށް، އިމަޖަންސީ އޮޕަރޭޝަން ސެންޓަރުގެ ޓެކްނިކަލް އެޑްވައިޒަރީ ގްރޫޕް (ޓެގް) އިން މިރޭ ބުނެފި އެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ޓެގް ޓީމްގައި ހިމެނިވަޑައިގަންނަވާ ޑރ. އަހުމަދު ޝަހީދު ތަފާސް ހިސާބުތަކާ ހަވާލާ ދެއްވައި ވިދާޅުވީ ކޮވިޑްގެ ހާލަތު ދަނީ ވަރަށް ގޯސް ވަމުން ކަމަށާއި އެހެންވެ އިތުރު ފިޔަވަޅުތަކެއް އަޅަން ޖެހޭ ކަމަށެވެ.
"އަޅުގަނޑުމެން ދެކޭ ގޮތުގައި ވަރަށް އަވަހަށް މިއަށް ވުރެން އަދި ހަރުކަށި މޫވްމެންޓް ރެސްޓިކްޝަންތަކެއް ގެންނަން ޖެހޭ ކަމަށް އަޅުގަނޑުމެން ގަބޫލު ކުރަނީ. މޫވްމެންޓް ރެސްޓްރިކްޝަންތަކަކާ އެކު ވެސް އަދަދުތައް މައްޗަށް ދިއުން ކޮންޓްރޯލް ނުވާނަމަ އެކަށީގެންވޭ ހަމަ ލޮކްޑައުންއަކަށް ދާން ޖެހުން ވެސް،" ޝަހީދު ވިދާޅުވި އެވެ.
ކޮވިޑުން ރައްކާތެރިވުމުގެ ގޮތުން މާލެ ސަރަހައްދުގައި ކޮންމެ ރެއެއްގެ 9 އިން ފަތިހު 4 އަކަށް އަންނަނީ ކާފިއު ހިންގަމުންނެވެ. އަދި ކުޅިވަރު ކުޅޭ މައިދާންތަކާއި ޕާކްފަދަ ތަންތަނުގެ އިތުރުން ސިނަމާތައް ވެސް ވަނީ ބަންދުކޮށްފަ އެވެ.
ވޭތުވެދިޔަ 24 ގަޑިއިރުގެ ތެރޭގައި ރާއްޖޭން ކޮވިޑަށް ޕޮޒިޓިވްވީ 590 މީހުންނެވެ. ވޭތުވެދިޔަ ދެ ތިން ދުވަހު އެ އަދަދު ހުރީ 600 އިން މަތީގަ އެވެ. މިވަގުތު ހޮސްޕިޓަލުގައި 230 މީހުންނަށް ފަރުވާ ދެމުން އަންނައިރު ބަލީގައި 83 މީހަކު ވަނީ މަރުވެފަ އެވެ.
ނުރައްކާތެރި ހާލަތު ސިފަކޮށް ދެއްވަމުން ޝަހީދު ވިދާޅުވީ އައިސީޔޫގައި މިހާރު ފަރުވާ ދެމުން ދަނީ އުމުރުން ދުވަސްވީ މީހުން އެކަނި ނޫން ކަމަށެވެ. އުމުރުން 26 އަހަރާއި 37 އަހަރާއި 39 އަހަރުގެ މީހުންނަށް ވެސް އައިސީޔޫގައި ފަރުވާ ދެމުން އަންނަ ކަމަށް އޭނާ ވިދާޅުވި އެވެ.
ބަލިން ރައްކާތެރިވުމަށް މިހާރު އެންމެ އިސްކަން ދޭ އެއް ކަމަކީ ވެކްސިން ޖެހުން ކުރިއަށް ގެންދިއުން ކަމަށް ވެސް ޝަހީދު ވިދާޅުވި އެވެ. ވެކްސިން ޖަހަން ޖެހޭ މީހުންގެ ތެރެއިން އެއްވެސް ޑޯޒެއް ނުޖަހާ 35 ޕަސެންޓް މީހުން އެބަތިބި ކަމަށް ވެސް އޭނާ ވިދާޅުވި އެވެ.
ވެކްސިން ނުޖަހާ ކަމަށް ޑޮކްޓަރުން ވިދާޅުވާއިރު އެންމެ ގިނަ މީހުން ފުރަތަމަ ޑޯޒް ޖެހި ކޮވިޝީލްޑް ވެކްސިން ވަނީ ސްޓޮކް މަދުވެފަ އެވެ. އެއާއެކު ދެވަނަ ޑޯޒް ނުޖެހި ގިނަ ބަޔަކު އެބަތިއްބެވެ.
ވެކްސިންގެ އަޕްޑޭޓް ދެއްވަމުން ޝަހީދު ވިދާޅުވީ ސިނަފާމް ވެކްސިން 65 އަހަރުން މަތީ މީހުންނަށް ދެވޭނެ ކަމަށް ޑަބްލިޔުއެޗްއޯއިން ކަނޑައެޅުމުން ރާއްޖޭގައި ވެސް އުމުރުން 18 އަހަރުން މަތީ އެންމެނަށް އެ ވެކްސިން ދެން ދޭނެ ކަމަށެވެ. މާބަނޑު މީހުންގެ ތެރެއިން ކޮވިޑަށް ޕޮޒިޓިވްވާ މީހުންނަށް ފައިޒާ ވެކްސިން ދޭނެ އުސޫލު ވެސް ހަދަމުން އަންނަ ކަމަށް އޭނާ ވިދާޅުވި އެވެ.
